དཔྱིད་ཀྱི་དཔལ་མོས་འཛུམ་མདངས་འཕྲོ་བ་ནས།།
རི་ལུང་ཐང་གསུམ་ལྗང་མདོག་ཚོན་གྱིས་སྒྱུར།།
སེམས་ཅན་བློ་ལ་དགའ་བདེའི་སྣང་བ་སྟེར།།
ཐལ་རྡུལ་བྲལ་ཞིང་ལྷགས་རླུང་དབེན་པའི་དུས།།
ཕ་ཡུལ་སྨུག་པོ་དཀར་མཛེས་སྐྱིད་པའི་ཡུལ།།
འདི་ལས་གཞན་པའི་ཞིང་ཁམས་བཙལ་དགོས་མེད།།
སྣང་བ་ཐོགས་པ་ལན་གྲངས་གཅིག་ཙམ་མིན།།
བསམ་གྱིན་བསམ་ན་ཕ་མའི་ཞེན་ཆགས་ཀྱང་།།
རྒྱང་རིང་མ་འཁོར་རང་ཡུལ་གཅིག་པུར་འཁོར།།
རང་སེམས་འདི་ཡང་དཀར་མཛེས་ཡུལ་ལ་ཕྱོགས།།
ལོ་དང་ཟླ་བའི་བཞུད་རྒྱུན་རིང་མོ་ལས།།
དཔྱིད་ཀའི་དཔལ་ཡོན་རྫོགས་མཐའ་ཉིན་ཞིག་ལ།།
ལྗོན་ཤིང་ཚོགས་ཀྱིས་དགའ་སྤྲོའི་ངང་ཚུལ་དུ།།
དབྱར་ཟླ་ཞེས་པ་བཅོ་ལྔའི་དུང་ཟླ་བཞིན།།
ཕྱི་ནང་གསལ་བའི་མཛེས་སྡུག་རབ་སྤྲས་པ།།
ནམ་ཟླའི་གསེང་ནས་ཁྱད་དུ་འཕགས་པ་ཞིག།
མགྲོན་དུ་བསུས་ཤིང་རྒྱང་རིང་ཡུལ་ནས་བོས།།
དེ་དུས་ལྷག་པར་རང་ཡུལ་དཀར་མཛེས་ལུང་།།
ཡིད་འོང་འདྲེན་པའི་ཡུལ་ཕྱོགས་བྱེ་བྲག་ཅིག།
དྲན་གྱིན་དྲན་མཐར་ཕ་ཡུལ་ལྷག་ཏུ་སྐྱིད།།
དབྱར་ཟླ་དྲུག་པའི་ཚེས་པ་སུམ་བཅུའི་མཇུག།
སྟོན་ཁའི་ནམ་ཟླ་ནང་སེམས་གཏིང་དུ་བྲིས།།
རྩ་དང་རྩི་ཤིང་སེར་པོ་མདོག་གིས་བཀླུབས།།
ནམ་ཟླ་ཞིག་གི་གོ་རིམས་བསམ་བསམ་མཐར།།
རང་ཡུལ་ལུང་ལ་མཛེས་སྡུག་བར་མེད་མངོན།།
བདེ་སྐྱིད་ཆགས་པའི་ཡུལ་ལུང་འདི་འདྲ་ཞིག།
འཕྲད་པ་འདི་ཡང་སྔོན་གྱི་བསོད་ནམས་སྙམ།།
ལས་འབྲས་བརྩི་ཞིང་སྙིང་རྗེ་རབ་ཡངས་ཤིང་།།
མཐུན་ལམ་བཟང་ལ་ཡ་རབས་སྲོལ་ལྡན་པ།།
དཀར་མཛེས་ཡུལ་གྲུའི་བརྗིད་ཉམས་རབ་ཏུ་ཕྱུག།
དུས་ཀྱི་འགྱུར་ལྡོག་ནམ་མཁའི་གློག་དང་མཚུངས།།
དལ་བ་དལ་གྱིས་དགུན་ཟླའི་མཚར་སྡུག་བཞད།།
བྲེལ་འཚུབ་འཇག་ནས་ལྷོད་ལྷོད་བདེ་བའི་ངང་།།
སྐྱ་སེར་ཡོངས་ཀྱིས་དམ་པའི་ཟབ་ཆོས་སྒྲུབ།།
རང་སེམས་གཡེང་མེད་བརྩེ་བའི་རང་བཞིན་གྱུར།།
ཉེར་གཅིག་དུས་སུ་འདི་འདྲ་དཀོན་པའི་ཚད།།
ཕ་ཡུལ་ལུང་དུ་ཡར་ངོའི་ཆགས་བསྐྱེད་བཞིན།།
གོང་དུ་འཕེལ་བའི་སྲོལ་རྒྱུན་ལེགས་སྐྱོང་ནས།།
མཛེས་སྡུག་ལྡན་པ་འདིས་ཀྱང་བསྔགས་ཆོག་པ།།
དཀར་མཛེས་ཞེས་པའི་མཚན་སྙན་འབར་གྱུར་ཅིག།
༼ ཁྲག་གདོང་། ༽