（པར་ངོས་དང་པོར་མཐུད།） ལི་ཁེ་ཆང་གིས་ཚོགས་ཆེན་གཙོ་སྐྱོང་གནང་། ལི་ཀྲན་ཧྲུའུ་དང་། ཝང་དབྱང་། ཝང་ཧུའུ་ཉིང་། ཀྲའོ་ལེ་ཅི། ཝང་ཆི་ཧྲན་ཚོགས་འདུར་ཞུགས། ཧན་ཀྲེང་གིས་གཟེངས་བསྟོད་གཏན་འབེབས་སྒྲོག་སྦྱངས་གནང་བ་རེད།

ཆུ་ཚོད10དང་སྐར་མ30ལ་ཚོགས་ཆེན་འགོ་ཚུགས་ཤིང་། ཚང་མ་ཡར་ལངས་ནས་སྐད་གསང་མཐོན་པོས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་བླངས་པ་རེད།

དགའ་སྤྲོ་འཁོལ་བའི་རོལ་དབྱངས་ཀྱི་ཁྲོད་དུ་ཞི་ཅིན་ཕིང་སོགས་ཀྱིས་གཟེངས་བསྟོད་ཐོབ་མཁན་མི་སྒེར་དང་ཐུན་མོང་ཚོགས་པའི་འཐུས་མིར་བྱ་དགའ་གནང་བ་རེད།

ཚོགས་ར་ཡོངས་ནས་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་ཡང་ཡང་གྲགས་པའི་ཁྲོད་དུ་ཞི་ཅིན་ཕིང་གིས་གསུང་བཤད་གལ་ཆེན་གནང་བ་རེད།

ཞི་ཅིན་ཕིང་གིས་གྲུབ་འབྲས་ནི་འབད་འཐབ་བྱས་པ་ལས་བྱུང་བ་དང་རྒྱལ་ཁ་ནི་ལས་སླ་པོར་ཐོབ་པ་ཞིག་གཏན་ནས་མིན་པ་རེད། དུས་ཡུན་ལོ7གྱི་སྤྱིར་བཏང་མིན་པའི་གྲ་སྒྲིག་བྱས་པའི་བརྒྱུད་རིམ་ལ་ཕྱིར་མིག་ལྟ་སྐབས། ང་ཚོར་འབད་འཐབ་བྱེད་རིང་གྲུབ་འབྲས་ཐོབ་ནས་སྤྲོ་སྣང་འཕེལ་བ་དང་འབད་འཐབ་བྱེད་རིང་བསམ་པའི་རྒྱུ་ནོར་ཕུན་སུམ་ཚོགས་པོ་ཐོབ་པར་མ་ཟད། ད་དུང་ཤིན་ཏུ་རྩ་ཆེ་བའི་ཉམས་མྱོང་ཡང་བསགས་ཡོད། དེ་དག་ནི་ང་ཚོས་གཅེས་འཛིན་ལྡབ་འགྱུར་དང་དར་རྒྱས་གོང་འཕེལ་གཏོང་རིན་ཡོད་པ་ཤ་སྟག་རེད། དེས་ན་ངེས་པར་དུ་ཏང་གི་གཅིག་སྡུད་གཅིག་གྱུར་གྱི་འགོ་ཁྲིད་མཐའ་འཁྱོངས་བྱ་དགོས་ཤིང་། ཀྲུང་གོ་གུང་ཁྲན་ཏང་ནི་ང་ཚོས་རླབས་ཆེན་བྱ་གཞག་གཏོད་པར་བློས་འཁེལ་ཤོས་ཀྱི་སྲོག་ཤིང་ཡིན་པར་བརྟེན། ཐོག་མཐའ་བར་གསུམ་དུ་ཏང་གི་འགོ་ཁྲིད་མཐའ་འཁྱོངས་བྱས་ན། མདུན་དུ་སྐྱོད་པའི་ལམ་བུའི་ཐོག་གི་དཀའ་ཉེན་མཐའ་དག་ལས་རྣམ་པར་རྒྱལ་ཐུབ་ངེས་དང་། ང་ཚོས་སྒྲུབ་འདོད་པའི་བྱ་བ་གང་ཞིག་ཡིན་ཡང་ཚང་མ་སྒྲུབ་ཐུབ་ངེས་རེད། ངེས་པར་དུ་སྟོབས་ཤུགས་གཅིག་ཏུ་བསྡུས་ནས་དོན་ཆེན་བསྒྲུབ་རྒྱུ་མཐའ་འཁྱོངས་བྱ་དགོས་ཤིང་། རང་རྒྱལ་སྤྱི་ཚོགས་རིང་ལུགས་ལམ་ལུགས་ཀྱི་སྤྱིར་བཏང་མིན་པའི་སྒྲིག་འཛུགས་སྐུལ་སློང་བྱེད་ནུས་དང་སྤྱི་འདོམས་མཐུན་སྦྱོར་བྱེད་ནུས། ལག་ལེན་མཐར་ཕྱིན་བསྟར་ནུས། དེ་བཞིན་རང་རྒྱལ་གྱི་སྲ་ཞིང་བརྟན་པའི་དཔལ་འབྱོར་དངོས་ཤུགས་དང་ཚན་རྩལ་དངོས་ཤུགས། ཕྱོགས་བསྡུས་རྒྱལ་སྟོབས་བཅས་ཀྱིས་ཨོ་རྩལ་འགྲན་ཚོགས་གྲུབ་འབྲས་ཐོན་པའི་ངང་གཉེར་བར་གདིང་ཤུགས་ཆེ་ཤོས་དང་འགན་སྲུང་བརྟན་ཤོས་བྱས་ཡོད། ངེས་པར་དུ་ཉེན་ཁ་དང་འགྲན་སློང་སྣ་ཚོགས་ལ་རང་འགུལ་ངང་འགོག་ཟོན་བྱ་རྒྱུ་དང་ཁ་གཏད་གཅོག་རྒྱུ་མཐའ་འཁྱོངས་བྱ་དགོས་ཤིང་། མཐའ་ཚད་ཀྱི་བསམ་བློ་གཏོང་རྒྱུ་དང་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱེད་པ་དང་། སེམས་ཁྲལ་གྱི་འདུ་ཤེས་ཟབ་ཏུ་གཏོང་བ། ཉེན་ཁ་དང་འགྲན་སློང་འགོག་སེལ་བྱ་རྒྱུ་དེ་མངོན་གསལ་དོད་པའི་གནས་བབ་ཐོག་འཇོག་པ་བཅས་བྱས་ཏེ། སྔོན་ལ་བྱ་སྤྱོད་ཡག་པོ་སྤེལ་ནས་རང་འགུལ་དམག་འཐབ་ཡག་པོ་བརྒྱག་དགོས། ངེས་པར་དུ་འགྲན་བསྡུར་གཉེར་བ་དང་། མི་དམངས་ལ་ཞབས་འདེགས་ཞུ་བ། འཕེལ་རྒྱས་ལ་སྐུལ་མ་གཏོང་བ་བཅས་ཟུང་འབྲེལ་བྱ་རྒྱུ་མཐའ་འཁྱོངས་དང་། དགུན་དུས་ཨོ་རྩལ་འགྲན་ཚོགས་ཀྱི་གྲུབ་འབྲས་མི་དམངས་ཀྱིས་མཉམ་དུ་སྤྱོད་རྒྱུ་མཐའ་འཁྱོངས་བྱས་ཏེ་མི་དམངས་ཀྱི་ལུས་སེམས་དེ་བས་བདེ་ཐང་དང་། ལས་ཞུགས་དེ་བས་གང་ལེགས། འཚོ་བ་དེ་བས་མཛེས་སྡུག་ལྡན་པ་བཅས་བྱས་ནས་ཐུན་མོང་ཐོག་ཞུགས་ཐུབ་པ་དང་། ཐུན་མོང་ཐོག་ནུས་ཤུགས་ཡོད་རྒུ་འདོན་ཐུབ་པ། ཐུན་མོང་ཐོག་ལོངས་སྤྱོད་ཐུབ་པ་བཅས་བྱ་དགོས་ཞེས་ནན་གསུང་གནང་བ་རེད།

ཚོགས་འདུ་མ་འཚོག་གོང་ཞི་ཅིན་ཕིང་སོགས་འགོ་ཁྲིད་བློ་མཐུན་གྱིས་པེ་ཅིང་དགུན་དུས་ཨོ་རྩལ་འགྲན་ཚོགས་དང་དབང་པོ་སྐྱོན་ཅན་གྱི་དགུན་དུས་ཨོ་རྩལ་འགྲན་ཚོགས་རིང་ལེགས་སྐྱེས་མངོན་གསལ་དོད་པོ་འཕུལ་མཁན་དང་ཐུན་མོང་གི་འཐུས་མི་དང་། ལེགས་སྐྱེས་མངོན་གསལ་དོད་པོ་འབུལ་མཁན་གྱི་མི་སྒེར། ཀྲུང་གོའི་ལུས་རྩལ་འཐུས་མི་ཚོགས་པའི་ཁོངས་མི་བཅས་ལ་བྱམས་བརྩེའི་ངང་མཇལ་འཕྲད་གནང་བར་མ་ཟད། ད་དུང་ཚང་མ་དང་ལྷན་དུ་དྲན་རྟེན་སྐུ་པར་བསྐྱོན་པ་རེད།（ མི་དམངས་དྲ་བ་ནས་དྲངས།）