དེ་ཡང་སྤྱིར་ཁམས་ཀྱི་ས་ཆ་ལ་ཆུ་བཞི། སྒང་དྲུག ཤོད་ཆེན་བཅོ་བརྒྱད་སོགས་ཀྱི་བཤད་པ་བྱུང་བ་ལས་འདིར་ཤོད་ཆེན་བཅོ་བརྒྱད་སྐོར་ཞིག་ཞུ་བ་ཡིན། དེ་ཡང་ཤོད་ཅེས་པའི་དོན་རོང་ངམ་ལུང་གཤོང་དུ་གོ་བ་ནི་ཁང་པའི་ཐོག་ཤོད་དང་། རི་བོའི་ཀླུང་ཤོད་ལྟ་བུས་ཤེས་ཐུབ་ལ་དེ་ལྟ་བུའི་ཤོད་ཆེན་པོ་བཅོ་བརྒྱད་འདི་དག་གང་དང་གང་ཞིག་ཡིན་པའི་སྐོར་ལ་མཁས་རྣམས་ཀྱི་བཞེད་ཚུལ་དུ་མ་ཞིག་ཡོད་པར་ངེས་ཀྱང་འདིར་རང་གི་མཇལ་ཚོད་ཙམ་ཞིག་དཔྱད་གཞིར་བཀོད་པ་ལ།མེས་པོའི་བྱུང་བ་ཞེས་པའི་དེབ་ལས། 1.ནགས་ཤོད། འབྲི་རུ་རྫོང་ཁོངས་ཀྱི་ས་ཆ་ཕལ་ཆེ་བ། 2. སོག་ཤོད། སོག་གཡག་ལའི་ཁུལ། 3.དཀར་ཤོད། སོག་རྫོང་ཁོངས། 4.རེ་ཤོད། སོག་རྫོང་ཁོངས། 5.རྒྱ་ཤོད། སྟོད་འབྲི་རུ་དང་སྨད་དཔལ་འབར། 6.ས་ཤོད། དཔལ་འབར་རྫོང་ཁོངས། 7. དཔའ་ཤོད། དཔལ་འབར་རྫོང་ཁོངས། 8.རྒྱང་ཤོད། སྟེང་ཆེན་རྫོང་ཁོངས། 9. གྱིམ་ཤོད། སྟེང་ཆེན་རྫོང་ཁོངས། 10. རྟ་ཤོད། སྟེང་ཆེན་རྫོངས་ཁོངས། 11.གཡི་ཤོད་དམ་གཡང་ཤོད་ནི་རི་བོ་ཆེའི་རྫོང་ཁོངས། 12.དངུལ་ཤོད། ལྷོ་རོང་རྫོང་ཁོངས། 13.རྔོད་ཤོད། མཛོ་སྒང་རྫོང་ཁོངས། 14. ཟླ་ཤོད། ཆབ་མདོ་རྫོང་ཁོངས། 15. ངོམས་ཤོད། ཆབ་མདོ་རྫོང་ཁོངས། 16.རྨེ་ཤོད། སྡེ་དགེ་རྫོང་ཁོངས། 17.སྨར་ཤོད། གོ་འཇོ་རྫོང་ཁོངས། 18. ཀྲེ་ཤོད། དཀར་མཛེས་རྫོང་ཁོངས། ཞེས་པ་གསལ། ཤོད་ཆེན་བཅོ་བརྒྱད་གྲངས་འདྲེན་ཙམ་འདྲ་ཡང་གྲངས་སོ་སོར་བགྲང་ཚེ་འདྲ་དང་མི་འདྲ་བ་འགའ་ཞིག་འདུག་ཅིང་། གཙོ་བོ་ད་སྐབས་ས་ཆ་གང་ཞིག་ལ་ཡོད་པའི་ངོས་འཛིན་མཛད་པ་ནི་ཅུང་གོ་སླ་བ་འདུག།

（ རྩོམ་སྒྲིག་པས་འཚོལ་སྡུད་བྱས།）