ཕུ་ན་བྲག་དཀར་དགུང་དུ་ཟུག་འདྲ་ལ༎
སྤྲིན་དཀར་བླ་རེ་བྲེས་འདྲ་དལ་གྱིས་འཁྱུད༎
རི་ཕྲན་མང་པོས་གུས་བཞིན་ཡོངས་བསྐོར་བ༎
རི་རྒྱལ་གངས་རི་བཞག་མོ་ངོ་མཚར་ཆེ༎
བར་ན་སིདྡྷིའི་མཚོ་སོགས་ཡོན་ཆབ་བདུན༎
བྱ་རྒོད་དུང་ཆུའི་རི་སོགས་ལྷ་བཤོས་བདུན༎
ནོར་བུ་ཐང་སོགས་རིན་ཆེན་རིགས་ཀྱི་དབྱིབས༎
མ་བསྒྲིགས་ངང་གིས་འགྲིག་རྣམས་ངོ་མཚར་ཆེ༎
གཡས་ན་དར་འབུམ་དུང་རི་སེང་གེ་དཀར༎
གཡོན་ན་རི་མཐོན་རི་རྒྱུད་རྒྱ་སྟག་དམར༎
སྟག་སེང་ཁ་སྤྲོད་འཛོམས་པའི་ལྟས་བཟང་པོ༎
གཟུགས་འཛིན་ལམ་དུ་མངོན་པ་ངོ་མཚར་ཆེ༎
མདའ་ན་དྭངས་ཤིང་བསིལ་བའི་ལྷ་ཡི་ཆབ༎
ཆེ་ཆུང་རིགས་གཉིས་ལྷན་འདུས་བྱུང་བ་སྟེ༎
གཡུ་འབྲུག་མ་བུ་འཛོམས་པའི་རྟེན་འབྱུང་གིས༎
གནས་དེ་མཛེས་པར་སྤྲས་པ་ངོ་མཚར་ཆེ༎
ལོགས་ན་དུང་དཀར་གདུགས་མཆོག་གསེར་གྱི་ཉ༎
རྒྱལ་མཚན་དཔལ་བེའུ་འཁོར་ལོ་བུམ་པ་བཟང་༎
ཡིད་འོང་པདྨ་ལ་སོགས་ལེགས་འཛོམས་རྣམས༎
བཟོ་མཁས་པིར་ལས་ཐོན་འདྲ་ངོ་མཚར་ཆེ༎
མདུན་ན་གླང་པོ་རིན་ཆེན་གྱེན་འགྲོ་ཡིས༎
སྣ་ལྗགས་བཀུགས་ཏེ་བདུད་རྩིའི་ཆུ་འཐུང་ལ༎
གཅིག་རྗེས་གཉིས་མཐུད་རིམ་གྱིས་གཤར་འདྲ་རྣམས༎
སློབ་མས་ཤེས་ཡོན་གཉེར་བཞིན་ངོ་མཚར་ཆེ༎
ཤར་ན་སྲིད་པ་གསལ་བའི་སྒྲོན་མེ་དང་༎
ལྷོ་ན་མི་མཐུན་བསང་བའི་ལྷ་ཤིང་ལྗོན༎
ནུབ་ན་སྙན་དབྱངས་སྒྲོག་པའི་ནེ་ཙོ་གསུམ༎
རང་བྱུང་གཟུགས་སུ་གྲུབ་པ་ངོ་མཚར་ཆེ༎
ས་ན་སྲུང་བཞི་སྐྱོན་གྱིས་མ་གོས་ཤིང་༎
ས་ཡི་ཀ་བཞི་ལ་སོགས་ལེགས་ཚང་བས༎
ས་མཁན་དགྱེས་པའི་འཛུམ་བག་རྒོད་པའི་ཡུལ༎
ས་མཆོག་ར་བ་དཀར་མོ་ངོ་མཚར་ཆེ༎
༼ ཚེ་རིང་རྣམ་རྒྱལ། ༽