དགའ་སྐྱོའི་འདུ་བ་མོད་པའི་འཇིག་རྟེན་ན།།
བདེ་སྡུག་གར་གྱི་ཕྱག་རྒྱ་མང་བརྡལ་ཡང་།།
ཚོགས་གཉིས་བསོད་ནམས་ཞིང་གི་མཆོད་སྡོང་ལ།།
ཁ་རླངས་ངན་པས་གྲིབ་མ་གཡོར་འདོད་མེད།།
ང་ཁྱོད་གཡུལ་སའི་འཐབ་ར་ཆེན་མོ་ན།།
འཐེན་ཁྱེར་ཕྱོགས་ཞེན་མི་བདེ་མང་ན་ཡང་།།
ཕྲ་བའི་ཕྲ་བ་ཙམ་ཡང་གཡོལ་དཀའ་བའི།།
རྒྱུ་འབྲས་ཟབ་མོའི་ཆོས་ལ་རྟག་ཏུ་འདུན།།
སྣང་བའི་ཁ་དོག་ཅིག་གི་མཚོན་དོན་དང་།།
ལུས་ཀྱི་ཟུངས་ཁྲག་ཅིག་གི་རི་མོ་ལ།།
རིན་ཐང་ལྟ་བའི་ངོ་སོ་མ་ནོར་བའི།།
དཔྱོད་ལྡན་མིག་རྒྱང་ཅན་དག་གུས་པར་འོས།།
གློག་འོད་དཀར་དམར་སྡེབ་པའི་གྲོང་ཁྱེར་ན།།
མེ་ཏོག་བསྟར་ལ་བརྒྱུས་འདྲའི་ཚོང་ཁྲོམ་དང་།།
ཟང་ཟིང་འུར་ལ་བསྟིམས་པའི་མི་ཚོགས་སོགས།།
རྒྱ་བྱིན་མིག་སྟོང་བགྲད་ཀྱང་བལྟས་མི་ཚར།།
སྣང་བས་སྐྱོ་གླུ་བླངས་བའི་གྲུ་ཟུར་དུ།།
གཏན་གྲོགས་ཆང་ལ་བྲིས་པའི་བརྩེ་དུང་ཡོད།།
ཆང་གི་རླབས་ལ་ཐིམ་པའི་དམ་བཅའ་དེ།།
མི་བརྗེད་ཡིད་ལ་དཔར་བའི་བརྗེད་བྱང་ཡིན།།
ལམ་སྒྲོན་མེད་པའི་རྒྱ་ཧྲང་སྟོང་བ་ནས།།
གྲིབ་མ་མེད་པའི་ལག་ཟུང་ཕྱི་ལ་བསྐྱངས།།
ཁྲེལ་གཞུང་ཡལ་བའི་ཟླ་བ་རྒྱང་ལ་བྱིན།།
ང་ཡི་སྐྱོ་རོགས་རྨི་ལམ་གང་དུ་ཡོད།།
༼ ཞལ་དཀར། ༽