མཛེས་སྡུག་ལང་ཚོ་རྫོགས་པའི་ཟླ་གཞོན་སྐུ།།
དྲི་ཟའི་པི་ཝང་འབུམ་གྱིས་འགྲན་མིན་པ།།
སྣ་ཚོགས་ཤེས་བྱའི་དཀྱིལ་འཁོར་རྣམ་པར་བཀྲ།།
སྙན་འཇེབས་གསུང་གི་ལྷ་མོས་དངོས་གྲུབ་སྩོལ།།
ཁྱེད་ཞལ་ཟླ་དཀར་མཛེས་སྡུག་གཞོན་ནུའི་ཚུལ།།
མཚར་སྡུག་ཡིད་འོང་ལྷ་མོ་དབྱངས་ཀྱི་ལྷ།།
སྙན་ཚིག་འབུམ་ཕྲག་སྟོང་ལ་དབང་འབྱོར་བས།།
མཆོག་སྩོལ་ངག་གི་དཔལ་གཏེར་ཁྱེད་མིན་སུ།།
རྣམ་དག་ཤེས་བྱའི་ཆོས་ཚུལ་ཐུགས་ལ་རྫོགས།།
འཛད་མེད་མཁྱེན་ཡངས་དཀར་པོའི་བློ་གྲོས་མངའ།།
རྨད་བྱུང་གསུང་གི་སྒྲ་དབྱངས་སྲིད་ན་སྙན།།
བདེ་སྟོང་གནས་ལུགས་རྟོགས་པའི་དབྱངས་ཅན་མ།།
རབ་མཛེས་གནག་སྣུམ་སྐྲ་ལོའི་ཐོར་ཅོག་ལྡེམ།།
རང་བྱུང་ཕྱག་སོར་རྒྱུད་མངས་འདྲེས་པའི་གདངས།།
ལེགས་གསུང་སྙན་འཇེབས་སྟོང་གིས་མངོན་པར་མཐོ།།
ཡིད་འཕྲོག་ཚངས་དབྱངས་ལྷ་མོ་ཟླ་ལྟར་དཀར།།
དགྱེས་ཉམས་ལང་ཚོ་གར་གྱིས་འཁྲི་ཤིང་གཡོ།།
ལྡེམ་ལེགས་མྱོས་བྱེད་ནོར་བུའི་འཕུར་ལྡིང་རྩེན།།
ཚེམས་དཀར་སུམ་ཅུའི་དུང་ཕྲེང་རྣམ་པར་བཞད།།
སྙན་དབྱངས་འགྱུར་ཁུགས་སྟོང་གིས་ཡིད་དབང་འཕྲོག།
མཐོན་མཐིང་པདྨའི་བཞིན་དཔལ་རབ་མཛེས་ཤིང་།།
འཇོ་སྒེག་གར་གྱིས་འགྱིང་སྟབས་རི་དྭགས་མིག།
དཀར་དམར་འཇའ་ཚོན་བཀྲ་བའི་དཔལ་ཡོན་འབུམ།།
ལྟ་བས་མི་ངོམས་ཡིད་འཕྲོག་མདངས་ལྡན་མ།།
རྨད་བྱུང་མཚར་སྡུག་འཛུམ་པའི་འཇའ་ཚོན་བཀྲ།།
སྒེག་ཉམས་ཡིད་འཕྲོག་ལྷ་མོ་དབྱངས་ལྡན་མ།།
དྲི་ཟའི་ན་ཆུང་ཆུ་འཛིན་དཀར་པོའི་འཕྲང་།།
བྱམས་བརྩེའི་འོད་སྟོང་ལྡན་པའི་འོད་དཀར་ཅན།།
སྙན་འཇེབས་འགྱུར་ཁུགས་སྟོང་གི་འཇོ་སྒེག་ལྡན།།
འཇམ་མཉེན་ཕྱག་སོར་དྲི་ཟའི་རྒྱུད་མངས་ཀེམ།།
བདག་བློའི་རྨོངས་པའི་མུན་པ་རབ་བསལ་ནས།།
བྱིན་རླབས་བདུད་རྩིའི་དངོས་གྲུབ་ཆར་དུ་བསྙིལ།།
༼ འཛུམ་བརྩེ་འཚོལ། ༽