ལོ་རྙིང་སེམས་ཀྱིས་སྐྱེལ་མ་ལན་གསུམ་ཞུ།།

འདས་པའི་བྱ་གཞག་གྱེས་ཕྱག་ཚར་གསུམ་འཚལ།།

དགུ་ཐུག་ཞིམ་མངར་མྱོང་བ་སྟབས་གཅིག་ཏུ།།

ཉིས་སྟོང་ཉེར་གསུམ་རྫོགས་ཚིག་རི་མོ་འགོད།།

གངས་ཀྱི་དབུ་རྩེ་ཉི་མའི་འོད་རིས་འཛུམ།།

ལྷུན་གྱིས་བཞུར་བའི་སྤྲིན་པ་ལང་ལོང་གཡོ།།

བསིལ་ལྡན་འཛིན་མའི་ཁྱོན་དུ་བཀྲ་ཤིས་པའི།།

གཡང་ལོ་གསར་བའི་ལང་ཚོ་ལྷོད་ཀྱིས་གྲོལ།།

ཚེས་གཅིག་བསང་དུད་ཨ་སྔོན་དགུང་ལ་འདྲེས།།

དངོས་སུ་བཤམས་དང་ཡིད་ཀྱིས་སྤྲུལ་གྱུར་ལས།།

མཆོད་བཤམས་གཙང་མ་ལྷ་དང་ལྷ་མོའི་ཚོགས།།

ཐུགས་བཞེད་དགྱེས་ཕྱིར་དང་བས་དབུལ་བར་བྱ།།

བཀའ་དྲིན་ཆེ་བའི་ཚེ་གཅིག་ལས་ཀྱི་མགོན།།

ཐུགས་བརྩེ་ཟབ་པའི་ཡབ་ཡུམ་རིན་ཆེན་ཉིད།།

ཟས་རིགས་སྣ་མང་སྡེར་ཁ་རང་བསྒྲིགས་ནས།།

དྲིན་ཤེས་ཀློང་ནས་དགའ་སྤྲོས་སྐྱོང་བར་བྱ།།

ཁ་མཐུན་ཁོག་འདྲིས་ན་ཟླ་སྙིང་དབུས་གཉེན།།

རྩེད་ཡ་དགོད་རོགས་ལུང་པ་གཅིག་ཏུ་འཚོ།།

མཛའ་མཐུན་ལག་གདང་དཔུང་པ་མཉམ་གཤིབ་ཞོར།།

གླུ་ལེན་གར་རྩེད་ལོ་གསར་ལྷན་དུ་རོལ།།

སྒང་པ་བོད་ཀྱི་ལུགས་སྲོལ་མ་ཉམས་འོག།

དུས་ཀྱི་ཅོང་བརྡའི་གྲིབ་གཟུགས་མ་བྲལ་བར།།

དེང་རབས་སྤྱི་ཚོགས་ཁམས་དང་མཐུན་པ་ཡི།།

གནམ་ལོ་གསར་པའི་དགའ་སྟོན་དཔལ་ལ་རོལ།།

ཁ་ལས་ཁྱུང་ཆེན་རྒོད་པོ་འཕུར་རྩལ་རྒྱས།།

དཔའ་གཏུམ་རྒྱ་སྟག་དམར་པོ་འཛུམ་དྲུག་བཀྲ།།

ཁ་རྗེ་སེང་ཆེན་སྤོབས་པས་ས་ཆེན་བཀབ།།

དབང་ཐང་གཡུ་འབྲུག་ལྡིར་སྐད་འཛམ་གླིང་ཁྱབ།།

བསོད་ནམས་གསེར་གྱི་ས་གཞིའི་པང་ཐོག་ཏུ།།

བདེ་སྐྱིད་ལོངས་སྤྱོད་ཀུན་གྱིས་བྱུག་གྱུར་ནས།།

བཀྲ་ཤིས་ལོ་སར་ལེགས་ཚོགས་ཇི་སྙེད་པ།།

བདེ་ལེགས་ངང་ནས་སྙན་ཚིག་ངག་གིས་བསུ།།

༼ གངས་ཆབ་ལྷ་སྲས། ༽