དུས་ཀྱི་རྐང་རྗེས་དེས་ཅི་ཞིག་བཞག་ནས་སོང་།།
ཚོར་བའི་ཆར་འཇམ་གྱིས་ཞེ་ལ་ཅོ་འདྲི་སློང་།།
རྨི་ལམ་ཁྲ་ཁྲ་ཡི་ལོ་ཟླའི་འགྱུར་བག་ནང་།།
ཐོབ་ཤོར་མི་ཚེ་ཡི་ཡང་སྙིང་ག་ཙམ་མཆིས།།
ཚུར་ལ་ཐོབ་པ་དེ་བྱེ་མའི་འཇའ་ཚོན་རེད།།
ཕར་ལ་ཤོར་བ་དག་ཁོག་གི་ན་ཟུག་རེད།།
གནམ་ངོ་འཁྱག་རེངས་ཀྱི་འཁོར་བའི་མེ་ལོང་ལས།།
ཅི་ཞིག་མཐོང་ན་ཡང་སེམས་ཀྱི་ནད་གཞི་རེད།།
འཁོར་བ་མི་རྟག་པའི་གསུང་དེ་མཇལ་ན་ཡང་།།
ད་རུང་ཞེན་ཆགས་ཀྱི་སྐུད་སྣེ་སྟུང་དུས་མེད།།
འཚོ་བ་སྡུག་བསྔལ་འདི་ཅི་ཙམ་མྱངས་ན་ཡང་།།
ཞེ་རུས་སྣང་བ་འདིས་ཐོངས་བ་མེད་འདི་ཅི།།
གནའ་འདྲིས་ཨ་ཅག་དེ་ད་བར་གང་དུ་ལུས།།
ཞེ་ཡི་ཡིད་གཞུང་དུ་སྨིག་པ་འདྲེས་སམ་ཅི།།
ལན་ཆགས་གྲིབ་གདུང་གི་སྐོམ་པས་གཙེས་སམ་ཅི།།
སྣང་བའི་མདུན་ལྗོངས་སུ་གྲིབ་གཟུགས་མོག་གམ་ཅི།།
ཅུང་ཙམ་འཛུམ་ཚུལ་གྱི་མེ་ལོང་མཐོང་བ་ན།།
ཤ་རུས་དུངས་བ་དག་སྔར་ནས་བཅུས་ཚར་འདུག།
ཡིད་གཞུང་ནམ་མཁའ་རུ་ཚེས་ཙམ་ཤར་ཙམ་དེས།།
དྲན་པའི་རྡུལ་འཚུབ་འདིས་འཇགས་མེད་ཉིན་མཚན་གླེང་།།
ཁྱོད་རང་དགའ་བདེ་ཡི་དྲོད་རེ་འཆར་བ་ན།།
ཡིད་གཞུང་ཟླ་འོད་ཀྱི་འཛུམ་ཆུང་མེ་ཏོག་བཞད།།
ཁྱོད་ཉིད་སྨྲེང་སྐྱོ་ཡི་སྨུག་པ་འཐིབ་ཚུལ་ཞིག།
ཡི་གར་ལྷུང་ཙམ་གྱིས་ལུས་སེམས་སྦྲིད་དེ་ཐལ།།
འཚོ་བའི་མདུན་ལྗོངས་དེ་ཅི་ཙམ་སྨག་ཀྱང་ཆོག།
སྐྱེ་བའི་རྟེན་འབྲེལ་ཉིད་ཇི་ལྟར་འཆར་ཡང་རུང་།།
ཤ་རུས་པགས་འདྲེས་ཀྱི་རྒྱ་མཚོའི་ཟབ་ཚད་དེ།།
ཡིད་ཀྱི་རླུང་བུ་ཡིས་སྐྱོམ་དུས་བསིལ་མོ་རེད།།
དགུན་གྱི་ཉི་འོད་ཀྱི་དྲོད་ཚད་ཞན་པའི་དུས།།
ཁ་བ་མཐུག་ཚད་ཀྱིས་ཡིད་གཞུང་འཁྱག་དུས་སུ།།
ཙག་རླུང་གྲང་ལྷགས་ཀྱི་རེག་བྱ་རྩུབ་དུས་འདིར།།
ཞེ་ཡི་མུན་གྲོང་དུ་ཟླ་འོད་དྲན་པས་བརླན།།
༼ གུ་དཔལ་ཤིས། ༽