（ པར་ངོས་དང་པོར་མཐུད།） གཅིག་སྟོང་དགུ་བརྒྱ་བརྒྱད་ཅུ་ལོར་བློ་མཐུན་ཅང་ཙེ་རྨིན་གྱིས་རྒྱལ་ཁབ་ཕྱིར་གཏོང་ནང་འདྲེན་དོ་དམ་ཨུ་ཡོན་ལྷན་ཁང་དང་། རྒྱལ་ཁབ་ཕྱི་རྒྱལ་དངུལ་གཏོང་དོ་དམ་ཨུ་ཡོན་ལྷན་ཁང་གི་ཀྲུའུ་རེན་གཞོན་པའི་ཞོར་དུ་དྲུང་ཡིག་ཆེན་མོ་དང་། ཏང་ཙུའུ་ཁོངས་མིའི་འགན་བཞེས་ཏེ། གཙོ་བོ་ཀོང་ཏུང་དང་ཧྥུའུ་ཅན་ཞིང་ཆེན་གཉིས་སུ་དམིགས་བསལ་སྲིད་ཇུས་དང་འཚམ་བསྟུན་སྲིད་ཇུས་ལག་བསྟར་བྱེད་པ་དང་། དཔལ་འབྱོར་དམིགས་བསལ་ཁུལ་ཚོད་ལྟ་བྱེད་པ་སོགས་གསར་གཏོད་རང་བཞིན་གྱི་ཕྱག་ལས་གནང་། གཅིག་སྟོང་དགུ་བརྒྱ་གྱ་གཉིས་ལོར། བློ་མཐུན་ཅང་ཙེ་རྨིན་གྱིས་གློག་རྡུལ་བཟོ་ལས་པུའུ་ཡི་པུའུ་ཀྲང་གཞོན་པ་དང་པོ་དང་། ཏང་ཙུའུ་ཧྲུའུ་ཅི་གཞོན་པའི་འགན་བཞེས་ལ། གཅིག་སྟོང་དགུ་བརྒྱ་གྱ་གསུམ་ལོར་པུའུ་ཀྲང་དང་ཏང་ཙུའུ་ཧྲུའུ་ཅིའི་འགན་བཞེས་ནས། རང་རྒྱལ་གྱི་གློག་རྡུལ་བཟོ་ལས་འཕེལ་རྒྱས་ཐད་མཛད་རྗེས་ཆེན་པོ་བཞག། གཅིག་སྟོང་དགུ་བརྒྱ་གྱ་གཉིས་ལོའི་སྤྱི་ཟླ་དགུ་པར། བློ་མཐུན་ཅང་ཙེ་རྨིན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་བཅུ་གཉིས་པའི་སྟེང་ཀྲུང་དབྱང་ཨུ་ཡོན་དུ་བདམས་ཐོན་བྱུང་།
གཅིག་སྟོང་དགུ་བརྒྱ་གྱ་ལྔ་ལོར། བློ་མཐུན་ཅང་ཙེ་རྨིན་གྱིས་ཧྲང་ཧེ་གྲོང་ཁྱེར་གྱི་ཧྲི་ཀྲང་དང་ཀྲུང་གུང་ཧྲང་ཧེ་གྲོང་ཁྱེར་ཨུ་ཡོན་ལྷན་ཁང་གི་ཧྲུའུ་ཅི་གཞོན་པའི་འགན་བཞེས། གཅིག་སྟོང་དགུ་བརྒྱ་གྱ་བདུན་ལོར། བློ་མཐུན་ཅང་ཙེ་རྨིན་ཏང་གི་སྐབས་བཅུ་གསུམ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་སྟེང་ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན་དུ་བདམས་པར་མ་ཟད། ཀྲུང་གུང་ཧྲང་ཧེ་གྲོང་ཁྱེར་ཨུ་ཡོན་ལྷན་ཁང་གི་ཧྲུའུ་ཅིའི་འགན་བཞེས། ཧྲང་ཧེ་གྲོང་ཁྱེར་གྱི་ཧྲི་ཀྲང་དང་གྲོང་ཁྱེར་ཏང་ཨུའི་ཧྲུའུ་ཅིའི་འགན་བཞེས་པའི་སྐབས་སུ། བློ་མཐུན་ཅང་ཙེ་རྨིན་གྱིས་ཧྲང་ཧེ་ཡི་རྒྱ་ཆེའི་ལས་བྱེད་པ་དང་མང་ཚོགས་ལ་དབུ་ཁྲིད་གནང་ནས་སྤོབས་སེམས་ཆེར་སྐྱེད་དང་ཞུམ་མེད་འཚོལ་ཞིབ་མཛད་དེ། ཧྲང་ཧེ་ཡི་བཅོས་བསྒྱུར་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་བར་མཆོང་བརྒལ་ཆེན་པོ་མཛད་པ་དང་། ཕུའུ་ཏུང་གི་གསར་སྤེལ་སྒོ་འབྱེད་ལ་ཇུས་འགོད་གནང་ནས། ཏང་གི་འཛུགས་སྐྲུན་དང་བསམ་པའི་དཔལ་ཡོན་འཛུགས་སྐྱོང་། སྤྱི་ཚོགས་འཛུགས་སྐྱོང་བཅས་ལ་སྐུལ་འདེད་གཏོང་བར་འཕེལ་རིམ་ཆེན་པོ་བླངས། གཅིག་སྟོང་དགུ་བརྒྱ་གྱ་དགུ་ལོའི་དཔྱིད་དབྱར་བསྣོལ་མཚམས་སུ་རང་རྒྱལ་དུ་ཆབ་སྲིད་ཀྱི་ཟིང་ཆ་ཚབས་ཆེན་བྱུང་བ་དང་། བློ་མཐུན་ཅང་ཙེ་རྨིན་གྱིས་ཏང་ཀྲུང་དབྱང་གི་ལངས་ཕྱོགས་གསལ་བོས་ཟིང་འཁྲུག་ལ་ངོ་རྒོལ་བྱེད་པ་དང་། སྤྱི་ཚོགས་རིང་ལུགས་རྒྱལ་ཁབ་ཀྱི་སྲིད་དབང་ལ་སྲུང་སྐྱོང་བྱེད་པ། མི་དམངས་ཀྱི་རྩ་བའི་ཁེ་ཕན་ལ་སྲུང་སྐྱོང་བྱེད་པ་བཅས་ཀྱི་ཡང་དག་པའི་ཇུས་ཆོད་ལ་གོང་བཀུར་དང་ལག་བསྟར་གནང་སྟེ། རྒྱ་ཆེའི་ཏང་ཡོན་དང་ལས་བྱེད་པ། མང་ཚོགས་བཅས་ལ་དམ་དུ་བརྟེན་ནས་ཧྲང་ཧེ་ཡི་བརྟན་འཇགས་ལ་སྲུང་སྐྱོང་ཆེན་པོ་མཛད།
གཅིག་སྟོང་དགུ་བརྒྱ་གྱ་དགུ་ལོར། ཏང་གི་སྐབས་བཅུ་གསུམ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་སྟེང་། བློ་མཐུན་ཅང་ཙེ་རྨིན་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་དང་། ཀྲུང་དབྱང་ཨུ་ཡོན་ལྷན་ཁང་གི་སྤྱི་ཁྱབ་ཧྲུའུ་ཅིར་བདམས། ལོ་དེར་ཏང་གི་སྐབས་བཅུ་གསུམ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པའི་སྟེང་བློ་མཐུན་ཅང་ཙེ་རྨིན་ཀྲུང་གུང་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞིར་གདམ་རྒྱུའི་ཐག་བཅད་ལ། གཅིག་སྟོང་དགུ་བརྒྱ་དགུ་བཅུ་ལོར། རྒྱལ་ཡོངས་དམངས་ཆེན་སྐབས་བདུན་པའི་གྲོས་ཚོགས་ཐེངས་གསུམ་པའི་སྟེང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞིར་བདམས།
