ཉལ་ཁྲི་རྙིང་བ་དེས།
མི་ཆ་མེད་ཅིག་བསྐྱོན།
དེ་ལས་རྨི་ལམ་སར་བ་སྐྱེད།
ཤི་གསོན་གཉིས་ཀྱི་མི་ངོ་འཕྲད།
ང་ལན་གཅིག་བར་དོར་བསྐྱལ་བ་འདྲ།
སྙིང་ཉེ་བའི་མི་མགོ་ཁ་ཤས་མིག་ཁུང་ནང་
རུག་རུག་བྱེད།
ཐལ་སྐྱ་འཚུབ་བེ་བ་གཅིག་དང་།
སྣུམ་ཞག་ཚིལ་ལེ་བ་ཞིག
ངས་རྒ་བའི་སྡུག་བསྔལ་གྱིས།
ཞང་པོ་ཐར་བ་བཏང་བ་ཚོར།
ན་ཟླ་ཚོ་སྟོད་སྒུར་ཞིང་།
ཟོག་གི་འགྲོ་སྟངས་སྦྱོང་དུས།
ཁོས་ཨ་ཙི།
ག་རེ་བྱས་སོང་ཞེས་ཧ་ལས་འདུག
སྐར་ཆ་འགའི་རྗེས་ཀྱི་ཐོན་ཁ་ལ་མོར།
ད་ངེད་གཉིས་མགྱོགས་པོ་འཕྲད་ཡོང་
ལབ་སོང་།
མི་ཚོས།
ཤི་ན་ལོངས་ཤོག་ཟེར་རྒྱུ་མེད་ཟེར།
ཤི་བོས་ལངས་པས་མི་ཚད་རྒྱུག་ཤར་གློད་
གྲབས་བྱེད་ཀྱི།
གདོང་བྱད་ཀྱི་གྲངས་ཀས།
ཤི་གསོན་གྱི་དབྱེ་བ་ཆོད་ཡོང་།
གཤིན་པོའི་ཡིད་གཞུངས།
ངོ་གཉིས་མ་འཁྲབ་མྱོང་མེད་པས།
སུ་ཞིག་གིས།
རྒས་རྒྱུ་མེད་པའི་དངོས་གྲུབ་གནང་
སོང་ངམ།
༼ ལུག་རྫི། ༽