ཀ་བ་བུམ་པ་ཆོས་ཅན་གྱི་དབུ་རྩོམ།།

ཁ་མཁས་གྲྭ་ཆུང་ངག་རྩལ་གྱི་ཁུད་ལ།།

ག་ཙམ་ཡིན་ཡང་སྦྱོར་ངག་ལ་དྲངས་ཏེ།།

ང་འཛིན་ཞེན་པ་ལྷག་མེད་དུ་གཏོར་སྲིད།།

ཅ་ཅོའི་སྨྲ་བ་རྒྱང་རིང་ལ་བོར་ནས།།

ཆ་ཡོད་ཚིག་ལ་སྡེབ་སྦྱོར་གྱིས་བརྒྱན་ཏེ།།

ཇ་རོ་ལྟ་བུའི་རྟག་འཛིན་གྱི་ཀླད་པ།།

ཉ་ཤ་ཇི་བཞིན་ལྷག་མེད་དུ་གསོལ་འདུག།

ཏ་ཀུར་ཁེན་པའི་བགྲེས་པོ་ཡི་དཔྲལ་བར།།

ཐ་སྙད་རྟག་འཛིན་ད་དུང་ཡང་འཚེར་ན།།

ད་ལྟ་ཉིད་ནས་རང་སེམས་ཀྱི་མེ་ལོང་།།

ན་གཟེར་ངང་ནས་བྱི་དོར་ཞིག་བྱ་རན།།

པ་ཏྲའི་རི་མོ་མིག་ནང་གི་ཕྲ་རྒྱན།།

ཕ་མ་རྟག་འཛིན་སེམས་ནང་གི་ཞེན་ཆགས།།

བ་ཡོད་སྨྲ་བ་ཡིད་ངོས་ཀྱི་བདག་འཛིན།།

མ་ལོ་གཅེས་འཛིན་འཇིག་རྟེན་གྱི་རྟག་ལྟ།།

ཙ་གེ་ཙིག་གི་བྱ་བཞག་གི་མདུད་སྣེ།།

ཚ་གི་ཚི་གི་སྣང་ཚོར་གྱི་མུན་པ།།

ཛ་ར་ཛོ་རེ་ལས་སྣང་གི་ཡོལ་བ།།

ཝ་ལེར་ཝུ་ལེར་འཆིང་རྒྱ་ལས་གྲོལ་མཛོད།།

ཞ་བོ་ལག་ཆག་རྣམ་སྨིན་གྱི་ཁྲག་རྣག།

ཟ་འདོད་གཡོ་བ་གྲོང་ནང་གི་འཚོ་བ།།

འ་འུར་སྤུར་བའི་སྒྱུ་མ་ཡི་འཇའ་སྐུད།།

ཡ་ངེ་ཡེ་ངེའི་དུས་ཚོད་འདི་རྟག་གམ།།

ར་མགོ་ས་སྦྱར་དོན་མེད་ཀྱི་འཆར་ཡན།།

ལ་ལུང་ནང་གི་ནམ་ཚོད་ཀྱི་མར་སྣེ།།

ཤ་ཟད་ལྤགས་ཟད་ལས་སྐལ་གྱི་ཡར་སྣེ།།

ས་གཞོང་ངོས་ཀྱི་རྡུལ་ཕྲན་ལས་མང་བ།།

ཧ་ཧ་འཇིག་རྟེན་རྟག་འཛིན་འདི་ཆེ་བ།།

ཧ་ཧ་དོན་མེད་བྱ་ལས་འདི་མང་བ།།

ཨ་ཨ་རང་གི་རྣམ་རྟོག་འདི་རྒོད་པ།།

ཨ་ཨ་སེམས་བྱུང་འགྱུ་བ་འདི་མང་འདུག །

༼ ཧུན • དུར་རོ། ༽