སྨུག་སྤྲིན་ལང་ལོང་འོག་གི །
ཆར་པ་ཟམ་ཟིམ་ཁྲོད་ཀྱི །
གཟི་མདངས་རབ་ཏུ་རྒྱས་པ།།
ཤོམ་ལྭ་ལྗང་གུ་གསོལ་བ།།
ཟིལ་པ་མགུལ་རྒྱན་བྱས་པ།།
དྲི་བཞོན་ཕྱོགས་ནས་ལྡང་བས།།
མཆུ་སྒྲོས་འདབ་མ་གཡོ་བ།།
ཁྲ་ཆུང་ཟེའུ་འབྲུ་ལྡེམ་ལྡེམ།།
རི་ཆུ་ནགས་གསུམ་སྒང་ནས།།
འཆོར་སྒེག་ཉམས་ཀྱིས་འགྱིང་པ།།
ས་འཛིན་དབང་པོའི་སྲས་མོ།།
ཞབས་སུ་བཅགས་པ་ཡིན་ན།།
མི་དགྱེས་སུ་ཞིག་ཡོད་དེ།།
དབྱར་གསུམ་བཞུགས་པའི་རིང་ལ།།
བཀུར་བསྟི་སུས་ཀྱང་བྱེད་དོ།།
སེམས་ཐག་ཉེ་བར་གཅར་གཅར།།
བར་སྣང་ཤོང་ཚད་མ་རེད།།
མིག་གི་མཚོ་མོ་འཁྱིལ་འཁྱིལ།།
འཇིན་རྟེན་ཆུ་ཡིས་བསྣུབ་འགྲོ །
ལྷ་དང་ལྷ་མོས་མཐོང་བས།།
རང་ཉིད་སྐྱེངས་པར་གྱུར་ཏེ།།
རྒྱང་རིང་ཕྱོགས་སུ་བྲོས་སོང་།།
སྐྱེ་དངོས་ཁག་དང་ཁག་ཅིག །
དེ་ལ་མ་རངས་བྱུང་བས།།
ཡང་ཡང་འགྲན་པའི་ཟོལ་གྱིས།།
གར་སྟབས་སྣ་ཚོགས་བསྒྱུར་བས།།
དབྱར་ཁ་མཛེས་སྡུག་ལྡན་ནོ།།
༼ འོད་ཟེར་དགུ་བ། ༽