ཆུ་འཛིན་ཕོ་ཉ་ས་གཞི་ལ།།
ཤག་ཤག་སྙན་དབྱངས་ཚིག་གསུམ་ལེན།།
ནེའུ་གསེང་གཡུ་མདོག་ཕ་ཡུལ་ལ།།
མེ་ཏོག་སྟོང་གི་མཆོད་པ་མཆོད།།
དབྱར་ཁའི་ནམ་མཁའི་ཕོ་ཉ་དེས།།
ཕ་ཡུལ་ས་ལ་དར་དཀར་སྦྱིན།།
དར་དཀར་དུང་གི་ཕྲེང་བ་དེས།།
རི་ལུང་ཀུན་ལ་བྲོ་གར་འཆམ།།
བྲོ་གར་མཛེས་ཀྱི་ཉམས་ངོམ་ནས།།
སྙན་མོ་ངག་གི་གསུང་སྐད་ཐོས།།
རི་མགོ་མཁའ་ཡི་མཚམས་སྤྲིན་བར།།
ཚོན་མདོག་ལྔ་ཡི་འཇའ་ཚོན་བཀྲ།།
ཟམ་འོག་ཆར་གྱི་ཆབ་སྒྲ་དེས།།
ལམ་འགྲམ་མཚམས་ཀྱི་རྩྭ་སྔོ་ལ།།
གཉིད་སད་བརྡ་ཡི་ཅོང་བརྡ་བསྒྲགས།།
ཁྱོད་ནི་ནོར་གྱི་སྙིང་བཅུད་ཡིན།།
ཤར་ཕྱོགས་མཁའ་ལ་འོད་ཟེར་འཕྲོས།།
མེ་ཏོག་དྲི་ཞིམ་མཁའ་ལ་ལྡང་།།
ནེའུ་གསེང་མུ་ཏིག་ཕྲེང་བ་དེས།།
རྩྭ་སྔོའི་ཟིལ་ཆུ་ཅི་ལ་མིན།།
སེམས་པ་ལྷོད་སའི་གནས་མཆོག་ནི།།
ས་མཐའ་གང་ལ་བགྲོད་ན་ཡང་།།
སྙིང་ཁའི་ཁྲོད་ན་ཇེ་གསལ་རེད།།
ཤ་ཚ་མིའི་སྡུག་གླུ་ལེན་ས།།
༼ འབའ་ར་འབྱུང་ཆོས། ༽