ལྷ་ས་ལགས། གོ་ཐོས་སུ།

ཁྱེད་ཀྱི་གཡའ་དག་པའི་ནམ་མཁར་སྤྲིན་

ནག་འཁྲིགས་འདུག་ཟེར།

ཁྱེད་ཀྱི་རྡུལ་དྭངས་པའི་ས་གཞིར་ཐན་པ་

འཁོར་འདུག་ཟེར།

སྐྱིད་ཆུ་རིང་མོ་ཡང་མྱ་ངན་གྱིས་བཞུར་གྱིན་

འདུག་ཟེར།

དོ་ནུབ།

བདག་གིས་རི་སུལ་འདི་ནས་ཁྱེད་རང་དྲན།

འཚང་ག་ཤིག་ཤིག་གི་བར་སྐོར་ནང་གི་མི་ཚོགས་

དེ་དག་དྲན།

མི་ཚོགས་དེ་དག་གི་དད་མོས་དང་ཡིད་ཆེས་ཀྱི་

རྡོག་སྒྲ་ཐྲིག་ཐྲིག་དེ་དྲན།

ད་དུང་། ཉི་ཟླ་ཟུང་འཇུག་གི་འོད་ཟེར་

ངོས་ཀྱི་པོ་ཏ་ལ་དྲན།

པོ་ཏ་ལའི་འོད་ཟེར་ལམ་ལམ་གྱི་རྒྱ་ཕིབས་

དང་གསེར་ཏོག་ལྷག་ཏུ་དྲན།

དུས་ད་ལྟ།

གོམ་སྒྲ་དེ་དག་སྟོང་འཇགས་སུ་སོང་སྟེ།

མི་རྣམས་ཀྱིས་ངག་མི་སྨྲ་བའི་ཚུལ་ཇི་བཞིན།

མདོག་གཅིག་ཏུ་མ་ངེས་པའི་ཁ་ཤུབས་རེ་རེ་

བརྒྱབ་ནས།

ཁྱེད་དང་རིང་དུ་བཀྱེད་དེ་སོ་སོར་ལོག་རྗེས།

ཁྱེད་རང་གཅིག་པུས་ཁེར་རྐྱང་གི་དྲན་

གདུང་ཁུར་ཏེ།

སྨུག་སྤྲིན་ལང་ལོང་གིས་གཏུམ་པའི་རི་བོ་ཞིག་

གི་ཚུལ་མཛད་བཞིན་ཡོད་ངེས།

ལྷ་ས་ལགས།

སྡིག་སྒྲིབ་ནག་ནོག་ཅིག་གནམ་ནས་ལྷུངས་ཏེ།

ཡང་ན། མ་ཉེས་པའི་རླངས་དྲི་ཞིག་ས་

ནས་མཆེད་དེ།

ཁྱེད་ཀྱི་འཇིག་རྟེན་དུ་བཙན་རྒོལ་བྱས་ཀྱང།

ཁྱེད་རང་དུས་རྟག་ཏུ་ཞེ་གནོང་དོན་མི་འདུག་སྟེ།

ཁྱེད་ནི་ཡེ་གདོད་མ་ནས་སྲིད་པའི་རྩེ་མོར་

གནས་བཅས་པའི།

རང་བྱུང་གི་ཁ་བ་དཀར་པོ་ཞིག་ཡིན།

ལྷ་ས་ལགས།

ཁྱེད་ཀྱིས་སྨྲེང་སྐྱོ་འདྲེས་མའི་སྤྱན་ཟུང་ཡངས་

པོར་ཕྱེས་དང་།

ཁྱེད་ཀྱིས་སྐྱོ་བས་བཏེགས་པའི་མགྲིན་

པ་བོར་ཏེ།

སླར་ཡང་སྙན་འཇེབས་ཀྱི་གླུ་དབྱངས་

ལོངས་དང་།

ང་ཚོ། ཁྱེད་ཀྱི་གཡའ་དག་པའི་ནམ་མཁའ་

ལ་སྔར་བཞིན་དགའ།

ང་ཚོ། ཁྱེད་ཀྱི་རྡུལ་དྭངས་པའི་ས་གཞི་

ལ་སྔར་བཞིན་དུངས།

༼ དཀར་པོ་ཚེ་རིང་། ༽