ཀྲུང་གོ་གུང་ཁྲན་ཏང་ཀྲུང་དབྱང་ཨུ་ཡོན་ལྷན་ཁང་།

ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་ཡོངས་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་།

ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་སྲིད་སྤྱི་ཁྱབ་ཁང་།

ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་རྒྱལ་ཡོངས་ཨུ་ཡོན་ལྷན་ཁང་།

ཀྲུང་གོ་གུང་ཁྲན་ཏང་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྲུང་དབྱང་དམག་དོན་ཨུ་ཡོན་ལྷན་ཁང་བཅས་ཀྱིས།

ཏང་ཡོངས་དང་དམག་ཡོངས། རྒྱལ་ཡོངས་མི་རིགས་སོ་སོའི་མི་དམངས་ལ་སྤྲིངས་པའི་འཕྲིན་ཡིག།

ཀྲུང་གོ་གུང་ཁྲན་ཏང་ཀྲུང་དབྱང་ཨུ་ཡོན་ལྷན་ཁང་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་ཡོངས་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་སྲིད་སྤྱི་ཁྱབ་ཁང་། ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་རྒྱལ་ཡོངས་ཨུ་ཡོན་ལྷན་ཁང་། ཀྲུང་གོ་གུང་ཁྲན་ཏང་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྲུང་དབྱང་དམག་དོན་ཨུ་ཡོན་ལྷན་ཁང་བཅས་ཀྱིས་སྐྱོ་གདུང་རབ་ཏུ་དྲག་པོས་ཏང་ཡོངས་དང་དམག་ཡོངས། རྒྱལ་ཡོངས་མི་རིགས་སོ་སོའི་མི་དམངས་བཅས་ལ་བརྡ་ཁྱབ་གཏང་རྒྱུ་ནི། ང་ཚོས་གུས་ཤིང་བརྩེ་བའི་བློ་མཐུན་ཅང་ཙེ་རྨིན་མཆོག་ལ་ཁྲག་དཀར་ནད་བྱུང་ནས་དོན་སྣོད་མང་པོའི་ནུས་པ་ཉམས་ཏེ། མྱུར་སྐྱོབ་བྱས་ཀྱང་མ་ཕན་པར2022ལོའི་སྤྱི་ཟླ11པའི་ཚེས30ཉིན་གྱི་ཆུ་ཚོད12དང་སྐར་མ13སྟེང་ཧྲང་ཧེ་ནས་སྐུ་གཤེགས་པ་དང་། ཁོང་ཉིད་དགུང་ལོ96ལ་འཚོ་གཞེས་གནང་།

བློ་མཐུན་ཅང་ཙེ་རྨིན་མཆོག་ནི་རང་རེའི་ཏང་དང་རང་རེའི་དམག། རང་རེའི་རྒྱལ་ཁབ་ཀྱི་མི་རིགས་སོ་སོའི་མི་དམངས་ཀུན་གྱིས་ཡོངས་ཁྱབ་ཏུ་ཁས་ལེན་པའི་མཚན་སྙན་བླ་ན་མེད་པའི་ཁྱད་འཕགས་ཀྱི་མགོ་ཁྲིད་པ་དང་རླབས་ཆེ་བའི་མར་ཁེ་སི་རིང་ལུགས་པ། རླབས་ཆེ་བའི་འབྱོར་མེད་གྲལ་རིམ་གྱི་གསར་བརྗེ་པ། ཆབ་སྲིད་པ། དམག་དོན་པ། ཕྱི་འབྲེལ་པ། ཡུན་རིང་ཉམས་སད་ཐེག་པའི་གུང་ཁྲན་རིང་ལུགས་ཀྱི་འཐབ་མོ་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་རླབས་ཆེན་ལས་དོན་གྱི་ཁྱད་དུ་འཕགས་པའི་མགོ་ཁྲིད་པ། ཏང་གི་ཀྲུང་དབྱང་མགོ་ཁྲིད་ཐུན་མོང་གི་མི་རབས་གསུམ་པའི་སྲོག་ཤིང་། མཚོན་བྱེད་གསུམ་གྱི་དགོངས་པ་གལ་ཆེན་གྱི་གསར་གཏོད་པ་གཙོ་བོ་བཅས་ཡིན་པ་རེད།