བློ་མཐུན་ཅང་ཙེ་རྨིན་ནི་ཀྲུང་དབྱང་མགོ་ཁྲིད་ཐུན་མོང་གི་མི་རབས་གསུམ་པའི་སྲོག་ཤིང་ཡིན། དུས་རབས་ཉི་ཤུ་པའི་ལོ་རབས་བརྒྱད་ཅུ་པའི་མཇུག་དང་ལོ་རབས་དགུ་བཅུ་པའི་འགོར། རྒྱལ་སྤྱི་དང་རྒྱལ་ནང་དུ་ཆབ་སྲིད་ཀྱི་ཟིང་ཆ་ཚབས་ཆེན་བྱུང་བ་དང་། འཛམ་གླིང་གི་སྤྱི་ཚོགས་རིང་ལུགས་ལ་བར་ཆད་ཚབས་ཆེན་བྱུང་བར་མ་ཟད། རང་རྒྱལ་གྱི་སྤྱི་ཚོགས་རིང་ལུགས་ཀྱི་ལས་དོན་འཕེལ་རྒྱས་ཐད་ཀྱང་སྔ་ན་མེད་པའི་དཀའ་ངལ་དང་གནོན་ཤུགས་ཧ་ཅང་ཆེན་པོ་བྱུང་། ཏང་དང་རྒྱལ་ཁབ་ཀྱི་མདུན་ལམ་དང་ལས་དབང་ཐག་གཅོད་པའི་ལོ་རྒྱུས་ཀྱི་གནད་འགག་དུས་སྐབས་འདིར། བློ་མཐུན་ཅང་ཙེ་རྨིན་གྱིས་ཏང་གི་ཀྲུང་དབྱང་མགོ་ཁྲིད་ཐུན་མོང་ལ་དབུ་ཁྲིད་གནང་སྟེ། ཏང་ཡོངས་དང་དམག་ཡོངས། རྒྱལ་ཡོངས་རིགས་སོ་སོའི་མི་དམངས་བཅས་ལ་དམ་པོར་བརྟེན་ནས། ལངས་ཕྱོགས་གསལ་བོས་གཞི་རྩའི་རྩ་དོན་བཞི་རྒྱུན་འཁྱོངས་གནང་བ་དང་། རྒྱལ་ཁབ་ཀྱི་རང་བཙན་དང་ལ་རྒྱ། བདེ་འཇགས། བརྟན་འཇགས་བཅས་ལ་སྲུང་སྐྱོང་མཛད་ལ། དཔལ་འབྱོར་འཛུགས་སྐྲུན་གྱི་དཀྱིལ་སྙིང་འདི་གཡོ་འགུལ་སྤུ་ཙམ་ཡང་མེད་པར་རྒྱུན་འཁྱོངས་དང་། བཅོས་བསྒྱུར་སྒོ་འབྱེད་རྒྱུན་འཁྱོངས་གནང་ཞིང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རླབས་ཆེན་ལས་དོན་ལ་སྲུང་སྐྱོང་མཛད་དེ། རང་རྒྱལ་གྱི་བཅོས་བསྒྱུར་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་གྱི་རྣམ་པ་གསར་པ་བཏོད།
ཏང་གི་སྐབས་བཅུ་གསུམ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་ནས་ཏང་གི་ཚོགས་ཆེན་ཐེངས་བཅུ་དྲུག་པའི་བར་གྱི་ལོ་ངོ་བཅུ་གསུམ་གྱི་རིང་ལ། རྒྱལ་སྤྱིའི་གནས་བབ་ལ་འགྱུར་ལྡོག་ཧ་ཅང་ཆེན་པོ་བྱུང་བ་དང་། རང་རྒྱལ་གྱི་བཅོས་བསྒྱུར་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་གྱི་ཟིལ་རླབས་དགུང་དུ་འཕྱུར་ཡོད། རྙོག་འཛིང་ཤིན་ཏུ་ཆེ་བའི་རྒྱལ་སྤྱི་དང་རྒྱལ་ནང་གི་གནས་བབ་འོག་ཏུ། བློ་མཐུན་ཅང་ཙེ་རྨིན་གྱིས་ཏང་གི་ཀྲུང་དབྱང་མགོ་ཁྲིད་ཐུན་མོང་ལ་དབུ་ཁྲིད་གནང་ནས། མར་ཁེ་སི་ལེ་ཉིན