སྙིང་རྗེའི་སྤྲིན་དཀར་འཁྱིལ་བའི་ལྷ་ལམ་ཡངས་མོ།།
ལས་ཀྱི་པང་དུ་བཞད་པའི་ཤེལ་དཀར་ལྷུན་པོ།།
ང་ཡི་དད་རྟེན། དྲིན་ཅན་མ་ལོ།
ཚེ་ལ་གནང་བའི་གཡུ་ཆུང་།
ལས་ལ་ཕུལ་བའི་གའུ།
བྱམས་བརྩེའི་དྲི་བསུང་འཁྱིལ་བའི་ཀུན་བཟོད་ཡངས་མོ།།
ཚེ་ཡི་ཕྲེང་བར་བརྒྱུས་པའི་མུ་ཏིག་དཀར་པོ།།
ང་ཡི་དད་རྟེན། དྲིན་ཅན་མ་ལོ།
ཚེ་ལ་གནང་བའི་གཡུ་ཆུང་།
ལས་ལ་ཕུལ་བའི་གའུ།
བསོད་ནམས་ལས་ཀྱིས་ཐེག་པའི་ཉི་ཟླའི་ཆ་ཡ།།
སེམས་ཀྱི་རི་ལ་བཞད་པའི་ཨུ་དུམ་བཱ་ར།།
ང་ཡི་དད་རྟེན། དྲིན་ཅན་མ་ལོ།
ཚེ་ལ་གནང་བའི་གཡུ་ཆུང་།
ལས་ལ་ཕུལ་བའི་གའུ།
༼ བེ་མདའ། ༽