༡ ཁྱོད་ཀྱིས་མི་སུ་ཞིག་ལ་གནོད་པ་ཅི་བྱས་ན་ཡང་།ཕུགས་ལ་གཞིགས་ནས་བཤད་ན། གནོད་པ་དེ་རང་ཉིད་ལ་ཐེབས་ངེས། གཅིག་བྱས་ན། ད་སྐབས་ཁྱོད་ལ་ཚོར་སྣང་མེད་ན་ཐང་མོད། འོན་ཀྱང་། དེ་ངེས་པར་དུ་རང་ཐོག་ལ་འཁོར་ཡོང་། ཁྱོད་ཀྱིས་གཞན་ལ་ཅི་ཞིག་བསྒྲུབས་ན་ཡང་རང་ཉིད་ལ་བྱས་པ་ཡིན་ལ། གཞན་ལ་ཅི་ཞིག་མྱོང་དུ་བཅུག་ན་ཡང་ནམ་ཞིག་ན་རང་ཉིད་ཀྱིས་མྱོང་དགོས། འདི་ནི་མཁས་པ་རིམ་བྱོན་གྱི་ཞལ་གདམ་ཡིན།
༢ ནང་ཆོས་སྦྱངས་ན། རྒ་འཆིར་གདོང་ལེན་བྱེད་མི་དགོས་པ་མིན་ལ། དེ་ལས་ལྡོག་སྟེ། ནང་ཆོས་སུ་སྐྱེ་རྒ་ན་འཆི་ཧ་ཅང་གསལ་བོར་གསུངས་ཡོད། འོན་ཏེ། དེས་ཁྱོད་ལ་སྐྲག་སློང་བ་མ་ཡིན་པར་སེམས་དགེ་བས་ཚེ་སྲོག་མ་གཞི་ནས་མི་རྟག་ཅེས་གསལ་འདེབས་བྱེད་ཀྱིན་ཡོད་པ་རེད། གནད་དོན་འདི་ངེས་ན་མི་རྟག་པར་གདོང་གཏུག་པ་དང་བློ་ཡུལ་ལས་འདས་པའི་གནོད་འཚེ་ཅི་འདྲ་ཐེབས་ཀྱང་། སེམས་ཁམས་རྩ་བ་ནས་མི་འདྲ་བ་རེད།
༣ ཆུ་རྐྱལ་མ་ཤེས་ན་རྫིང་བུ་ག་ཚོད་བརྗེས་ཀྱང་མི་ཕན་པ་བཞིན། བྱ་བར་རྨོངས་པ་དག་ལ་ལས་དོན་ག་ཚོད་བརྗེས་ཀྱང་མི་ཕན་ལ། སྒོམ་སྒྲུབ་མི་ཤེས་པ་དག་ལ་སྒོམ་གནས་ག་ཚོད་བརྗེས་ཀྱང་ཕན་མི་ཐོགས།
༤ སེམས་དགེ་ན་བྱས་ཚད་ཚང་མར་ཕན་ཡོན་ལྡན་ལ། སེམས་སྡིག་ན་བྱས་པ་ཐམས་ཅད་མི་དགེ་བར་འགྱུར་ཏེ།དཔེར་ན། ཤིང་སྡོང་ཞིག་གི་རྩ་བ་དུག་ཡིན་ན་དེའི་ལོ་མ་དང་མེ་ཏོག་ཚང་མ་དུག་ཏུ་འགྱུར་བ་དང་། གལ་ཏེ་རྩ་བ་སྨན་ཡིན་ན་དེའི་ལོ་མ་དང་མེ་ཏོག་ཚང་མ་སྨན་དུ་འགྱུར་བ་ལྟར་རོ།།
༥ མི་མང་པོ་ཞིག་གིས་ཕ་མའི་དྲིན་ལན་འཇལ་བའི་ཆེད་དུ་རང་སྲོག་ལ་མི་འཛེམ་པར་སྒོར་མོ་རྙེད་ཐབས་བྱེད་ཅིང་། ཕ་མ་རྣམས་ཀྱིས་ཚེ་མཇུག་ཏུ་འཚོ་བ་སྐྱིད་པོ་ཞིག་རོལ་ཐུབ་པར་སྨོན་པ་རེད། དོན་དམ་པར། སྲི་ཞུ་སྒྲུབ་པ་ནི་ཕ་མ་རྣམས་ཟས་གོས་ལ་སེམས་ཁྲལ་མི་དགོས་ཤིང་བདེ་སྐྱིད་ཚད་མེད་རོལ་དུ་འཇུག་པ་ཁོ་ན་མ་ཡིན་པར། དེ་ལས་ཀྱང་གལ་ཆེ་བ་ནི་ཁོང་ཚོའི་འཆི་བའི་འཇིགས་སྣང་སེལ་ཐབས་བྱེད་པ་དེ་ཡིན།
༦ དད་པ་ཅན་ལ་ཕྱི་རོལ་གྱི་བཅའ་ཁྲིམས་ལས་ནང་སེམས་ཀྱི་འདུལ་བ་ཡིས་གོ་ཆོད་ཅིང་། དད་པ་མེད་མཁན་དག་ལ་ནམ་རྒྱུན་བྱ་བའི་ཚད་ཐིག་བྲལ་བས། ཁེ་ཕན་ཤིན་ཏུ་ཕྲ་མོའི་ཆེད་དུ་ཡང་སྡིག་ལས་སྣ་ཚོགས་བྱེད་པ་རེད།
༧བདེ་སྡུག་སོགས་འདས་ཟིན་པའི་ཚོར་སྣང་ཡོད་ཚད་ཆུ་ནང་གི་རླབས་རིས་བཞིན་ཡལ་བར་གྱུར་ཟིན་པས། ཕྱིར་དྲན་བྱེད་པར་དགོས་པ་གང་ཡང་མེད། མྱོང་ཟིན་པའི་དཀའ་སྡུག་གམ་ཡང་ན་བརྗིད་ཆགས་ཀྱི་ཁྲོད་དུ་ལུས་པ་ནི་ཏན་ཏན་དུས་ཚོད་ཆུད་ཟོས་སུ་གཏོང་བའོ།།
（བསོད་དར་རྒྱས་ཀྱིས་བྲིས།）