ལག་གིས་ཟིན་པར་མི་གྱུར་ཀྱང་། །
ཚིག་གི་མདངས་ལ་བཅུད་ཕྱུང་སྟེ། །
ཨེ་མ་བརྩེ་དགའི་ཕོ་བྲང་ནང་། །
གཟུགས་མི་མཐོང་བའི་ཟླ་བ་བྲིས། །
ཟླ་བ་དེ་ནི་ཁྱོད་དང་མཚུངས། །
ཁྱོད་རང་ཟླ་བའི་འོབས་སུ་སྦས། །
ངག་གི་དྲིལ་ཆུང་སྒྲོག་པའི་དབུས། །
ཟུར་ཙམ་ཁྱོད་ཀྱི་ཆ་ཤས་བཤད། །
སྲོད་ལ་འཕྲིན་པའི་ཤོག་བྱ་བཏང་། །
ལོ་ཡི་འཁོར་མོ་གྲངས་ལས་འདས། །
དེ་ལྟར་མི་ཚེའི་ཕྲེང་ཐག་ཀུན། །
འཛད་དུ་འཇུག་པར་མི་འདོད་པས། །
རྟོག་པའི་སྐྱེད་ཚལ་སྤུང་བའི་ཁྲོད། །
མཛེས་ཉམས་བརྒྱ་ཡིས་མེ་ཏོག་བཀད། །
རྡུལ་མཚོན་འདྲེས་མའི་ཕོ་བྲང་ནང་། །
ཚེ་རབས་གཅིག་གི་ལས་ལྷ་ཤར། །
ཤར་བའི་ལྷ་དེ་ལྷ་མོའི་གཟུགས། །
ཅུང་ཙམ་ཁྲོ་ལ་མཛེས་ཉམས་ལྡན། །
གཡས་ནས་བལྟས་ན་བཞད་པ་འདྲ། །
གཡོན་ནས་བལྟས་ན་ཁྲོས་པ་འདྲ། །
དབུས་ནས་བལྟས་ན་ཡིད་གར་འོང་། །
གང་ལྟར་ཉམས་ལྡན་ཁྱོད་འདྲ་བ། །
མི་ཚེ་གཅིག་གི་བྱུང་རིམ་ཡིན། །
ལས་དབང་གཅིག་གི་རྗེས་འགྲོ་ཡིན། །
སྐར་ཚོགས་མོད་པའི་མཚན་གཞུང་དུ། །
ཚིག་གི་ཉོན་མང་འཁྲུག་པའི་ནང་། །
དབྱངས་ཀྱི་སྲེད་པ་ལན་གཅིག་གིས། །
བཟོད་ཐབས་མེད་པའི་འཁུན་སྒྲ་ཞིག །
དབང་མེད་ངང་གིས་གྲོལ་ཐལ་ལོ། །
༼ ལྡེའུ་ནག ༽