བློ་མཐུན་ཅང་ཙེ་རྨིན་མཆོག་གིས་གཞོན་ནུའི་དུས་སྐབས་ནས་བཟུང་སློབ་ལ་བརྩོན་ཞིང་བདེན་ལུགས་བསྙེགས་པ་དང་། རྒྱལ་གཅེས་རིང་ལུགས་ཀྱི་བསམ་བློ་དང་དམངས་གཙོ་གསར་བརྗེའི་བསམ་བློའི་བློ་འབྱེད་ཐོབ། སློབ་གྲྭ་ཆེན་མོ་རུ་སློབ་སྦྱོང་གནང་སྐབས། འཇར་འགོག་རྒྱལ་གཅེས་བྱེད་སྒོར་ཧུར་ཐག་གིས་ཞུགས་པ་བརྒྱུད་ནས། བློ་མཐུན་ཅང་ཙེ་རྨིན་ལ་མར་ཁེ་སི་རིང་ལུགས་ཀྱི་འཇིག་རྟེན་ལྟ་བ་འབྱོར་བ་དང་། མི་ཚེའི་བགྲོད་ལམ་གྱི་གདམ་ག་ཡོངས་སུ་འགྲུབ་སྟེ། མཇུག་མཐར་མི་རིགས་བཅིངས་འགྲོལ་དང་མི་དམངས་བདེ་སྐྱིད་ཀྱི་ཆེད་དུ་འབད་འཐབ་བྱེད་པའི་མི་ཚེའི་ཕུགས་བསམ་དང་དད་མོས་གཏན་ལ་ཕབ། གཅིག་སྟོང་དགུ་བརྒྱ་ཞེ་བདུན་ལོར་ཧྲང་ཧེ་འགྲིམ་འགྲུལ་སློབ་ཆེན་ནས་མཐར་ཕྱིན་རྗེས། བློ་མཐུན་ཅང་ཙེ་རྨིན་གྱིས་བཟོ་གྲྭ་ནས་ཕྱག་ལས་གནང་སྟེ། བཟོ་པ་མང་ཚོགས་ཀྱི་ཁྲོད་དང་ན་གཞོན་ཚོགས་པའི་མཚན་མོའི་སློབ་གྲྭའི་ལས་རིགས་ན་གཞོན་ཁྲོད་དུ་གསར་བརྗེ་དྲིལ་སྒྲོག་གི་ཕྱག་ལས་གནང་ལ། གཅིག་སྟོང་དགུ་བརྒྱ་ཞེ་དགུ་ལོར་བཟོ་པ་མང་ཚོགས་རྩ་འཛུགས་མཛད་དེ་བཟོ་གྲྭ་སྲུང་སྐྱོང་གི་བྱེད་སྒོ་སྤེལ་ནས། ཧྲང་ཧེ་ཡི་བཅིངས་འགྲོལ་བསུས།

ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་པའི་དུས་འགོར། བློ་མཐུན་ཅང་ཙེ་རྨིན་གྱིས་སྔ་གཞུག་ཏུ་ཧྲང་ཧེ་དབྱི་མེན་ཟས་རིགས་བཟོ་གྲྭ་དང་པོའི་ཁྲང་ཀྲང་གཞོན་པ་དང་པོ་དང་། ཧྲང་ཧེ་ཁྲུས་རྫས་བཟོ་གྲྭའི་ཁྲང་ཀྲང་གཞོན་པ་དང་པོ། འཕྲུལ་ཆས་བཟོ་ལས་པུའུ་དང་པོའི་ཧྲང་ཧེ་ཇུས་འགོད་ཡན་ལག་ཅུས་གཉིས་པའི་གློག་ཆས་ཆེད་ལས་ཁོ་ཡི་ཁོ་ཀྲང་སོགས་ཀྱི་འགན་བཞེས། གཅིག་སྟོང་དགུ་བརྒྱ་ལྔ་བཞི་ལོར། རྒྱལ་ཁབ་ཀྱིས་ཁྲང་ཁྲུན་དུ་རླངས་འཁོར་བཟོ་གྲྭ་དང་པོ་བཙུགས་པར་ཆེད་ལས་ལག་རྩལ་ལས་བྱེད་པ་དང་དོ་དམ་ལས་བྱེད་པ་འབོར་ཆེན་མཁོ་བས། བློ་མཐུན་ཅང་ཙེ་རྨིན་ལས་བགོས་ལྟར་དེར་ཕེབས་པ་དང་། གཅིག་སྟོང་དགུ་བརྒྱ་ང་ལྔ་ལོར་སུའུ་ལེན་གྱི་མོ་སི་ཁོའི་སི་ཏ་ལིན་རླངས་འཁོར་བཟོ་གྲྭ་རུ་དངོས་སྦྱོང་དུ་ཕེབས། གཅིག་སྟོང་དགུ་བརྒྱ་ང་དྲུག་ལོར་ཕྱིར་རྒྱལ་ནང་དུ་ཕེབས་རྗེས། བློ་མཐུན་ཅང་ཙེ་རྨིན་གྱིས་ཁྲང་ཁྲུན་རླངས་འཁོར་བཟོ་གྲྭ་དང་པོའི་སྒུལ་ཤུགས་ཁྲུའུ་ཡི་ཁྲུའུ་ཀྲང་གཞོན་པ་དང་། སྤྱིའི་སྒུལ་ཤུགས་ཆེན་མོ་བ་གཞོན་པ། སྒུལ་ཤུགས་ཡན་ལག་བཟོ་གྲྭའི་ཁྲང་ཀྲང་བཅས་ཀྱི་འགན་བཞེས། གཅིག་སྟོང་དགུ་བརྒྱ་རེ་གཉིས་ལོར། བློ་མཐུན་ཅང་ཙེ་རྨིན་ལས་གནས་སྤར་ཏེ་འཕྲུལ་ཆས་བཟོ་ལས་པུའུ་དང་པོའི་ཧྲང་ཧེ་གློག་ཆས་ཚན་རིག་ཞིབ་འཇུག་ཁང་གི་སུའུ་ཀྲང་གཞོན་པའི་འགན་བཞེས་ནས། ཞིབ་འཇུག་ཁང་དེའི་ཚན་རིག་ཞིབ་འཇུག་གི་དབུ་ཁྲིད་ཕྱག་ལས་གནང་། གཅིག་སྟོང་དགུ་བརྒྱ་རེ་དྲུག་ལོར། བློ་མཐུན་ཅང་ཙེ་རྨིནལས་གནས་སྤར་ཏེ་ཝུའུ་ཧན་ཚ་བའི་བཟོ་ལས་འཕྲུལ་ཆས་ཞིབ་འཇུག་ཁང་གི་སུའུ་ཀྲང་དང་ཏང་ཨུའུ་ཧྲུའུ་ཅི་ཚབ་མའི་འགན་བཞེས་པ་དང་། རྗེས་སུ་ཏང་ཨུའི་ཧྲུའུ་ཅིའི་འགན་བཞེས་ཏེ། ཉིང་ནུས་གློག་འདོན་སྒྲིག་ཆས་ཀྱི་ཇུས་འགོད་བྱ་བར་རྩ་འཛུགས་གནང་། རིག་གནས་གསར་བརྗེ་ཆེན་པོ་མགོ་བརྩམས་རྗེས། བློ་མཐུན་ཅང་ཙེ་རྨིན་ལ་རྡེག་སྐྱོན་ཐེབས། གཅིག་སྟོང་དགུ་བརྒྱ་བདུན་ཅུ་ལོར། བློ་མཐུན་ཅང་ཙེ་རྨིནལས་གནས་སྤར་ཏེ་འཕྲུལ་ཆས་བཟོ་ལས་པུའུ་དང་པོ་རུ་ཕྱག་ལས་གནང་བ་དང་། གཅིག་སྟོང་དགུ་བརྒྱ་དོན་གཅིག་ལོར་ཀྲུང་གོའི་འཕྲུལ་ཆས་བཟོ་ལས་པུའུ་ཡི་རོ་མ་ནི་ཡར་མངགས་པའི་ཆེད་མཁས་ཚན་ཁག་གི་སྤྱི་ཁྱབ་ཚན་གཙོའི་འགན་བཞེས་ལ། གཅིག་སྟོང་དགུ་བརྒྱ་དོན་གསུམ་ལོར་ཕྱིར་རྒྱལ་ནང་དུ་ཕེབས་རྗེས་འཕྲུལ་ཆས་བཟོ་ལས་པུའུ་དང་པོའི་ཕྱི་དོན་ཅུས་ཀྱི་ཅུས་ཀྲང་གཞོན་པ་དང་། ཅུས་ཀྲང་གི་འགན་བཞེས།

（ པར་ངོས་གཉིས་པར་གཟིགས།）