ལས་རྟེན་འབྲེལ་རི་མོ་ཡལ་མེད་ཅན། །
སེམས་ལྷད་མེད་པདྨའི་མེ་ཏོག་ཅན། །
ཁྱོད་དྲན་ཚུལ་སེམས་ཀྱི་ཉི་ནུབ་ཡིན། །
ཚིག་ཟོལ་མེད་ཡིད་ཀྱི་གཞུང་དྲང་ཡིན། །
དགུན་ཁ་བ་སེམས་ལ་བབས་ཚུལ་ཡིན། །
ཚེ་འདི་ཕྱི་ཁྱེད་ལ་གུས་ཚུལ་ཡིན། །
ལུས་འཁྱག་རླུང་ལྡང་བའི་དུས་ཚིགས་སུ། །
ཁྱོད་དྲན་པ་ལོ་ཟླའི་མིག་ཆུ་རེད། །
མཚོ་དར་དཀར་འདི་ལ་བརྩེ་ཞིག་ཡོད། །
ལས་སྐལ་བ་འདི་ལ་རྒྱུས་ཤིག་ཡོད། །
ལས་དཀར་ནག་འདི་ལ་ལམ་ཞིག་ཡོད། །
སེམས་རྣམ་རྟོག་འདི་ལ་མགུར་ཞིག་ཡོད། །
ཁྱོད་དྲན་པ་སེམས་ཀྱི་ཤར་ནུབ་ཡིན། །
སེམས་མི་འགྱུར་གཡུང་དྲུང་རི་མོ་རེད། །
ལམ་རི་མོ་བཀྲ་ཤིས་རྟགས་བརྒྱད་རེད། །
དབུ་ཐོད་ཀའི་གཉེར་རིས་ཆུང་ཆུང་འདི། །
ཚེ་འདི་ཡི་དབུ་ཁྱུད་ནོག་མེད་ཡིན། །
སྟོན་ཐ་མ་རྫོགས་པའི་སྔ་གཞུག་ནས། །
ཤིང་ལྗོན་པའི་ལོ་འདབ་འཐོར་ཚུལ་འདི། །
སེམས་དགུན་ཁ་ཚེས་པའི་དུས་ཤིག་ཡིན། །
འཛུམ་པད་མ་འདི་ལ་འདང་ཞིག་ཡོད། །
འདང་རི་མོ་སེམས་ནས་ཡལ་མེད་རེད། །
ཉ་གསེར་མིག་འདི་ལ་མཚོ་ཞིག་ཡོད། །
མཚོ་སྔོན་མོ་གཡུ་ཡི་མེ་ལོང་རེད། །
མཚོ་སྔོན་མོ་བཞུར་རྒྱུན་མ་ཆད་ན། །
ལས་སྐལ་བའི་བརྩེ་འགྲམ་ཐོལ་གླུ་འདི། །
ཚེ་གཅིག་གི་དབུ་ཁྱུད་དུམ་རེ་ཡོད། །
༼ ཁམས་པ་རབ་དབྱངས། ༽