ངོ་མི་ཤེས་པའི་མཚན་གུང་འདིར།
ང་རང་སྙན་ངག་གཅིག་གིས་འཁྲུལ་འགྲོ།
བུད་མེད་གཅིག་གི་སྟོན་ཁའི་ནང་དུ་འཁོར་ན།
ཁྲུང་ཁྲུང་ཁྱུ་ཞིག་གི་གཤོག་སྣེ་རུ་བཏེགས་པའི་ཚོར་བ།
ཡིད་བརྙན་གྱི་མཚེའུ་ནང་དུ་ལྷོད་ཀྱིས་ཞབས་བྲོ་འཁྲབ།
ཁེར་རྐྱང་གིས་བསམ་གཞིག་རེ་བྱས་ན།
སྙན་ངག་གིས་གཉིད་བསླངས་པའི་ཞོགས་པ་ག་ཚོད་ལ།
ཁྱོད་ཀྱིས་རྟག་པའི་ནམ་མཁའ་ལས་མི་རྟག་ག་ཚོད་བལྟས་མྱོང་།
ཏག་ཏག་ཁྱོད་ཀྱིས་མི་རྟག་པའི་ཁྲུང་ཁྲུང་ཁྱུ་ཞིག་བྲིས་རྐྱེན།
ངའང་ཁྲུང་ཁྲུང་ཁྱུ་དེའི་གཤོག་སྒྲ་ལ་ཆགས་ཞེན་སྐྱེས།
ཁྱོད་ལ་ཁྲུང་ཁྲུང་ཁྱུ་ཞིག་ལས།
གཞན་ད་དུང་གཉིད་མ་ཁུག་པའི་མཚན་མོ།
ངོ་མི་ཤེས་པའི་ཞོགས་པ་ག་ཚོད་ཀྱིས་རམ་འདེགས་ཡོད་རྐྱེན།
ང་རང་ཁྱོད་ཀྱིས་གཏན་ནས་འཁྲུལ་དུ་བཅུག
༼ བསྟན་འཛིན་ཕུན་ཚོགས། ༽