ཚོར་བ་ཚོར་བ་དང་བསྣོལ་ཅིང་།།
ཐ་སྙད་ཐ་སྙད་ལ་འདྲིལ་ཏེ།།
དེ་རིང་སྨྱུག་རྩེ་ཡི་ཕོ་ཉ།།
ནས་འཁུར་བུ་མོ་ལ་ཕྱོགས་འགྲོ།
གངས་དཀར་རི་བོ་ཡི་རང་གཤིས།།
སྙན་འཇེབས་དབྱངས་འགྱུར་ལ་བཀུག་མཁན།།
དྲི་ཟའི་ན་ཆུང་གི་དབུས་ན།།
འཇོ་སྒེག་ཡིད་འོང་གི་གླུ་མ།།
བཞིན་རས་པདྨ་ཡི་འདབ་ལོར།།
བྱམས་རྩེའི་ཉི་ཟེར་གྱིས་བཀྱེས་ཤིང་།།
ཁྲ་ཆུང་དྭངས་གཙང་གི་མིག་ཟུང་།།
ལྷག་བསམ་སྙིང་རྗེ་ཡི་མཚོ་ཆུང་།།
ཤ་ཁྲག་སྙིང་རུས་ཀྱི་ལུས་པོར།།
ཤིང་ཕྲེང་ལྭ་བ་ཡིས་བརྟས་ཤིང་།།
གནག་འཇམ་སྐྲ་ལོ་ཡིས་སྤུད་པའི།།
སེམས་སོང་བག་ཆགས་ཀྱི་མཛངས་མ།།
འཛམ་གླིང་ཡང་རྩེ་ཡི་ཕང་བར།།
སྐྱེ་རྒུའི་ཡ་ཆུང་གི་སྤུ་ལོང་།།
མ་སྐུལ་རང་བཞིན་དུ་གཡོ་མཁན།།
ནས་འཁུར་བུ་མོ་ཡི་སྐད་ངག།
རྒྱུད་དྲུག་ཕང་འགྲོ་ཡི་གདངས་ལ།།
མགྲིན་པའི་ཕོ་ཉ་ཡིས་བཞོན་ཏེ།།
བཅོས་མིན་རང་བྱུང་གི་རོལ་མོ།།
བསམ་བཞིན་ཅི་འདྲ་ཡི་སྙན་པ།།
ཞུ་མོ་བཀུག་བཀུག་གི་ཚིག་ལ།།
མདའ་མོ་གཏོང་གཏོང་གི་གླུ་དྲངས།།
སེམས་ཀྱི་འབེན་ར་ལ་ཟུག་པའི།།
ས་ལའི་སྨན་ལྗོངས་ཀྱི་ཁུ་བྱུག།
དཀར་དཀར་གངས་སེང་གི་འོད་མདངས།།
གློ་སྙིང་བྲང་གསུམ་ལ་འཕྲོས་ཏེ།།
མཛེས་མཛེས་སྒྱུ་རྩལ་གྱི་བུ་མོ།།
རྗེ་བཙུན་སྒྲོལ་མ་ཡི་དཔེ་ལྟར། །
རྣམ་དག་ཚུལ་ཁྲིམས་ཀྱི་སྣུམ་ཞུ།།
བྱམས་བརྩེའི་ཕྱག་ཟུང་གིས་སྤར་ཏེ།།
རླུང་ཚུབ་མུན་ནག་གི་བྲག་ཁུང་།།
བདེ་སྣང་དྲོ་སྐྱིད་ཀྱིས་བཀང་མཁན།།
གངས་རིའི་དབུ་འཕང་ནས་གྲགས་པའི།།
ནས་འཁུར་སྙན་དབྱངས་ཀྱི་བདག་མོའི།།
སྒོ་གསུམ་མཛེས་ཆོས་ལ་དད་པའི།།
སེམས་ཀྱི་སྙན་ངག་ཅིག་ཡིན་ནོ།།
༼ སྲད་འདབ་གསར། ༽