རྨོ་མོ་མ་གཤེགས་གོང་དུ།
སྙན་ངག་བརྒྱ་ཙམ་བྲིས་འདུག་ཀྱང་།
དེ་དག་ནང་། རྨོ་མོར་བདག་པའི་སྙན་ངག་གཅིག་ལས་མི་འདུག །
རྨོ་མོ་མ་གཤེགས་གོང་དུ།
ས་ཆ་བརྒྱ་ཕྲག་འགྲིམས་མྱོང་ཡང་།
དེ་དག་ནང་། རྨོ་མོ་དང་ལྷན་ཅིག་བགྲོད་པའི་ས་ཆ་གཉིས་ལས་མི་འདུག།
རྨོ་མོ་མ་གཤེགས་གོང་དུ།
གཏམ་དཔེ་བརྒྱ་ལྷག་གསུངས་ན་ཡང་།
དེ་དག་ལས། ད་ལྟ་དྲན་པར་གནས་པ་གཏམ་དཔེ་གསུམ་ལས་མི་འདུག །
རྨོ་མོ་མ་གཤེགས་གོང་དུ།
མཛུབ་མོ་རི་སྟོན་བརྒྱ་རྩ་གནང་མོད་ཀྱང་།
དེ་དག་ལས། ངོས་འཛིན་གསལ་པོར་བྱུང་བ་ཁ་ཕྱོགས་བཞི་ལས་མི་འདུག །
རྨོ་མོ་མ་གཤེགས་གོང་དུ།
སྨོན་ལམ་བརྒྱ་གྲངས་བཏབ་ཡོད་ཀྱང་།
དེ་དག་ནང་། རྨོ་མོ་གཅིག་པུར་དབང་བའི་སྨོན་ལམ་གཅིག་ཀྱང་མི་འདུག་གོ།
༼ བསོད་ནམས་ལེགས་བཤད། ༽