རྩྭ་ཐང་གི་ཨ་ཅེ། གྲོང་ཁྱེར་དང་གྱེས་རྗེས།
གྲོང་ཁྱེར་དུ་ཁ་བ་བབས་བྱུང་།
ལམ་བཞི་མདོའི་ཕྱོགས་སྟོན་བྱང་བུའི་ངོས།
ཁེར་ཧྲེང་དུ་འབུར་ཚུགས་ཅེར་ནའང་།
ཨ་ཅེའི་རྩྭ་ཐང་ནི་འཚོལ་ཐབས་བྲལ།
རྨི་ལམ་ཐེངས་ཤིག་གི་སྒྱུ་འཕྲུལ་ལས།
གྲོང་ཁྱེར་དུ་རྟ་ཕོ་ཞིག་འོངས།
རྟ་ཕོའི་རྨིག་རྗེས་སུ་ཁ་བ་བབས་བྱུང་།
གྲོང་ཁྱེར་ནི་ཧ་ཅང་ཆུང་། ཧ་ཅང་ཆུང་།
ཆུང་དྲགས་པས། ཆང་ཕོར་པ་གང་ཡང་ཤོང་མི་ཐུབ།
ཆུང་དྲགས་པས། ཁ་བའི་བརྩེ་དུང་གི་རང་མདངས་
ཤོང་མི་ཐུབ།
ཆུང་དྲགས་པས། བྱམས་པའི་སྤྱན་མིག་ཨེན་ཙམ་
ཡང་ཤོང་མི་ཐུབ།
ཆུང་དྲགས་པས། སྙན་ངག་གི་མཚན་མོ་ཡང་ཤོང་མི་ཐུབ།
རྩྭ་ཐང་གི་ཨ་ཅེ། གྲོང་ཁྱེར་དང་གྱེས་རྗེས།
གྲོང་ཁྱེར་དུ་ཁ་བ་བབས་བྱུང་།
གྲོང་ཁྱེར་ནི་རྩྭ་ཐང་གི་དུར་ཁྲོད་ཆུང་ངུ་ཞིག
དུར་ཁྲོད་ཀྱི་བར་སྣང་དུ་གླག་རྒོད་ཀྱི་གྲིབ་ཟུར་ཙམ་
ཡང་མི་འདུག
འོན་ཏེ། རྟ་ཕོའི་རྨིག་རྗེས་སུ་གླག་རྒོད་ཀྱི་མིག་ཆུ་འདུག་གོ
༼ གངས་འཁྱམ་གསར་བུ། ༽