དབྱར་སྤང་ལྗོངས་སྟེང་གི་སྦྲང་མ་གཉིས།།
སྐྱིད་མེ་ཏོག་ཐང་ལ་འཛོམས་ནས་ཡོད།།
ཉིན་འདི་ལ་མཉམ་འགྲོ་མཉམ་འདུག་ཀྱང་།།
སྟོན་མགོ་མ་ཚེས་དུས་ཕྱི་ལམ་འགྲིམ།།
མཚོ་སྔོ་ལྗང་འགྲམ་གྱི་ངང་སེར་གཉིས།།
གཡུའི་མེ་ལོང་ཐང་ལ་འཛོམས་ནས་ཡོད།།
དུས་འདི་ལ་མཉམ་འགྲོ་མཉམ་འདུག་ཀྱང་།།
ཟླ་གཞུག་མའི་རྗེས་ནས་ལྷོ་རུ་བཞུད།།
སྡེ་གཡང་ཁྱིམ་སང་གི་ན་ཟླ་གཉིས།།
ལས་སྨོན་ལམ་ཞིང་ལ་འཛོམས་ནས་ཡོད།།
ཚེ་འདི་ལ་མཉམ་འགྲོ་མཉམ་འདུག་ཀྱང་།།
དགྲ་འཆི་བདག་ཐོན་དུས་སོ་སོར་བྲལ།།
ནགས་རྒྱ་རྫོང་དཀྱིལ་གྱི་ཁུ་བྱུག་གཉིས།།
དབྱར་ཟླ་གསུམ་བོད་ལ་འཛོམས་ནས་ཡོད།།
དུས་རེ་ཞིག་མཉམ་འགྲོ་མཉམ་འདུག་ཀྱང་།།
ཡུན་མི་རིང་ལྷོ་མོན་རུང་དུ་ཆས།།
༼ རྣོ་ཟེར། ༽