མིག་གཉིས་མཉམ་དུ་ཞར་སོང་ན།
ངའི་སྐྲ་ལོའི་ཉག་མ་ལྷུང་མི་འོང་།
ངའི་མཁལ་མར་གཟེར་རྒོད་བརྒྱབ་མི་འོང་།
དེ་ལྟར་ནའང་། ང་ནི་འབར་ཞུན་འཚོང་བའི་བུ་མོ་ལྟར།
འཆར་ཡན་གྱི་བར་དོ་རུ་ཤི་འགྲོ།
ངས་སྙན་ངག་ཡག་པོ་ཞིག་མ་འཁྱོངས་པའི་སྔོན་ཏག་ཏག
ཆུང་མ་ངེད་གཉིས་ཁ་ཁ་བྲལ་སོང་ན།
ངའི་ཚོར་བ་རུ་མེ་ཁ་སྒོང་མཁན་མེད།
ངའི་དུ་བ་རུ་མེ་ཁ་སྒོང་མཁན་མེད།
དེ་ལྟར་ནའང་། ང་ནི་རྡོ་ཁང་གྲུ་བཞི་རུ།
གྲག་འགུལ་མེད་པར་ལྷག་འགྲོ
ངས་སྙན་ངག་ཡག་པོ་ཞིག་མ་འཁྱོངས་པའི་སྔོན་ཏག་ཏག
ནས་ཆང་དཀར་པོ་དེ་ཟད་སོང་ན།
ངའི་མཆིན་པར་འབྲས་སྐྲན་ན་མི་འོང་།
ངའི་སྙིང་ལ་ན་ཟུག་སྐྱེ་མི་འོང་།
དེ་ལྟར་ནའང་། ང་ནི་སྙིང་མེད་ཀྱི་རྡོ་བ་ལྟར།
འཁྱགས་རིལ་རིལ་དུ་གནས་འགྲོ
ངས་སྙན་ངག་ཡག་པོ་ཞིག་མ་འཁྱོངས་པའི་སྔོན་ཏག་ཏག
ང་ནི་བྱིས་པ་པྲ་ཆལ་ཞིག་ཡིན་འོས།
མེ་ཏོག་གིས་ཞྭ་མོ་བསླེས། རྡེའུ་ཡིས་ཁང་བ་བརྩིགས།
༼ བསྟན་འཛིན་ཕུན་ཚོགས། ༽