མཚན་མོའི་མཁར་གྲོང་དུ།
སྒྲོན་མེས་རྨི་ལམ་བཏེགས་ཤུལ།
མེ་ལོང་ནང་གི་སྡུག་གུས།
ལང་ཚོ་བཟི་བར་བྱས་སོང་།
དཔྱིད་ཀྱི་རྒྱལ་མོའི་གྲེ་འགྱུར་དུ་ཐོགས་པའི།
རྨི་ལམ་གྱི་གཤིན་ས་རུ་བཞད་པའི།
ཤངས་ཆུའི་རླབས་རྩེར་འཕྱོ་བའི།
ངའི་ཡིད་འོང་གི་སྙིང་གི་ཐེག་ལེའོ།
གྲོང་ཁྱེར་ནས་རྒྱང་རིང་ལ་ཅེར་དུས།
རི་འདབས་ཀྱི་གྲོང་ཚོ་ཆུང་ཆུང་།
ལྷིང་འཇགས་ངང་རྨི་ལམ་དུ་མྱུལ་ཞིང་།
རླུང་བསེར་བུ་ཉི་ཟེར་ལ་ཆིབས་ནས།
ལུག་ཁྱུ་ཐར་ཐོར་དུ་དཀྲོག་རྗེས།
རྨི་ལམ་ནང་གི་བུ་མོའང་གཉིད་ལས་དཀྲོག་སོང་།
མི་འགྱུར་རྡོ་རྗེ་བྲག་ལ།
གཏིང་མཐའ་དཔོག་པའི་མཚན་མོ་རྐོ་དུས།
འོད་ཀྱི་ཅོད་པན། སྙིང་གི་ཐེག་ལེ།
རྒྱ་མཚོ་མེད་པའི་རྒྱ་མཚོའི་སྟེང་།
མྱ་ངམ་ཐང་གི་རྒྱ་མཚོའི་སྟེང་།
ཀོ་གྲུ་ཆུང་ཆུང་། སྙིང་གི་ཐེག་ལེ།
བདག་ལ་བརྩེ་དུང་གི་བདུད་རྩི་གནང་བྱུང་།
མཚན་མོའི་མུ་ཁྱུད་འབྲེལ་བའི་རྨི་ལམ་དུ།
སྒྲོན་མེས་བརྩེ་དུང་བཏེགས་ཤུལ།
ཁྱོད་དང་ང་། རང་ཉིད་ཀྱི་རྒྱལ་མཁར་དུ།
སྐར་མ་རེ་རེར་བགྲང་ཞོར།
མཆུ་དང་མཆུ་སྦྱོར་གྱི་ལས་ལ་འབྲེལ་ཞིང་།
རྨི་ལམ་གྱི་དཀྱིལ་འཁོར་དུ།
བརྩེ་དུང་གི་གཤོག་འདབ་རྒྱས་ནས།
རང་དབང་གིས་འཕུར་འགྲོ
༼ གངས་འཁྱམ་གསར་བུ། ༽