འདི་ནི་མདོ་དབུས་མཐོ་སྒང་གི་ཤར་ལྷོའི་ཕྱོགས་ཏེ། བོད་ལྗོངས་ཀྱི་ཤར་ཕྱོགས་དང་སི་ཁྲོན་གྱི་ནུབ་ཕྱོགས་ཀྱི་བར་ཁུལ་དུ་ཡོད་ལ། ལྷོ་ནས་བྱང་དུ་ཆགས་པའི་རི་རྒྱུད་ཉག་གཅིག་ཡིན། འདི་ལ་རི་རྒྱུད་ཟེར་ཡང་དོན་དུ་སྒང་གཤོང་མང་པོ་མཉམ་གཤིབ་ཏུ་ཡོད་པའི་རི་མཐོ་ལུང་ཟབ་ཀྱི་སའི་ཆགས་ཚུལ་ཁྱད་པར་བ་ཞིག་གི་སྤྱི་མིང་རེད། དེ་རུ་རི་མང་པོ་ཡོད་པ་ལས་མཐོ་ཤས་ནི་མཚོ་འཕགས་སྨི ༧༥༥༦ ཅན་གྱི་མི་ཉག་གངས་དཀར་ཡིན། འབྲི་ཆུ་དང་རྫ་ཆུ་རྒྱལ་རོང་རྒྱལ་མོ་རྔུལ་ཆུ་སོགས་ཆུ་ཆེན་དུ་མས་རི་དེ་དག་དུམ་བུར་བཅད་དེ་ཤར་དུ་བཞུར་གྱིན་ཡོད།

གོང་སྨོས་ཀྱི་རི་རྒྱུད་འདི་དག་གིས་དྲ་བ་འཐེན་པའི་བར་གསེང་ནི་ལུང་ཤུར་དང་མཐོ་སྒང་། བདེ་ཐང་དང་གཤོང་ས་སོགས་ཡིན། ཧི་མ་ལ་ཡ་རི་རྒྱུད་དང་གངས་གཉན༼ གངས་ཏེ་སི་དང་གཉན་ཆེན་ཐང་ལྷ ༽ རི་རྒྱུད་གཉིས་ཀྱི་བར་ནི་ཡར་ཀླུང་གཙང་པོའི་འབབ་ཡུལ་གཙོར་བྱས་པའི་ལུང་ཁུལ་ཡིན་ལ། གངས་ཏེ་སི་རི་རྒྱུད་དང་ཁུ་ནུ་རི་རྒྱུད་གཉིས་ཀྱི་བར་ནི་བྱང་ཐང་གི་མཐོ་སྒང་བདེ་ཐང་༼ 高原平原 ༽ ཡིན།མཐོ་སྒང་བདེ་ཐང་འདི་དང་། དེར་མཐུད་ཡོད་པའི་མཚོ་སྔོན་གྱི་ལྷོ་ཕྱོགས་དང་སི་ཁྲོན་གྱི་ནུབ་བྱང་ཕྱོགས་ཀྱི་མཐོ་སྒང་བདེ་ཐང་བཅས་ཀྱིས་མདོ་དབུས་མཐོ་སྒང་ཡོངས་ཀྱི་སུམ་ཆའི་གཅིག་ཟིན། ཁུ་ནུ་རི་རྒྱུད་དང་། ཨ་མདོ༼ ཨ་ཨེར་ཅིན་རི་རྒྱུད་དང་མདོ་ལ་རིང་མོ ༽ རི་རྒྱུད་གཉིས་ཀྱི་བར་ནི་ཚྭ་འདམ་གཤོང་ས་ཡིན།

（ རྩོམ་སྒྲིག་པས་འཚོལ་སྡུད་བྱས།）