སྙིང་ལ་རེག་ཏུ་མེད་ཅིང་།།
སེམས་ལ་སོན་དུ་དཀའ་བའི།།
བློ་ཡི་གཡུ་ཆུང་སྔོན་མོ།།
ཨ་ཅག་རིན་ཆེན་ཡིན་འདྲ།།
ལུས་འདི་སྒྱུ་མའི་གཟུགས་ལ།།
སྣང་བའི་མེ་ཏོག་བཞད་དེ།།
མི་ཚེར་ཟམ་པ་འཛུགས་དུས།།
འགྲོ་མཁན་ཁྱེད་རང་བསྒོམས་ཡོད།།
གསེར་གཞུང་ཁུགས་པའི་སྟོད་དུ།།
འོམ་ལུང་མེ་ཏོག་ཚོམས་སུ།།
ན་ཆུང་སེམས་ཀྱི་སྒོ་མོ།།
ཁྱེད་ཀྱིས་ཕྱེས་ན་བསམ་ཡོད།།
མཚན་ལ་རྒྱུ་སྐར་འཐུ་ཞོར།།
མུན་པའི་གཙང་བོ་སྐོར་དུས།།
དགུ་ཚིགས་བུ་མོ་འཛུམ་མེད།།
ཁྱེད་རང་ཡིན་ན་བསམ་བྱུང་།།
ན་ཚོད་ནད་ཀྱིས་ཟད་པ།།
ཆུ་དང་འོ་མའི་ངོ་སོ།།
སྟག་ཤར་སྙིང་གི་ཕྱེད་ཀ།
བུ་མོས་ཟོས་འདི་མཚར་རོ།།
སྨྲེང་བའི་ཕེབས་ལོག་དེ་གར།།
འགྱོད་གདུང་མིག་ཆུ་ཡོད་ཀྱང་།།
བ་ཁའི་དགུ་ཆུ་ལྟ་བུའི།།
ཆུ་དེར་འཕྲིན་པ་བསྐུར་ཆོག།
ལོ་དེ་ནམ་ཟླ་གང་རེད།།
འུ་གཉིས་འདྲེས་པ་ཨེ་གནང་།།
སེམས་ལ་ཡུ་མོ་གཤར་དུས།།
ཡིད་ལ་ཐོགས་པ་ཁྱེད་རེད།།
གཙང་ཆུ་ཤག་ཤག་བརྡོལ་བ།།
དྭངས་གཙང་འུ་གཉིས་བརྡ་རྟགས།།
ཆུ་ལ་ཟམ་པ་མེད་ན།།
འཕྲད་པའི་ལས་དེ་གང་རེད།།
ལན་མང་བསམ་དུ་མེད་ཅིང་།།
བསྐྱར་མང་བསྒྲུབ་ཏུ་དཀའ་བའི།།
ཨ་ཕོའི་དུང་སེམས་འོ་མ།།
ལན་གཅིག་བཞེས་རོགས་གནོངས་དང་།།
རབ་ཏུ་དཀར་བའི་སེམས་པ།།
ཁྱེད་ཀྱིས་ཕྱག་ཏུ་བླངས་ཆོག།
སྙིང་ཆུང་ལྷོག་ལྷོག་ལྡང་ན།།
ཆུ་ལ་འཕང་ཡང་ཆོག་གོ།།
༼ འཁོན་བུ་སྟག་རྒྱལ་ཚེ་རིང་། ༽