ལུས་ཀྱི་ལང་ཚོའི་མཛེས་སྡུག་དེ། །
རྨ་བྱ་སྔོན་མོའི་སྒྲོ་གཡབ་བཞིན། །
ད་དུང་ཞལ་རས་གོར་མོ་གན། །
གསར་དུ་བཞད་པའི་མེ་ཏོག་ལྟར། །
སྙིང་ལ་བབས་པའི་མཆུ་སྒྲོས་ཀྱང་། །
བྱུ་རུ་དམར་པོ་ལྟ་བུ་འོ། །
ལུས་ཀྱི་བྱ་སྤྱོད་གཙང་མ་བ། །
འཆི་མེད་བུ་མོ་ཇི་ལྟ་བུ། །
ཐོད་པའི་མིག་ཟུང་རི་མོ་དེ། །
དགུང་གི་འཇའ་ཚོན་ཉིད་དང་མཐུན། །
འགྲམ་པ་ཟུང་གི་དམར་ཐིག་ཀྱང་། །
ཀུ་ཤུ་གསར་པའི་དམར་དང་མཚུངས། །
མགོ་ཡི་སྐྲ་ལོ་ནག་སྨུག་གན། །
ཁྱུང་གི་མིག་དང་ཡང་དག་མཚུངས། །
སྐེད་པ་ཕྲ་མོའི་མཛེས་སྡུག་དཔལ། །
མཚོ་ནས་བླངས་པའི་པད་མར་མཉམ། །
ཞལ་རས་དཀར་ལ་དམར་བ་དེས། །
དབྱངས་ཅན་ལྷ་ཞལ་ཡང་དག་གསལ། །
སྙན་འཇེབས་སོ་སྒོའི་རོལ་མོ་དེས། །
དྲི་ཟའི་གླུ་དབྱངས་ངེས་པར་གསལ། །
ཡལ་མེད་སེམས་ཀྱི་ཕྱི་ཐག་དེས། །
རྨ་ཆུའི་བཞུར་རྒྱུན་རབ་ཏུ་གསལ། །
ནག་ནོག་དབེན་པའི་ཞལ་གྱི་གདོང་། །
ཉི་འོད་ཕོག་པའི་གངས་ཀྱི་ཟླ། །
ཕར་འཁོར་རྒྱབ་གཟུགས་རི་མོ་ཡང་། །
གསར་སྐྱེས་སྨྱུག་མའི་གཉེན་པོའོ། །
ཚུར་འཁོར་མདུན་གྱི་ལང་ཚོའི་དཔལ། །
འཆི་མེད་ལྷ་མོའི་དགྲ་ཟླ་འོ། །
༼ དྲང་མདའ། ༽
རྨོ་མོ་སེམས་པའི དྲོད་ཅིག་ཡིན།
ཞེན་ཆགས་ལྷག་མ་ཞིག་གི་རྒྱབ་ཏུ།
དྲན་གདུང་དང་སྐྱོ་བ་རུམ་གང་ཉར་དོན།
ཡིད་ཚིམ་པའི་དྲིན་ལན་ཞིག་འཕྲད་མེད་པས་ཡིན།
བྱིས་དུས་སུ་ཁོ་བོས་ཅི་ཡང་མི་རྟོགས།
གཞོན་དུས་ཀྱང་སྣང་བ་རྒྱ་ཡན་དུ་གཏོང་ཤོར།
ད་ནི་ཁྱེད་ལ་འཆང་བའི་ཤུལ་ལུས་ཀྱི་དྲན་གདུང་སྟེ།
ཉིན་མཚན་གཉིས་སུ་འགོག་མི་ཐུབ་པའི་ཚོར་བ་མཐའ་མེད་ཅིག།
འདི་ནས་ཡར་རྩིས་པའི་ལོ་ཟླ་གྲངས་མེད་ཅིག་ལ།
རང་ཉིད་ལ་བློ་དཀར་བའི་རྨོ་མོའི་འཛུམ་ཞལ།
མ་བཅོས་པའི་བརྩེ་དུང་དང་བྱམས་པའི་སེམས།
ལྷད་མེད་པའི་འཁྲེང་སེམས་དང་ཞེན་ཆགས་རེ་རེ་ལས།
