ལྷོ་བཞུད་ཆུ་འཛིན་དཀར་པོ།།
ཁྱོད་རང་མཐོང་བའི་རྗེས་ལ།།
ལྷ་གཅིག་དབྱངས་ཅན་དྲན་ཏེ།།
སྙན་ངག་མེ་ཏོག་འགུལ་སོང་།།
མཚོ་ནང་པདྨའི་གདན་ལ།།
རྒྱུད་མངས་དཀྲོལ་གྱིན་བཞུགས་པའི།།
ཚངས་སྲས་ངག་གི་དཔལ་མོ།།
ཡིད་ཀྱི་གཏིང་ལ་བཞུགས་རོགས།།
ཆར་ཞོད་འཇགས་པའི་མཚམས་སུ།།
ཉི་འོད་གཉོམ་པོ་ཤར་བྱུང་།།
ནང་སེམས་དབྱར་གྱི་རླུང་བུ།།
ན་ཆུང་བུ་མོར་ཕྱོགས་སོང་།།
སྒྲོ་ལྡན་རྨ་བྱ་གཞོན་ནུས།།
སྐྱིད་པའི་སྤང་ལྗོངས་སྟེང་ནས།།
སྒྲོ་གུར་མཛེས་པོ་ཕུབ་རུང་།།
ཡིད་སེམས་དེ་ལ་མ་ཤོར།།
ཕུ་ཆུའི་ངོགས་སུ་རྒྱུ་བའི།།
རྐང་དྲུག་སྦྲང་མ་འདྲ་བའི།།
སེམས་པ་རླུང་གི་རྟ་ཅན།།
ཁྱོད་ཀྱི་ཕྱོགས་ལ་ཤོར་ན།།
དོགས་པའི་ཆང་རག་མ་འཐུང་།།
ཁྱོད་རང་ཁྱོད་རང་ཟེར་བ།།
མི་ཞིག་ཡིན་པ་འདྲ་འམ།།
ཁྱོད་དང་བུ་མོ་འདོགས་ས།།
སྙན་ངག་ཁོ་ན་ཡིན་པས།།
ཁྱོད་རང་འཁྲུལ་དུ་མ་འཇུག།
སྤྱིལ་བའི་སྒེའུ་ཁུང་འགྲམ་གྱི།།
རྒྱ་སེའི་མེ་ཏོག་དམར་པོ།།
ཁྱོད་ལ་རླུང་གིས་སྒུལ་དུས།།
ང་རང་ལོག་དགོས་བྱུང་སོང་།།
༼ ཐོར་བུ། ༽