ཨེ་གྲོགས་པོ་ལགས།
བདག་ལ་གཞས་ཤིག་ལེན་རོགས།
ནང་དོན་མི་གོ་བའི་གཞས་
ཤིག་ལེན་རོགས།
དེ་ནི་ངའི་ཚེ་རབས་ཀྱི་དུས་
ཚོད་བར་ནས།
ཆེས་སྙན་པའི་གཞས་དེ་ཡིན།
ཨེ་གྲོགས་པ་ལགས།
བསིལ་རླུང་ལྡང་བྱུང་།
སེམས་པ་འཁྱག་སིབ་སིབ་
ཏུ་འགྱུར་བཞིན།
ཡིན་ཡང་ཚོར་བའི་གྲེ་བ་
འགག་མེད་ན།
ནང་དོན་མི་གོ་བའི་གཞས་
ཤིག་ལེན་རོགས།
ཨེ་གྲོགས་པོ་ལགས།
ས་རུབ་མའི་མཚན་སྨག་འདི་དག་ནི།
འུ་ཚོའི་མི་ཚེ་འགྱུར་བཞིན་
ཡོད་པའི་དཔང་རྟགས་རེད།
དེ་བས་མི་ཚེ་རྒས་སོང་ཞེས་པའི་
གླུ་ཞིག་ལེན་རོགས།
ཨེ་གྲོགས་པོ་ལགས།
ད་ནས་སྟོན་ཟླ་གཞུག་མ་ཡོལ་སོང་།
དགུན་ཟླ་དང་པོ་ཚེས་ནས་བདུན་
ཕྲག་འགའ་ལས་རེད་མེད།
ཡིན་ཡང་ཆོས་ཉིད་ཀྱི་དབང་གིས་
ཞེ་ལ་སྨྲེང་བ་གདུས་སོང་།
ཨེ་སྙིང་ཐུབ་ལགས།
དུང་སེམས་ཀྱི་ལག་གདང་
སྦྲེལ་འདོད་ན།
ཐོག་མར་ནང་དོན་མི་གོ་བའི་
གཞས་ཤིག་ལེན་རོགས།
དེ་ནི་ང་ཡི་སེམས་ཉིད་ཀྱི་
སྒེའུ་ཁུང་ཕྱེས་པའི་
ལྡེ་མིག་ཡིན།
ཨེ་ཉེ་བོ་དག
ཚོར་མ་ཐུབ་པའི་རྨི་ལམ་
མང་པོ་ཞིག་
ལྷག་ཡོད་ན་འང་།
མི་ཚེ་འདི་མཐའ་ཡས་པའི་
རྩྭ་ཐང་ཞིག་གམ།
ཡང་ན་རྟག་བརྟན་གྱི་ཕྱེ་
ལེབ་ཅིག་ཏུ་
བརླམས་ཏེ།
རི་གྲོང་གི་འདུ་འཛིའི་བར་ནས་ནང་
དོན་མེད་པའི་གཞས་རེ་གཏོང་དང་།
༼ ལྡེའུ་ནག ༽