ཐུགས་རྗེའི་དུད་སྤྲིན་འཁྲིགས་པའི་གཟི་བྱིན་ཅན།།
ཡིད་འོང་འཇོ་སྒེག་འཁུར་བའི་ཆོ་ག་མཁན།།
མཚོ་འཁྲུངས་ངང་བའི་བུ་མོ་གང་དེ་ཡིས།།
སྙན་ཚིག་དྲི་ཟའི་དབྱངས་ཀྱི་དཔྱིད་སྩོལ་ཅིག།
མི་ཚེའི་གོ་རིམ་གཙང་པོའི་རླབས་རིས་བཞིན།།
མི་རྟག་དུས་ཀྱིས་ཀུ་ཅོ་འཐེན་པའི་ཁྲོད།།
ད་ལྟའི་འཚོ་བར་གྱེས་བརྡ་གཏོང་བཞིན་དུ།།
ཚེ་ཡི་ཐ་མ་གང་ཡིན་སུ་ཡིས་རྟོགས།།
དཔྱིད་རླུང་འཇམ་པོས་ལུས་ཀྱི་སྤུ་ལོང་བསྒུལ།།
རྒྱ་མཚོའི་ངོས་སུ་ཟླ་བའི་ལང་ཚོ་འཕོས།།
དྲ་ཡོལ་རླུང་གིས་བསྐྱོད་པའི་གཙང་འགྲམ་ནས།།
སླར་ཡང་སྙན་ངག་བྲི་པའི་མདུན་པ་སྐྱེས།།
རྣམ་འབྱོར་ཉམས་ཀྱིས་མྱོས་པའི་དོ་ཧ་འཐེན།།
ལིས་པེ་ཆང་གིས་བཟི་བའི་སྙན་ངག་གྱེར།།
ཁོ་བོས་རྒྱལ་ཁམས་ཉུལ་བའི་ངང་ཚུལ་གྱིས།།
ཚོར་རྟོག་སྒྱུ་མའི་བྱིས་སྒྲུང་ཅིའི་མི་འབྲི།།
ཆུ་གཉེར་གཡོ་བའི་རླབས་རིས་བཞུར་བའི་ཁྲོད།།
མཚན་མོའི་མཛེས་སྡུག་འཕོག་པའི་ནུབ་མཐའ་ནས།།
འདས་པའི་གཏམ་རྒྱུད་འཁུར་བའི་སྙན་ངག་གིས།།
ཁེར་རྐྱང་བུ་ཡི་རྣམ་ཤེས་ཡོམ་ཡོམ་བསྒུལ།།
རྟོག་འགྱུའི་རླབས་སྒྲ་དཀྲོལ་བའི་རྣམ་འགྱུར་གྱིས།།
ཚོར་བའི་ཁྲག་གིས་མྱོས་པའི་སྙན་ངག་མཁན།།
མཚན་མོའི་དགུ་ཚིགས་དབུས་ཀྱི་ཟླ་འོད་ལ།།
ཡང་ཡང་འཁྲེང་བའི་ངང་ཚུལ་ལྷག་པར་གསལ།།
ན་ཆུང་སེམས་འདི་བྱ་སྤུ་ཡང་མོ་བཞིན།།
སེམས་བྱུང་རྒན་པོས་གང་སར་ཁྲིད་པའི་རྗེས།།
སྐྲ་ཡི་ལན་བུ་སྐྱོད་པའི་བཞིན་བཟང་མས།།
ཡིད་ཀྱི་བླ་སྲོག་དབང་མེད་འཁྱམས་པར་བྱས།།
གཞོན་ནུའི་ལང་ཚོ་ཁེར་རྐྱང་རླུང་གིས་ཁུར།།
ཚེ་ཡི་མཛའ་གྲོགས་རྨི་ལམ་གྲོང་ནས་བོར།།
གཏན་གྱི་ལམ་སྣེ་ནམ་མཁའི་ལྷ་ལ་བཅོལ།།
ད་དུང་ཞེན་པའི་མིག་ཟུང་སུ་ལ་འཕེན།།
སྣ་ཚོགས་སྒྱུ་མའི་ཤོག་བྱ་ཁྲ་ཁྲ་ཞིག།
རེ་དོགས་དཔྱིད་རླུང་འཚུབ་པའི་གསེབ་ནས་མངོན།།
ཐུན་བཞིའི་ཏིང་འཛིན་སྐྱོང་བའི་བསམ་གཏན་པ།།
སྨིག་རྒྱུའི་ཡོལ་བ་དཀྲིས་པའི་རི་ལ་བྲོས།།
འཁོར་བའི་ན་བུན་ལྡང་བའི་གཙང་བོ་རུ།།
ཚོགས་དྲུག་ཟས་ཀྱི་ཟོལ་བག་འཛུམ་པ་ན།།
ཡིད་ཀྱི་ཉ་མོ་གང་འདོད་རྩེན་པའི་གར།།
ལན་གཅིག་སྒེག་མོའི་དཔལ་ལ་ཕྱོགས་དགོས་བྱུང་།།
ལང་ཚོའི་རྒྱ་ལྕང་ལྡེམ་པའི་འཇོ་སྒེག་མཁན།།
ཡིད་ཀྱི་སྙིང་ཤ་འཕྲོག་པའི་ཆོམ་རྐུན་མ།།
དྲན་པ་སྨྱུག་རྩེར་སྐྱོམ་པའི་སྙན་ངག་པས།།
ཚིག་དང་ཐ་སྙད་སྡེབ་པའི་བརྗོད་བྱ་ཉིད།།
ཚོར་བའི་ཉ་མོ་འཛིན་པའི་བུ་ཆུང་གིས།།
མི་ཆོས་གླུ་རུ་ལེན་པའི་ངང་ཚུལ་དེ།།
ནུབ་མཐའི་རྒྱ་མཚོ་གཡོ་བའི་འགྲམ་ངོགས་ནས།།
ཁེར་རྐྱང་རྣམ་ཤེས་གསོ་བའི་གྲོགས་སུ་བླངས།།
༼ ཁམས་སྨྱུག་གསར། ༽