སེམས་ཀྱི་ཟབ་སར་འཁྱིལ་བའི་དྲོད་ཁོལ་དེ་ཇེ་གཉོམ།།

ཤ་རུས་གསེང་ལ་གནས་པའི་ཚོར་ཤེས་དེ་ཇེ་གཏིབས།།

ཅི་ཡང་མི་ཚོར་འཚོ་བའི་གཏིང་རིམ་དེ་མྱོང་ན།།

ལས་ཀྱིས་བཅད་པའི་འུ་གཉིས་བར་ཐག་དེ་ལོས་ཡིན།།

ཕྱི་ལ་འཁྲེང་སེམས་རྒོད་པའི་ངལ་དུབ་དེ་ཇེ་རྒྱས།།

རེ་སྨོན་ཐང་ལ་བཏབ་པའི་ངང་ཚུལ་དེ་ཇེ་སྡུག།

ཡོད་ཚད་རླུང་ལ་བསྐུར་བའི་ཡུལ་ཁམས་དེ་རིག་ན།།

འུ་གཉིས་ཁ་ཁར་གྱེས་པའི་བར་ཐག་དེ་ལོས་ཡིན།།

སྨོན་སེམས་རི་ལ་ཤོར་བའི་ཞེ་སྨྲེང་དེ་ཇེ་བརྟས།།

ངལ་བ་སྡེ་ལ་བཏང་བའི་ཞེད་སྣང་དེ་ཇེ་རྒོད།།

སྔངས་སྐྲག་ཀློང་ན་འཕྱན་པའི་སྣང་ཚུལ་དེ་མངོན་ན།།

ཁྱོད་དང་འུ་གཉིས་ཡོལ་བའི་བར་ཐག་དེ་ལོས་ཡིན།།

ཟོལ་སྦྱོར་གཤའ་མ་མཐོང་བའི་སྣང་ཚུལ་དེ་ཇེ་ཞན།།

ལྡོག་འཆར་འཕྲུལ་རྩལ་མངོན་པའི་ཁ་དོག་དེ་ཇེ་ཆེ།།

གཡོ་འཕྲུལ་དག་མ་རྟོགས་པའི་ཚོར་ཤེས་དེ་ཤེས་ན།།

བར་ཐག་དེ་ཡིས་བསླངས་པའི་ན་ཟུག་དེ་ལོས་ཡིན།།

བསམ་གཞིག་སྟོང་གིས་དེད་པའི་ལོ་ཟླ་དེ་ཇེ་རིང་།།

དྲན་ཤེས་དམར་པོས་གཙེས་པའི་ཉིན་ཞག་དེ་ཇེ་མང་།།

ལོ་ཟླའི་འཁོར་སྐྱོད་བར་གྱི་བཞུད་སྟངས་དེ་བརྒྱུད་ན།།

འགྱོད་སེམས་ཤིན་ཏུ་རྒོད་སའི་བར་ཐག་དེ་ལོས་ཡིན།།

གླེང་སློང་ཚ་རླབས་འཕྱུར་བའི་ཉིན་ཞག་དེ་ཇེ་བདོ།།

ཡིད་འཁེལ་རྩ་ནས་དབེན་པའི་འཆར་སྣང་དེ་ཇེ་གསལ།།

སུན་སྣང་དམར་བོས་སྐྱོམ་པའི་ཆ་བྱད་དེ་མཐོང་ན།།

བར་ཐག་དེ་ཡིས་དྲན་སེམས་སྐྱོམ་པ་དེ་ལོས་ཡིན།།

ཐོས་འཛིན་རྒྱང་ལ་ཀེར་བའི་ངང་ཚུལ་དེ་ཇེ་སྐྱོ།།

སྣང་དོགས་ཁམས་ལ་འགྱུ་བའི་ཞེན་སྣང་དེ་ཇེ་རྒོད།།

ཡིད་འཇགས་ཞེ་ནས་བྲལ་བའི་ཁ་དོག་དེ་མངོན་ན།།

སྣང་ཡུལ་བརྟན་བརླིང་དབེན་པའི་བར་ཐག་དེ་ལོས་ཡིན།།

ཞེ་སེམས་ཁོ་བོར་འཕྱན་པའི་དྲན་ཤེས་དེ་ཇེ་བརྟས།།

རྟོག་འགྱུ་ལྷོག་ལྷོག་འཕྱུར་བའི་སྣང་ཚུལ་དེ་ཇེ་ཚོར།།

བློ་ཡུལ་རབ་རིབ་སྣང་བའི་ཚོར་ཤེས་དེ་མྱོང་ན།།

རི་ཆུ་སྟོང་གིས་བཅད་པའི་བར་ཐག་དེ་ལོས་ཡིན།།

མིག་ཟུང་རྒྱང་ལ་ཀེར་བཞིན་སྣ་གླུ་དེ་ཇེ་འཐུ།།

ལག་གཡས་ཐོད་ལ་བཞག་པའི་ངང་སྒུག་དེ་ཇེ་ཟབ།།

སྣང་ཞེན་ཁམས་ན་རྩེན་པའི་ཚོར་བ་དེ་རྒོད་ན།།

དྲན་གདུང་འཇིངས་སུ་དེད་པ་བར་ཐག་དེ་ལོས་ཡིན།།

༼ ཙ་ཡུས་བཟོད་པ།༽