སྤྱི་ཟླ9པའི་ཚེས15ཉིན་ཞིང་ཆེན་ཏང་ཨུའི་ཧྲུའུ་ཅི་ཝང་ཞའོ་ཧུའེ་ཡིས་ཞིང་ཆེན་ཏང་ཨུའི་སྤྱི་ཟླ9པའི་ཚེས5ཉིན་ལྕགས་ཟམ་ཁར་བྱུང་བའི་ས་འགུལ་གྱི་འགུལ་འགོག་གནོད་སྐྱོབ་ལས་དོན་གྱི་ཆེད་དོན་ཚོགས་འདུ་འཚོགས་ནས་བར་བརྒལ་བཀོད་སྒྲིག་དང་གནོད་འཚེ་ཐེབས་རྗེས་ཀྱི་ཉམས་གསོ་བསྐྱར་སྐྲུན་སོགས་ཀྱི་ལས་དོན་ལ་ཞིབ་འཇུག་དང་ཇུས་འགོད་གནང་བ་རེད།

ཝང་ཞའོ་ཧུའེ་ཡིས་མིག་སྔར་འགུལ་འགོག་གནོད་སྐྱོབ་ཀྱི་ལས་དོན་བར་བརྒལ་བཀོད་སྒྲིག་དང་གནོད་འཚེ་ཐེབས་ཀྱི་གསོ་བསྐྱར་སྐྲུན་གྱི་དུས་རིམ་གསར་པར་སླེབས་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་ཙུང་ལི་ལི་ཁེ་ཆང་སོགས་ཀྲུང་དབྱང་གི་མགོ་ཁྲིད་བློ་མཐུན་གྱི་མཆན་བཀོད་མཛུབ་སྟོན་གྱི་བླང་བྱ་ལག་བསྟར་ནན་ཏན་བྱས་ཏེ་ཡུལ་བབ་དང་བསྟུན་ཞིང་ཚན་རིག་དང་མཐུན་པར་བསྐྱར་སྐྲུན་བྱ་རྒྱུ་རྒྱུན་འཁྱོངས་དང་།མི་གཙོ་བོར་འཛིན་རྒྱུ་དང་དམངས་འཚོ་སྔོན་དུ་འཇོག་རྒྱུ་རྒྱུན་འཁྱོངས།སྐྱེ་ཁམས་སྲུང་སྐྱོང་དང་འབྱུང་འཕྲོད་འཕེལ་རྒྱས་གཏང་རྒྱུ་རྒྱུན་འཁྱོངས།གསར་གཏོད་ལམ་སྲོལ་རྒྱུན་འཁྱོངས་དང་འགན་སྲུང་བྱེད་ཤུགས་ཆེ་རུ་བཏང་ནས་སེམས་ཤུགས་གཅིག་སྒྲིལ་གྱིས་བདེ་སྐྱིད་མཛེས་སྡུག་གི་ཁྱིམ་གཞིས་གསར་པ་བསྐྱར་སྐྲུན་བྱས་ཏེ་གནོད་འཚེ་ཐེབས་ཡུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ཆུ་ཚད་སྤྱི་ཡོངས་ནས་མཐོ་རུ་གཏང་དགོས་ཞེས་ནན་གསུང་གནང་བ་རེད།

ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཞིང་དཔོན་ཧོང་ཆང་ཚོགས་འདུར་ཕེབས་ནས་གསུང་བཤད་གནང་བ་རེད།

ཚོགས་འདུའི་ཐོག་སྤྱི་ཟླ9པའི་ཚེས5ཉིན་བྱུང་བའི་ས་འགུལ་ཁྲོད་དུ་ཉེན་སེལ་རོགས་སྐྱོབ་དང་ས་འགུལ་གྱི་གནོད་འཚེའི་གནོད་འཚེ་དཔྱད་དཔོག་བྱས་པའི་འཕེལ་རིམ།གནོད་འཚེ་ཐེབས་རྗེས་ཀྱི་ཉམས་གསོ་བསྐྱར་སྐྲུན་ལས་དོན་བཅས་ཀྱི་སྤྱི་ཡོངས་ཀྱི་བསམ་གཞིག་དང་ཕྱིན་ཆད་ཀྱི་བཀོད་སྒྲིག་སྙན་སེང་ཞུས་པར་ཉན་འཇོག་བྱས་མཐར། ཉེན་སེལ་རོགས་སྐྱོབ་ལས་དོན་ལ་ཁས་ལེན་གང་ལེགས་བྱས་པ་རེད། སི་ཁྲོན་ལ་རྒྱབ་སྐྱོར་ཤུགས་ཆེན་དང་གཞན་ཕན་ལྷག་བསམ་བཅངས་ནས་རོགས་སྐྱོར་བྱེད་དུ་འོང་མཁན་གྱི་ཀྲུང་དབྱང་དང་རྒྱལ་ཁབ་ལས་ཁུངས་ཀྱི་སྡེ་ཚན་ཁག་དང་།སྤུན་ཟླའི་ཞིང་ཆེན།（རང་སྐྱོང་ལྗོངས་དང་གྲོང་ཁྱེར）དེ་བཞིན་དུ་སྤྱི་ཚོགས་ལས་རིགས་ཁག་དང་ཕྱོགས་སོ་སོར་སྙིང་ཐག་པ་ནས་ཐུགས་རྗེ་ཆེ་ཞུས་པ་རེད།