ངའི་སྒྱུ་ལུས་དང་བཅས་པའི་ན་ཚོད་འདི་རིམ་གྱིས་སོན་ཡོད།
ཞལ་འཇམ་ལ་ཁོག་ཡངས་པའི་རྨོ་མོས།
ཡིད་འོང་གི་ལོ་ཟླ་དང་བག་ཕེབས་ཀྱི་འཚོ་བ་ལས།
དགའ་སྐྱོ་ཆགས་སྡང་གིས་ང་ཚོའི་ན་ཚོད་ལ་མནོ་བསམ་བཏང་མྱོང་།
སྣང་བའི་རོལ་རྩེད།
ཉིན་མཚན་དུས་དྲུག་ཏུ་ངེད་ཅག་དང་ལུས་སེམས་
འབྲལ་མེད་དུ་བཞུགས་མྱོང་།
དྲན་གྱིན་པའི་རྨོ་མོ་ལགས།
འུ་ཅག་བྲལ་ནས་ལོ་ངོ་བཅུ་ཕྲག་གི་ཡར་སྔོན་དུ་ཁྱེད་རང་ནི།
རང་ཁྱིམ་གྱི་དཀའ་སྡུག་དང་ངལ་དུབ་རྒྱབ་ཏུ་ཁྱེར་མཁན་དེའམ།
སེམས་ཚེགས་དང་ན་ཟུག་ཡོད་དགུ་ཁོག་ཏུ་ཉར་མཁན་དེ་ཡང་ཡིན།
སྙིང་ཉེ་བའི་ཨ་ཕྱི་མ།
ཁྱེད་རང་ང་ཚོ་དང་གཏན་དུ་བྲལ་ཡོད་ཀྱང་སྲིད་ལ་མེད་ཀྱང་སྲིད།
བདག་གིས་དྲན་སྐྱེན་པ་དང་བརྗེད་དཀའ་བའི་ཁྱེད་ཀྱི་
འཛུམ་མདངས་ནི།
གཏན་དུ་འབྲལ་མེད་པའི་སྣང་བ་ཞིག་གི་དབུ་ཁྱུད་བྲིས་པ་
ལན་གཅིག་མིན།
ཨ་ཕྱི་་་་ ཨ་ཕྱི་་་་ ཨ་ཕྱི་་་་
འདི་ནི་ཁ་རོག་གེའི་འབོད་མིང་ཞིག་མ་ཡིན་ཏེ།
ལོ་གཅིག་ནས་ལོ་ཉེར་ལྔའི་བར་དུ་དྲན་སྣང་དུ་བཞད་པའི་མིང་ངམ།
ལྷད་མ་འདྲེས་པའི་བརྩེ་སེམས་ཀྱིས་ཟིན་པའི་ཐ་
སྙད་ཡངས་པོ་ཞིག་ཀྱང་ངོ་།
དྲན་གདུང་གི་སྣང་བ་ཤིན་ཏུ་ལྕི་ཞིང་།
སྐྱོ་སྣང་གི་ལན་ཆགས་ལྷག་ཏུ་མཐུག་དུས།
སེམས་པའི་དྲོད་ལྟར་ང་ལ་ཤུལ་དུ་ལུས་པ་ནི་འདི་དག་སྟེ།
རྨོ་མོའི་མཛའ་བརྩེ་ཡངས་པོ་དང་ངག་སྙན་རིང་མོ།
གཏིང་མི་དཔོག་པའི་བྱམས་པ་ཚད་མེད་དང་སྙིང་རྗེ་ཚད་མེད།
ད་དུང་ངག་ནས་བརྗོད་མི་ཐུབ་ཅིང་སེམས་སུ་འཆར་
མ་བདེ་བ་ཤིན་ཏུ་མང་།
དེ་དག་ནི་ངའི་མིག་ཆུ་དང་ངུ་ངག་གི་བར་གསེང་དུ་
ཆགས་ཡོད་པར་ཐེ་མི་ཚོམ།
བརྩེ་བའི་ཕུང་པོ་གྱུར་པའི་ཨ་ཕྱི་མ།
ཉེ་བའི་ལོ་ཟླ་འདི་ནས་ཁྱེད་དྲན་པ་སྔར་བས་མང་བྱུང་།
