ཇ་ལོ་སྦང་པའི་དྲི་ཞིམ་ཁང་པར་ཁྱབ། །
སྨུག་རླབས་ཐན་ཐུན་རི་ལུང་ཀུན་ནས་ལྡང་། །
གངས་རྡུལ་ཕྲ་མོའི་མཛའ་བརྩེ་རི་ལ་ཕབ། །
དགུན་གཞུང་རིང་མོའི་མཚན་མོ་སྔར་ལས་གྲང་། །
དྲྭ་མིག་འགྲམ་ནས་གཅིག་པུས་སྙན་ཚིག་བཀླགས། །
ཚོར་བའི་མཐའ་རུ་དགའ་སྐྱོ་འདྲེས་མ་འཐུལ། །
དྲིལ་ཆུང་དཀྲོལ་བའི་སིལ་སྒྲ་རླུང་གིས་འཁྱེར། །
ཚེས་ཟླ་འཚེར་བའི་དགུ་ཚིགས་གྲོགས་སུ་བཀུག །
ངེས་མེད་ཕྱོགས་སུ་རྒྱུ་བའི་ཡུལ་གྱར་བ། །
ད་ཆ་གློ་བུར་སླེབས་པའི་ངང་ཚུལ་བཞིན། །
གནམ་འོག་འདི་ནས་གྲོགས་མེད་བདག་གཅིག་པུས། །
སྙན་ཚིག་དྲི་ཟའི་རྒྱུད་མངས་དཀྲོལ་ལ་བྲེལ། །
འོན་ཏེ་ཁོ་བོའི་རང་གཤིས་བརླན་པོ་ཡིས། །
སྙིང་ཐུབ་བྱམས་པའི་གྲོགས་ཤིག་མ་མཆིས་པས། །
བཅོས་མིན་ཡུན་རིང་སྦས་པའི་སེམས་གཏམ་དག །
ལྷུག་པོར་བརྗོད་ཀྱང་སུ་ཡིས་ཐོས་པར་གྲང་། །
༼ ཁམས་སྨྱུག་གསར། ༽