མི་ཚོགས་ཡར་འགྲོ་མར་འགྲོ་འཚང་ཁ་རྒྱག།
བར་སྐོར་ཡང་སྐོར་བསྐྱར་སྐོར་མཚན་ཡང་འདའ།།
འུ་གཉིས་ཡང་ཐུག་སླར་འཕྲད་སེམས་ཀྱང་འདྲེས།།
དབུས་ཀྱི་ཇོ་བོའི་མདུན་ནས་ཕྱག་ཀྱང་འཚལ།།
ལག་པ་ཕར་ཇུས་ཚུར་བསྡམས་རྒྱང་སྐོར་བརྒྱབ།།
མིག་ཟུང་ཕར་ཤོར་ཚུར་འཆོར་སྐད་ཆ་བསྙད།།
ཟག་ཕུང་ལྷན་བཅར་མཉམ་གནས་དྲོད་ཀྱང་རྒྱས།།
ཉི་མ་ལྷ་སའི་གླིང་ནས་སྨོན་ལམ་བཏབ།།
ཆང་དམ་ཕར་གཏུགས་ཚུར་གཏུགས་ལྦུ་བ་འཕྱོ།།
མགོ་བོ་ཕར་གླན་ཚུར་གླན་སྐྲ་ཡང་བསྲེས།།
མཆུ་བིམ་འཇིབ་རེས་ནུ་རེས་ཁོག་ཀྱང་མཐུན།།
བྲོ་ཁང་དམར་བོའི་དཀྱིལ་ནས་ཤུགས་ཀྱང་འཆོར།།
ཚོར་བ་གཅིག་རྗེས་གཉིས་མཐུད་ཨིན་ཡང་འབྱིན།།
སྐེ་ལ་མཆུ་སོ་བཏབ་པས་རྨ་ཡང་བཟོས།།
རུས་ཀྱི་ཁུ་ཁྲག་འདྲེས་པས་ལུས་ཀྱང་གསོས།།
གངས་ཀྱི་མེ་ཏོག་མགྲོན་བྲང་རྔུལ་ཆུས་སྦངས།།
ཞེ་ལ་ཞལ་ངོ་ཉེ་བས་ཞེ་ཡང་མཐུན།།
སེམས་ལ་ཉི་ཟེར་འཕྲོས་པས་སེམས་ཀྱང་དྲོ།།
སྙིང་ལ་ཟླ་བ་ཚེས་པས་འོད་ཀྱང་འཁྱུགས།།
སྐྱིད་ཆུ་གྲོག་མོའི་མཚོ་ལ་ཟམ་ཡང་བཟོས།།
སྟེས་དང་སྟབས་ཀྱིས་གྱེས་ཁའི་བརྡ་ཡང་བཞག།
ཡིད་ཀྱི་གདུང་བས་སེམས་ཀྱི་ལྟེང་ཀ་འཕྲོག།
འུ་གཉིས་ཕར་དྲན་ཚུར་དྲན་འཕྲིན་པ་བཏང་།།
ལྷོ་ཡི་ཞལ་གསུང་འཇོལ་མོས་རོགས་ཀྱང་བྱས།།
གངས་ཀྱི་སེང་གེ་དཀར་མོས་སྤྱན་ཡང་ཤོར།།
ནགས་ཀྱི་དམར་ཡག་སྟག་གི་ཡིད་ཀྱང་ཆགས།།
ཡུལ་གྱི་ན་ཟླའི་སེམས་ཀྱི་སྨོན་ཡང་འཆོར།།
བརྩེ་དུངས་མི་འགྱུར་རྡོ་རྗེ་ཞེས་ཀྱང་འབོད།།
༼ གནུབས་རྒྱལ་མཚན། ༽