ཕྱི་ཡི་ཡུལ་ལྗོངས་ཆར་ཆུ་འཐུང་འདོད་ཀྱིས།།
སྐོམ་པའི་གྲེ་བ་མནར་ནས་ཤིན་ཏུ་གདུང་།།
བསིལ་རླུང་འཇམ་པོ་རེ་ཡང་དལ་གྱིས་རྒྱུ།།
བྱིའུ་ཚོགས་ཀྱང་སྤེན་མའི་ནགས་གསེབ་འཚུབ།།
ཅིར་ཅིར་ཟེར་ནས་ཕན་ཚུན་གླེང་མོལ་བྲེལ།།
བཙའ་མདོག་ཤོར་བའི་ནོར་འཛིན་སྒེག་མོས་ཀྱང་།།
ལྗང་གུ་བཀྲ་བའི་ལྭ་ཞིག་གྱོན་འདོད་ཀྱིས།།
གངས་ཆར་འདྲེས་མའི་གཙང་ཆབ་ཧུབ་ཀྱིས་འཐུང་།།
སྤྲིན་པ་རྡེབ་པའི་གད་རྒྱང་ཕྱོགས་ཀུན་ལྡིར།།
ནང་གི་སེམས་ཤག་ཆར་གྱི་གཞས་ཆུང་གིས།།
སྐྱེ་བ་འདི་ཡི་ཁྱོད་རང་དཀྲོལ་ནས་འོང་།།
སྙན་པའི་ཟོལ་གྱིས་ཚོར་བའི་སྒེའུ་ཁུང་ལས།།
བལྟས་པས་མིག་ལ་འཇའ་ཚོན་སྡུག་གུ་བཀྲ།།
ཡི་གར་ལྷུང་བའི་གཤིས་བག་སེམས་ཚོར་བརླན།།
ལྗང་ལོ་རེ་ཡང་དྲན་པའི་རྟེན་དུ་འཛུམ།།
ཚེ་ཡི་རྒྱུད་སྐུད་སྟོང་གི་སྙན་པ་ཀུན།།
ཁྱོད་རང་ལྷེམ་པའི་དབྱངས་གསལ་ལྡེ་གུ་རྩེན།།
༼ གུ་དཔལ་ཤིས། ༽