གློ་བུར་དུ་ཁྱེད་ཀྱི་མིང་འབོད་ཐེངས་ཀྱང་གྲངས་ཀྱིས་མི་ཆོད།
དེ་ནི་གཅིག་བྱས་ན་ང་ལ་བྱིས་པའི་སེམས་ལས་མེད་པས་ཡིན་སྲིད་ལ།
ཡང་གཅིག་བྱས་ན་བཅོས་མིན་གྱི་བྱམས་སྐྱོང་གི་བག་
ཆགས་ཟབ་པས་ཡིན་ངེས།
འཁོར་བའི་ངང་ཚུལ་ལ་མཇུག་མཐའ་མེད་པ་དང་།
ཀ་ཁ་སུམ་ཅུའི་བརྗོད་བྱ་ལ་རྫོགས་མཐའ་མེད་པ་ནང་བཞིན།
ཁྱེད་ཀྱིས་གནང་བའི་གྱ་གྱུ་དང་ཡ་ཡོ་བྲལ་བའི་རྣམ་
དག་གི་བརྩེ་བ་ལ་མཐའ་མེད།
དེའི་ཕྱིར་ཁོ་བོས་ཀྱང་ཁྱེད་རང་གླེང་ན་མཐའ་ནི་གང་
ཞིག་ན་སྲིད་དེ་མི་སྲིད་དོ། །
བརྩེ་ལྡན་གྱི་རྨོ་མོ་དྲིན་ཆེན།
ཁྱེད་རང་ད་ལྟ་གང་དུ་བཞུགས་ཀྱང་བརྩེ་བ་ནི་ངེད་ཅག་
དང་འབྲལ་མྱོང་མེད།
ཁྱེད་རང་ད་ལྟ་གང་དུ་འཚོ་ཡང་དུངས་བ་ནི་ངེད་ཀྱང་
གཏན་དུ་འབྱེ་མྱོང་མེད།
དེ་བས་ཁྱེད་ནི་ངའི་སེམས་ཀྱི་དྲོད་དང་བདེ་བའི་རྒྱུ་རྐྱེན་
གཅིག་པུ་དེ་ཡིན་ཨང་།
༼ ཁྲག་གདོང་། ༽
སྣང་བའི་རོལ་རྩེད།
སྤྲིན་དཀར་པོ་དུམ་བུ་དུམ་བུ་རླུང་གིས་གཏོར། །
བྲིས་མི་ཚར་སྲིད་པའི་སྣང་བརྙན་སྣ་ཚོགས་ཤིག །
ངའི་ཚོར་བའི་སྟེགས་བུ་འདི་རུ་འགའ་འོངས་ཏེ། །
ཚིག་ཚོགས་པའི་གསེང་དུ་ཡང་ཡང་གྲམ་ནས་འདུག །
རླུང་བསིལ་བུ་དལ་གྱིས་བདག་གི་ཕྱོགས་སུ་ལྡང་། །
དེ་མ་ཟད་བསྣེམས་པའི་འགྲམ་པ་གཡས་གཡོན་ནས། །
ཡང་བྱིལ་བྱིལ་བྱེད་པའི་སྣང་རྩེད་སྣ་ཚོགས་འདི། །
ངའི་ཚིག་གི་འཁོར་བ་འདི་ཡི་གདུང་འཁོར་ཡིན། །
འོད་ལམ་ལམ་འཚེར་བའི་ཉི་གཞོན་སེར་པོ་འདིས། །
ངའི་ལུས་སྐྱེས་མེ་ཏོག་འདར་འདི་མཐོང་བ་བཞིན། །
མཐོ་ནམ་མཁའ་ཡངས་པའི་ཀློང་ནས་འོད་ཟེར་གྱི། །
དྲོད་གུར་ཆུང་ཕུབ་ནས་བདག་ལ་སྲུང་སྣང་འཆར། །
དེ་ལོས་ཡིན་འཆར་ཡན་བུ་མོ་འཛུམ་ཁ་མའི། །
ལག་སོར་མོའི་གར་སྟབས་བསྒྱུར་ལ་སྤྲོ་དགས་ཕྱུག །
ཕྱི་ཁྲ་ཁྲའི་འཇིག་རྟེན་འཁྱག་གིས་འདར་ཚུལ་འདིས། །
