རྡུལ་གྱིས་བཟས་པའི་མེ་
ལོང་ས་རུ་འཐིམ། །
རི་གཟར་གཙང་པོ་དྲན་པའི་
ཁུད་དུ་ལུས། །
སྐྱོ་གདུང་སྨུག་སྤྲིན་མནབས་པའི་
རི་བོ་ལགས། །
ཅི་ཞིག་བོར་བའི་སྨྲེང་བ་
ཁོག་ཏུ་གསང་། །
རླུང་གིས་ཁུར་བའི་རྩྭ་ལོ་རེ་རེ་ཡང་། །
མི་མཐོང་ལ་མོ་སྟོང་གི་ཕ་རོལ་ན། །
ལས་ཀྱི་ནགས་ཀློང་འཁྲིས་སུ་
རང་རང་གིས། །
འཛད་མཐའ་མེད་པའི་ཟློས་
གར་འབྲི་བར་བྲེལ། །
མཚོ་ལ་ཟགས་པའི་ཟླ་གཟུགས་ཡུན་
གྱིས་འགུལ། །
དྲན་པར་ཐོགས་པའི་རླུང་བུ་
བསྐྱར་དུ་ལྡང་། །
ཚོར་བའི་གཏིང་ན་གཡོ་བའི་
གཙང་བོ་ལགས། །
སེམས་ཀྱི་གྲུ་ཆུང་ཕ་མཐར་
མི་སྐྱེལ་རོགས། །
སྲོད་ཀའི་མཚམས་སྤྲིན་རྒྱང་
རིང་ཡུལ་དུ་གྱེས། །
བྱ་ཚོགས་དག་ཀྱང་འཕུར་
ནས་ཕྱོགས་བཞིར་བརྟོལ། །
སྨྲ་བ་མེད་པའི་གཙང་འགྲམ་
སྡོང་བོ་དག །
སུ་ཞིག་དྲན་པའི་སེམས་
གཅོང་བྲང་ཁར་སྦས། །
གནམ་སས་བཅད་པའི་ནུབ་
ཁའི་སྐར་ཕྲན་དག །
མུན་པའི་སྲུབ་ན་འདར་ཞིང་
བདག་སར་ཕྱོགས། །
སེམས་ཀྱི་འདང་ལ་བརྐོས་པའི་
རི་མོའི་ཚོགས། །
ཁོ་བོའི་རྨི་ལམ་གཞུང་ལ་
ཡུན་གྱིས་འབབ། །
དབྱར་ཁ་སླེབས་ཀྱང་ཆར་
ཟིལ་མཐོང་མ་བྱུང་། །
ཁུ་བྱུག་གྲགས་ཀྱང་ཁ་བ་སྔར་
བཞིན་ལྷུང་། །
སྒུག་སྒུག་སྐྲ་ལོ་འཐོར་བའི་
མཁར་རྫོང་ན། །
མཆི་མའི་རྦ་རླབས་སྐྱོམ་པ་
ཚོར་རམ་ཅི། །
མུ་མེད་ཁྲི་ཕྲག་གཙང་པོའི་ཕ་
རོལ་ན། །
སྣང་བའི་རི་ཚོགས་ཉུལ་
བའི་བྱ་རྒོད་ཅིག །
སྐྱེ་བ་བརྒྱ་ལ་བཏབ་པའི་
དམ་ཚིག་དེས། །
ཁོ་བོའི་དྲན་པའི་གཤོག་སྣེར་
ཡང་ཡང་ཐོགས། །
སྒེའུ་ཁུང་འགྲམ་ན་རྒྱུ་བའི་
བསིལ་རླུང་གིས། །
ང་ཡི་རྨི་ལམ་ཡང་དང་བསྐྱར་དུ་ཀློག །
རི་དེའི་མཐོ་སར་ལྷུང་བའི་ཁ་བ་དག །
ག་ལེར་བདག་གི་སྣང་བའི་
ཟབ་སར་བྱོ། །
རྒྱང་སྐྱོད་སྤྲིན་པ་ཐར་ཐོར་
ལྷོ་རུ་འཕུར། །
ཁྲུང་ཁྲུང་དག་ཀྱང་དེ་ཡི་
རྗེས་སུ་བསྙེགས། །
ལེ་དབར་སྟོང་ཕྲག་དུ་མའི་ཕ་རོལ་ཀྱི། །
ཁྱེད་ཉིད་ཁོ་ན་དྲན་པའི་ཡུལ་དུ་ལྕི། །
བྱེ་མའི་རི་ལ་བཏབ་པའི་
རྐང་རྗེས་དག །
རྒས་ཀྱང་འཆི་བ་མེད་པའི་
ལོ་ཟླ་ཉིད། །
ལས་ཀྱི་གྲིབ་སོ་དབྱིངས་
སུ་མ་ཡལ་བར། །
དྲན་པའི་སྒོ་གླེགས་ནམ་
དུ་ཟིམ་པ་བྲལ། །
ཉི་མའི་མཁར་ལ་མུན་
པའི་གྲིབ་སོ་ལྷུང་། །
ཡར་ཀླུང་གཙང་པོ་སྐྱོ་བའི་
ཉམས་ཀྱིས་བཞུར། །
རླུང་བུ་སྔར་བཞིན་ལྡང་བའི་
བྱང་ཐང་ལགས། །
རྨི་ལམ་གཞུང་གི་དབྱར་ཁ་
འཆར་སྲིད་དམ། །
ལྗོན་སྡོང་གསེབ་ནས་ལོ་
མ་སིལ་བུར་འཐོར། །
ཁུ་སིམ་མཚན་མོ་རོལ་དབྱངས་
ཁོ་ནས་བསྐྱལ། །
ལོ་ཟླའི་ཞེན་ཆགས་འཁུར་བའི་
སྒྲོན་ངོགས་ནས། །
རྫོགས་མཐའ་མེད་པའི་སྙན་
ངག་བྲིས་ཤིང་བཀླགས། །
༼ གངས་དབྱངས་སོན། ༽