མི་ཚེ་འདི་ཡི་ལམ་མདོ་རིང་ཞིང་ཀྱོག།
ལམ་སྣེ་འབྲི་མཁན་ཁྱོད་ཉིད་ཡིན་པ་འདྲ།།
ནམ་ཞིག་སངས་རྒྱས་གཅིག་གི་མདུན་ངོས་སུ།།
སྡུག་བསྔལ་ཞེས་པ་བརྗེད་དུ་འཇུག་ཀྱང་སྲིད།།
ས་མཐའི་གངས་རིར་སྒེའུ་ཁུང་བརྒྱུད་ནས་བལྟས།།
གཙང་བོའི་འབབ་རྒྱུན་དེ་ལ་སེམས་པས་ཉན།།
མི་དག་གཅིག་ཏུ་ཧ་ཅང་གདེང་ཚོད་ངང་།།
སོ་སོའི་སང་ལོའི་ཞིང་ཁ་གླེང་བར་བྲེལ།།
ལས་ཀྱིས་ལྐོག་ཏུ་ང་ཡི་འབྲི་ཤོག་ལ།།
ཚེ་སྔོན་གསལ་ཆ་ཡོད་འདྲའི་མིང་ཞིག་བྲིས།།
མིང་དེ་ཁྱོད་ཀྱི་མིང་དང་ཤིན་ཏུ་མཚུངས།།
ག་ལེར་ནང་སེམས་འདི་དང་གཅིག་ཏུ་འཁྲུལ།།
དཔྱིད་ཟླ་ཐ་མའི་ཁྱོད་རང་གྲང་ཞིང་འཁྱགས།།
ང་ཡིས་བོར་བ་འདྲ་ལ་རྙེད་པ་འདྲ།།
མཚན་ཞག་གཅིག་ལ་མཐོང་བའི་གཟུགས་བརྙན་དེས། །
བསྐལ་བར་གསུབ་པ་མེད་པའི་དྲན་ཤིང་བཞག།
སླར་ཡང་སྐྱེ་བ་ལྔ་བརྒྱའི་རྗེས་དེ་ལ།།
ལས་ཀྱིས་ཡིན་ནམ་ཡང་ན་དཀོན་མཆོག་གིས།།
ང་རང་ནེམ་ལོ་ཞིག་ཏུ་གང་ཁྱེད་ཀྱི།།
ཡལ་ག་རེ་རེར་ཡང་ཡང་འགྲེང་དུ་བཅུག།
ད་ནི་དཔྱིད་ཟླ་རིང་མོ་ཕར་ལ་བསྐྱལ།།
འགྱོད་གདུང་བློས་བཏང་འདུན་མ་ཇི་འདྲའི་མང་།།
གང་ཁྱོད་བདག་དང་ཇི་ལྟར་རིང་གྱེས་ན།།
དེ་ལྟར་མཐོང་འདོད་སེམས་འདུན་འགོག་ཐབས་བྲལ། །
༼ གངས་གཤོག ༽