མཚན་མོར་སྐར་ཚོགས་ཀྱི་ཁ་དོག་ཁྲ་ཁྲ་གྱུར་བའི་ཁྲོད་དུ།
ང་རང་ཧ་ཅང་ལྷིང་འཇགས་ཀྱི་འགྲམ་ངོགས་སུ་གནས་ནས།
ཅི་ཞིག་འབྲི་འདོད་ཀྱི་ཚོར་བ་རྣོན་པོ་ཞིག་གིས།
རང་སེམས་ཀྱང་བཙན་ཁྲིད་བྱེད་འགྲོ་བའི་སྣང་བ་བྱུང་།
དགོང་སྲོད་ཀྱི་གློག་སྒྲོན་འདྲ་མིན་བར་ནས།
མི་ཚོགས་ཀྱིས་འགྲོ་འདུག་རེས་མོ་བྱས་ཏེ་ཡང་ཡང་འཁོར་སྐབས།
ལས་ཀྱི་ལམ་འཕྲང་གི་དཀྱོག་མཚམས་ལ་སུའང་ངེས་པ་མེད་ཀྱང་།
ནང་སེམས་ཀྱི་མེ་ལོང་དྭངས་མོའི་ངོས་སུ།
ལན་ཆགས་ཀྱིས་གནང་བའི་ཚུལ་འཆོས་ཀྱི་ངོ་གདོང་མི་གསལ།
འཆར་ཡན་དང་བསམ་གཞིག་སྣ་ཚོགས་ཀྱི་ཁྲོད་དུ།
སང་ཉིན་ཟེར་བ་འཚོ་བ་མག་མོག་ཞིག་གི་མདུན་བསུས་ནས།
སྲོད་ཀྱི་མཚམས་སྤྲིན་རྒྱང་རིང་དུ་བཞུད་པ་དང་འདྲ་བར།
མི་ཚེའི་རོལ་དབྱངས་དང་ལས་དབང་གི་སྨོན་ལམ་ཡོད་ཚད།
མཐའ་ནས་མཐའ་རུ་དབྱིངས་སུ་འཐིམ་སོང་།
༼ མཱ་ལ་ཏི། ༽