ངས་དང་ཐོག་ལྦུ་ཆང་འཐུང་བ་ཡིན།
ལྦུ་ཆང་ལས་ཀྱང་བཟོད་དཀའ་བ་རྣམས།
ཐ་མག་ཤུགས་ཀྱིས་བརྔུབས་པ་ཡིན།
ད་ལྟ། ངའི་གློ་བ་དཀར་མིན་སུས་ཤེས།
ཕལ་ཆེར། དོན་ལྔ་སྣོད་དྲུག་སྦགས་ཤིང་བཙོག་སྲིད།
ཐ་མག་བརྔུབས་པ་ནི།
བསམ་གཞིག་དང་འཐབ་པ་ཡིན།
རང་ཉིད་ལ་བདག་བཟུང་བྱས་པ་ཙམ་ཡིན།
ངས་ད་ལྟ་ཐ་མག་རྔུབ་བཞིན་ཡོད།
བདེ་བ་ཡོད་ཚད་ལ་འདོད་པའི་གཉུག་གཤིས་དང་།
འོད་སྣང་མེད་པའི་ཁང་མིག་དེའི་དོན།
སྒོ་ཕྱེ་ན་རླུང་བུ་འཛུལ་སྲིད། རླུང་བུས་ཁྲིད་འགྲོ་བ་ནི།
ངའི་མཐའ་མཇུག་གི་བརྩེ་འདང་རེད།
ངས་ཐ་མག་བརྔུབས་ཐེངས་རེར།
འཆར་ཡན་དང་སྒྲོ་བཏགས་ལ་དགའ།
བུད་མེད་ཀྱི་ལུས་སུ་འཁྱུད་པའི།
རྒྱལ་སྲས་ཀྱི་ཀེང་རུས་དང་།
རྟ་ཕོ་རྣམས་ལ་ནུབ་ཏུ་མེད་པའི་མིག་ཟུང་བཞད་ཅིང་།
གོ་མཚོན་རྣམས་མཚོ་ལྟར་གཡོ།
ཀི་སྒྲ་རིང་པོས་རྣ་བ་ཡང་དུ་བཀྲུས།
“མགོ་འཕང་མཐོ་དགོས།
མགོ་འཕང་མཐོ་དགོས།”
སྙིང་དང་མགོ་མེད་པའི།
རྣམ་ཤེས་དང་རེག་བྱ་མེད་པའི།
ཐ་མག་ལས་ཁྲག་འཁྲུངས་བྱུང་།
རྒྱལ་སྲས་གསོན་པའི་ཁྲག བུད་མེད་འཆི་བའི་ཁྲག
ངས་ཐ་མག་བརྔུབས་དུས།
འཇིག་རྟེན་མུན་ནག་ཏུ་གྱུར།
འོ། མ་རེད། མིག་ཟུང་ལོང་བས་རེད།
མཐའ་མེད་པའི་མཐར།
འདོད་པ་དང་མཚན་ཉིད་ཀྱི་ཨི་ཁུང་བརྟོལ་བས་རེད།
སེམས་ཀྱི་སྐྲ་ལོ་བསེད་དུས།
ཤིག་ཀྱི་བྲེད་དངངས་ལས།
དུ་བ་བན་བུན་དབུགས་རྒྱུར་འགག
ནམ་འཕང་གཅོད་མཁན། རུས་པ་མེད་པ་དེའོ།།
༼ གངས་འཁྱམ་གསར་བུ། ༽