ལྷད་མེད་བརྩེ་བ་འདི་གཉོམ་པོ་གཉོམ་པོ།།
ཞེ་འདང་རི་མོ་འདི་ཇེ་གསལ་ཇེ་གསལ།།
ལོ་དང་ཟླ་བ་འདི་མྱུར་མོ་མྱུར་མོ།།
ཚིག་གི་ཕྲེང་བ་འདི་ཇེ་མང་ཇེ་མང་།།
ཡིད་ཀྱི་ན་བུན་འདི་ཚིག་ལ་བྲིས་ཀྱང་།།
སྣང་བ་འཁྱག་པོ་འདི་གཞས་སུ་བཀུག་ཀྱང་།།
དྲན་པའི་དྲན་པ་འདི་བརྩེ་བའི་གཏམ་ཡིན།།
དུང་བའི་དུང་བ་འདི་སྙིང་གི་འཛུམ་ཡིན།།
ཚོར་བའི་རྦ་རླབས་འདི་སེམས་སུ་འཕྱུར་ཡང་།།
སྣང་བའི་ཁབ་རྩེ་འདི་སེམས་སུ་ཟུག་ཀྱང་།།
སེམས་ལ་བཞག་པ་འདི་རྨ་ཁ་ཡིན་ཡང་།།
ཉི་མའི་འཛུམ་ཀོང་དེ་སེམས་སུ་བཞད་ཡོང་།།
འདས་སོང་ལོ་ཟླ་ཡི་འཕྲང་ལམ་དེ་ན།།
དྲན་ཤིང་མེ་ཏོག་གི་ལོ་མ་ཐར་ཐོར།།
སྙིང་གི་ཤ་དྲོད་འདི་ཚོར་བར་བྲིས་ན།།
སེམས་པའི་ཕྱི་ནང་འདི་འཁྱག་སིབ་ཨེ་ཡིན།།
བརྩེ་བའི་མེ་ཏོག་དེ་ཁྱེད་ཡིན་ཟེར་ན།།
དྲན་པའི་རི་མོ་དེ་ང་ཡིན་བཤད་ཆོག།
དགའ་བའི་དྲན་པ་དེ་མནའ་ཚིག་བྲིས་ནས།།
བརྩེ་བའི་འདང་བརྩེ་འདི་ཚེ་རིང་ལོ་བརྒྱ།།
གང་ལྟར་དྲན་གདུང་གི་མིག་ཆུའི་བརླན་ཡང་།།
སེམས་པའི་མེ་ལྕེ་འདི་སྐམ་ཐབས་མི་འདུག།
དྲན་པའི་གཞས་ཆུང་འདི་བླངས་ན་མ་བླངས།།
ཁྱེད་དང་འཕྲད་པ་འདི་སྔོན་བསགས་ལས་རེད།།
༼ སྦྲ་སྲས་གངས་བུ་འཛུམ་གྲོལ། ༽