ཚོགས་འདུའི་ཐོག་བསྟན་དོན། ད་ཐེངས་ལྕགས་ཟམ་ཁ་ལ་བྱུང་བའི་ས་འགུལ་གནོད་འཚེ་ཐེབས་ཡུལ་གྱི་ས་གཤིས་ཁྱད་ཆོས་དང་སྐྱེ་ཁམས་ཆགས་ས།དཔལ་འབྱོར་དང་དམངས་འཚོ།རིག་གནས་ས་ཁམས་བཅས་དམིགས་བསལ་ཡིན་པར་བརྟེན།བར་བརྒལ་བཀོད་སྒྲིག་དང་གནོད་འཚེ་ཐེབས་རྗེས་ཀྱི་བསྐྱར་སྐྲུན་ལས་དོན་ལ་དེ་བས་དཀའ་སྤྱད་འབད་བརྩོན་བྱ་དགོས་ཀྱི་ཡོད། ཞིང་ཆེན་ཡོངས་ཀྱི་གོང་འོག་དང་ལྷག་པར་དུ་གནོད་འཚེ་ཐེབས་པའི་གྲོང་ཁྱེར（ཁུལ）དང་རྫོང་གིས་གྲོང་ཡུལ་གྱི་སྡོད་ཁང་བསྐྱར་སྐྲུན་དང་།སྤྱི་པའི་ཞབས་ཞུའི་བསྐྱར་སྐྲུན།རྨང་གཞིའི་སྒྲིག་བཀོད་བསྐྱར་སྐྲུན།ས་གཤིས་གནོད་འཚེ་འགོག་བཅོས།མཛེས་ལྗོངས་ཁུལ་སླར་གསོ།སྐྱེ་ཁམས་ཉམས་གསོ།ཐོན་ལས་འཕེལ་རྒྱས་སོགས་ཀྱི་གཙོ་གནད་ལས་དོན་སྤྱི་འདོམས་ཀྱིས་དམ་འཛིན་ཡག་པོ་བྱས་ཏེ་གནོད་འཚེ་ཐེབས་ཁུལ་གྱི་རྒྱུན་གཏན་གྱི་ཐོན་སྐྱེད་དང་འཚོ་བའི་གོ་རིམ་ཅི་མགྱོགས་གང་མགྱོགས་ཀྱིས་སླར་གསོ་བྱས་ནས་གནོད་འཚེ་ཐེབས་ཁུལ་འདི་ཉིད་དུས་རབས་གསར་པའི་མི་རིགས་ས་ཁུལ་གྱི་འཕེལ་རྒྱས་སྤུས་ཚད་མཐོ་བའི་དཔེ་མཚོན་ཞིག་ཏུ་འཛུགས་སྐྲུན་བྱེད་གང་ཐུབ་བྱ་དགོས།

ཚོགས་འདུའི་ཐོག་བསྟན་དོན།མང་ཚོགས་བར་བརྒལ་བཀོད་སྒྲིག་ཡག་པོ་བྱ་དགོས། གནོད་འཚེ་ཐེབས་ཡུལ་འདི་མཐོ་སྒང་དུ་ཆགས་པ་དང་ དགུན་དུས་སུ་གྲང་ངར་ཆེ་བར་བབསམ་གཞིག་བྱས་ཏེ་གཉེན་ཉེར་བརྟེན་པ་དང་ཁང་པ་གླས་པ་སོགས་ཀྱི་བྱེད་ཐབས་ཅི་གང་ཐུབ་སྤྱད་ནས་གནོད་འཚེ་ཐེབས་པའི་མང་ཚོགས་བཀོད་སྒྲིག་བྱ་དགོས། གཅིག་སྡུད་ཀྱིས་བཀོད་སྒྲིག་བྱེད་པར“ཉེན་གཡོལ་གསུམ”གྱི་རྩ་དོན་རྒྱུན་འཁྱོངས་ནས་བཀོད་སྒྲིག་བྱ་ཡུལ་བདམས་ཏེ་ཉེན་མེད་ཡོང་བརར་འགན་ལེན་བྱེད་པའི་སྔོན་འགྲོའི་ཆ་རྐྱེན་འོག་འཛུགས་སྐྲུན་གྱི་འཕེལ་རིམ་ཇེ་མགྱོགས་སུ་གཏོང་བ་དང་སྡེ་ཁུལ་གྱི་དོ་དམ་ནང་འཇོག་པ། ཞབས་ཞུ་དང་ལེ་ལག་ཚང་སྒྲིག་བྱས་ནས་གནོད་འཚེ་ཐེབས་པའི་མང་ཚོགས་སེམས་འཇགས་ནས་སྡོད་ཆོག་པ་དང་ཉེན་ཁ་མེད་སྡོད་ཆོག་པར་འགན་ལེན་བྱ་དགོས། གནོད་འཚེ་ཐེབས་པའི་མང་ཚོགས་ཀྱི་གཞི་རྩའི་འཚོ་བ་ཐབས་བརྒྱ་ཇུས་སྟོང་གིས་འགན་སྲུང་བྱེད་པ་དང་གྲང་འགོག་དྲོད་སྲུང་གི་དངོས་ཟོག་མཁོ་སྤྲོད་བྱེད་ཤུགས་ཆེ་རུ་བཏང་ནས་གནོད་འཚེ་ཐེབས་པའི་མང་ཚོགས་བདེ་དྲོད་ངང་དགུན་བརྒལ་ཐུབ་པར་འགན་ལེན་བྱ་དགོས། རིམ་པ་ཁག་དང་རིགས་སྣ་ཚོགས་ཀྱི་གནོད་སེལ་མ་དངུལ་བེད་སྤྱོད་ཡག་པོ་བྱས་ནས་མ་དངུལ་གྱི་བརྒྱུད་རིམ་ཧྲིལ་པོར་ལྟ་སྐུལ་དོ་དམ་བྱེད་ཤུགས་ཆེ་རུ་གཏང་དགོས། （ པར་ངོས་གཉིས་པར་གཟིགས།）