ལོ་ཟླའི་འཁོར་ཕྱོགས་ཆུ་བོ་བཞུད་པ་འདྲ་ཟེར།།
འདི་ནས་མར་ལ་བཞུད་ཀྱང་ཡར་ཡོང་མི་འདུག།
འདི་ནི་དངོས་པོ་ཞིག་གི་གཤིས་ལུགས་ཡིན་ཙང་།།
བདག་གིས་ཤོར་ཟིན་དེ་ལ་ཡར་ཡོང་མེད་ཟེར།།
འདས་པའི་ལོ་ཟླ་དེ་དག་ཕྱིར་ལྡོག་མི་འདུག།
ད་ནི་རྒས་ཉམས་སྣ་ཚོགས་དོད་པར་མཐོང་སོང་།།
ཤར་རི་རྩེ་ཡི་ཕུགས་བསམ་ཟླ་བ་དཀར་པོ།།
བདག་གི་གམ་ནས་ཕར་ཕར་ནུབ་པ་ཚོར་བས།།
ལེ་ལོ་མུན་པ་འདི་ལ་སངས་པ་མེད་དམ།།
ཡིད་ཀྱི་ཁུར་པོ་འདི་ལ་འབོགས་ཐབས་མེད་དམ།།
རྣམ་རྟོག་དྲན་འཁྲུལ་དུ་མ་རྒྱབ་ཏུ་གཡུགས་ནས།།
ཕུགས་ཀྱི་ལམ་ཆེན་གཅིག་ལ་དེད་ནས་སོང་ཡང་།།
འབད་པ་ཁབ་མིག་ལྟ་བུ་ཧ་ཅང་ཆུང་བས།།
དམིགས་ཡུལ་རི་བོ་འདྲ་ཞིག་ཚུད་རབས་མི་འདུག།
ད་ནི་འདི་ནས་འདུག་གམ་ད་དུང་འགྲོ་དགོས།།
ལོ་ཟླ་ཐོགས་མེད་ཡིན་པས་འཛིན་ཐབས་མི་འདུག།
ཚེ་ཡི་ཕྱེད་ཀ་རྫོགས་པའི་ཚེ་མཇུག་འདི་ནས།།
མི་ལུས་དོན་མེད་ཡིན་པའི་འཁུན་སྒྲ་གྲགས་བྱུང་།།
སེམས་ཀྱི་དམ་ཚིག་འབྲུ་རྡོག་སྤར་གང་འདི་ཡང་།།
འདི་ལྟར་རེ་རེ་བྱས་ནས་འཛད་དགོས་རེད་དམ།།
༼ ཞགས་པ། ༽