ནང་ཀུན་རྟོག་རླབས་རིས་བཙན་གྱིས་གནོན་ཐབས་ཅི། །
དབྱངས་སྙན་པའི་རྒྱུད་སྐུད་དལ་གྱིས་འཁྲོལ་མོས་ན། །
ངག་གཙང་པོ་འདི་ལ་བཀག་རྒོལ་བྱེད་མཁན་མེད། །
དོན་ཟབ་གནད་ལྡན་པ་བརྗོད་པའི་སྟོབས་མེད་ཀྱང་། །
མི་ཕལ་བའི་སེམས་ཀྱི་ཕྱི་ནང་མཚོན་ཐབས་ཤིག །
སེམས་འདི་ནི་དཀར་ནག་དགེ་སྡིག་སྣ་ཚོགས་ཀྱི། །
དོན་བདེན་རྫུན་གཉིས་ཀ་བླུགས་སའི་སྣོད་ཆེན་ཞིག །
ངའི་སྣོད་འདི་ཡང་དག་བཅུད་ཀྱིས་མ་གཏམས་པར། །
ཡིད་མི་འོང་འབག་བཙོག་དུ་མས་ཡོངས་སུ་གང་། །
རྫོགས་མཐའ་མེད་ཐ་སྙད་ཚིག་གི་ཤེལ་དཀར་ཕྲེང་། །
བགྲང་མི་ཚར་སྲིད་པའི་ཉིན་སྲིབ་གྲངས་མེད་བཞིན། །
འདི་དཀར་ནག་སྣང་མུན་གཉིས་ཀྱི་སོ་མཚམས་ནས། །
ཞེ་དགའ་དང་སྐྱོ་བའི་གྲངས་དང་མཚུངས་པར་བགྲང་། །
༼ ཁངས་མ། ༽
དྲན་སྣང་གི་སྟོན་མཇུག།
དོ་ཞག་ནམ་ཟླའི་ཙག་རླུང་རྒོད་དྲགས་པས། །
མི་སེམས་རླུང་གི་དར་ལྕོག་གཡོ་ནས་ཟེགས། །
སྣང་བའི་ཡོ་ལང་འཁྲུག་ནས་འདར་ཞིང་སྔངས། །
གདོང་ལ་མིག་ཆུ་བཏབ་པའི་ལན་ཆགས་ལྕི། །
སྨུག་པ་རི་ལུང་རྒྱུ་བའི་སྲིད་པའི་ཁམས། །
ལས་ཀྱི་ཕྱིར་མིག་འདི་ཡང་རྒྱང་ལ་བསྲིངས། །
དོ་ནུབ་ཟླ་བ་ཁེར་རྐྱང་སེམས་སུ་ལྷུང་། །
སེམས་ཀྱི་ཏིང་འཛིན་དཀྲོག་པའི་རི་དྭགས་མིག །
ཡིད་གཞུང་གཙང་པོའི་ངོགས་སུ་འཛུམ་ཁ་གྲོལ། །
སྙིང་རུས་པད་མའི་ཚལ་གྱི་མདངས་མཛེས་པ། །
ཆ་བྱད་དཀར་དམར་འཁྱུད་པའི་མཆུ་སྒྲོས་དེ། །
འཚོ་བའི་བྲང་གཞུང་ཁུད་ན་རྟག་ཏུ་འཛུམ། །
བདག་གི་ནམ་མཁའི་ངོས་ཀྱི་འཆར་སྣང་འདི། །
མཚན་ཞག་རྨི་ལམ་བརྒལ་བའི་རྟ་ཁྱུ་ཡིན། །
སྤྲིན་པ་ལྷོ་ལམ་ཞོགས་པའི་ངང་ཚུལ་དེ། །
དྲན་པའི་ལྟེང་ཀ་ཞུགས་ནས་ལྡིང་སྐོར་རྒྱག །
ལན་གཅིག་སྙིང་ལ་སིམ་པའི་ཡིད་ཀྱི་ངོར། །
སྐྱེ་བ་ཚེ་རབས་སྟོང་གི་སྙིང་ཚིལ་ཡིན ། །
༼ ཇེང་། ༽