དབྱར་གཞུང་སྣུབ་པའི་དགུན་ཁའི་ཙག་རླུང་གིས།།
རྨི་ལམ་ཆགས་པའི་གཙང་པོ་དར་གྱིས་སྡོམ།།
འཇིག་རྟེན་འོད་སྣང་བོར་བའི་སྨག་ནག་ཁྲོད།།
བསམ་པའི་ནོར་བུ་ལག་པས་རེག་ཐབས་བྲལ།།
ནད་ཀྱིས་མཇིང་བ་བཀུག་པའི་བར་གླགས་ནས།།
དེང་མའི་ས་སྙིགས་རྡོ་སྙིགས་བཤལ་མྱོང་བའི།།
སླར་ཡང་དགོང་སྲོད་དུས་ཀྱི་བྲོ་གཞས་གྲག།
ལྟོས་དང་གཡའ་སྒྲིབ་བོར་བའི་མེ་ལོང་ནང་།།
ལོ་ཆུང་གཞོན་ནུས་ཁྱུ་དང་ཁྱུ་བགྱིས་ནས།།
མི་དགེའི་ཐང་ལ་གཡུང་དྲུང་རི་མོ་ཕབ།།
གདོང་ལ་འཛུམ་ཆུང་དྲོས་པའི་རྡོག་སྒྲ་སྙོམ།།
འཆི་བ་གློ་བུར་ཡིན་པའི་གཞིས་སྒར་ནས།།
སྐྱེ་འཇིག་མེད་པའི་རྡོ་རིང་བསླངས་ནས་ཀྱང་།།
འཁོར་བའི་ཚ་གདུང་སེལ་བར་ཟླ་འོད་སྔོག།
བྱ་བྱེའུ་རྨི་ལམ་བདོ་བའི་ལྷིང་འཇགས་ཁྲོད།
བྲོ་དེ་གཞོན་པས་ཆང་མིག་ཅེར་བ་བཞིན།།
ཤ་དང་རུས་པའི་གསང་མདུད་གྲོལ་བར་བྱེད།།
སེམས་ཀྱི་ངལ་དུད་བརྗེད་པའི་སྟེགས་བུ་ཡིན།།
གཞས་དེ་ཕར་ཚུར་གསེར་ཟམ་དཔྱངས་པ་བཞིན།།
འཇིག་རྟེན་སྐྱ་བོར་དཔྱིད་ཀའི་སྣུམ་ཚོན་བགོ།
ལམ་གྱི་སྨུག་པ་དཀྲོགས་པའི་བསིལ་རླུང་ཡིན།།
ད་ནི་རྟེན་འབྱུང་ལས་ཀྱི་བཀའ་ཆད་ཀྱིས།།
ཕྱིར་ཡོང་མེད་པའི་ལོ་ཟླའི་བཅུད་རུམ་ནས།།
ལྗོན་པའི་ཡལ་གར་བ་མོའི་རེག་བྱ་འཁོར།།
རྒྱང་ནས་རྒྱང་དུ་བཞུད་པར་ཉེར་བསྡོགས་བྱེད།།
ཐེག་པ་དཀའ་བའི་ལྕགས་ཐག་རེ་དྲུད་ནས།།
སྨུག་པས་སྟེང་འོག་བརླན་པའི་གྲམ་འཕྲང་དུ།།
ཕྱི་མིག་རྩེག་བཞིན་ཉམ་ངས་འདུར་གྱིན་འདུག།
༼ གཞི་ཚང་ཟླ་བ་གྲགས་པ། ༽