་རིང་ལུགས་དང་མའོ་ཙེ་ཏུང་དགོངས་པ། ཏིན་ཞའོ་ཕིང་གི་རིགས་པའི་གཞུང་ལུགས་བཅས་ཀྱི་རླབས་ཆེན་དར་ཆ་མཐོན་པོར་བསྒྲེངས་ནས། ཏང་གི་གཞི་རྩའི་ལམ་ཕྱོགས་རྒྱུན་འཁྱོངས་ལྷོད་མེད་གནང་བ་དང་། ཏང་ཡོངས་དང་རྒྱལ་ཡོངས་རིགས་སོ་སོའི་མི་དམངས་ལ་མཐུན་སྒྲིལ་བྱེད་པའི་གོ་སྐབས་དམ་འཛིན་དང་བཅོས་བསྒྱུར་ཟབ་སྤེལ། སྒོ་འབྱེད་རྒྱ་བསྐྱེད། འཕེལ་རྒྱས་སྐུལ་འདེད། བརྟན་འཇགས་སྲུང་འཛིན་བཅས་བྱས་ནས། སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྒྲིག་སྲོལ་གྱི་བཅོས་བསྒྱུར་དམིགས་འབེན་དང་གཞི་རྩའི་སྒྲོམ་གཞི་གཏན་ལ་ཕབ་ཅིང་། སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་གྱི་སྤྱི་ལ་དབང་བའི་ལམ་ལུགས་ཀྱིས་གྲུབ་ཆ་གཙོ་བོ་བྱེད་པ་དང་དབང་བའི་ལམ་ལུགས་སྣ་མང་གི་དཔལ་འབྱོར་མཉམ་དུ་འཕེལ་རྒྱས་གཏོང་བའི་གཞི་རྩའི་དཔལ་འབྱོར་ལམ་ལུགས་དང་། རྩོལ་བསྟུན་ཐོབ་སྤྲོད་ཀྱིས་གྲུབ་ཆ་གཙོ་བོ་བྱེད་པ་དང་བགོ་བཤའ་རྒྱག་སྟངས་སྣ་མང་མཉམ་དུ་གནས་པའི་བགོ་བཤའི་ལམ་ལུགས་གཏན་འཁེལ་བྱས་ལ། བཅོས་བསྒྱུར་དང་འཕེལ་རྒྱས། བརྟན་འཇགས་བཅས་ལ་ཡར་སྐུལ་བྱེད་པའི་བྱེད་ཕྱོགས་སྲིད་ཇུས་དང་འཐབ་ཇུས་གལ་ཆེན་རབ་དང་རིམ་པ་གཏན་འབེབས་དང་ལག་བསྟར་བྱས་པར་མ་ཟད། བློ་བརྟན་འགྱུར་མེད་སྒོས་དཔལ་འབྱོར་སྒྲིག་སྲོལ་བཅོས་བསྒྱུར་དང་ཆབ་སྲིད་སྒྲིག་སྲོལ་བཅོས་སྒྱུར། རིག་གནས་སྒྲིག་སྲོལ་བཅོས་སྒྱུར། ཕྱོགས་གཞན་དག་གི་བཅོས་བསྒྱུར་བཅས་བློ་རྩ་བརྟན་པོས་སྤེལ་བ་དང་། ཕྱོགས་ཡོངས་ནས་བཅོས་བསྒྱུར་སྒོ་འབྱེད་བྱེད་པའི་རྣམ་པ་གསར་པ་བསྐྲུན་པ་དང་ཁྲིམས་ལྟར་རྒྱལ་ཁབ་སྐྱོང་བའི་གཞི་རྩའི་ཇུས་གཞི་ཆེན་པོ་ལག་བསྟར་བྱས་ལ། “ཞི་བས་གཅིག་གྱུར་དང་རྒྱལ་ཁབ་གཅིག་ལ་ལམ་ལུགས་གཉིས”ཀྱི་བྱེད་ཕྱོགས་རྒྱུན་འཁྱོངས་བྱས་ཏེ། ཞང་ཀང་དང་ཨའོ་མོན་བདེ་བླག་ངང་ཕྱིར་མེས་རྒྱལ་གྱི་པང་དུ་ལོག་པར་བྱས་པ་དང་། རང་བཙན་རང་བདག་གི་ཞི་བདེའི་ཕྱི་འབྲེལ་སྲིད་ཇུས་རྒྱུན་འཁྱོངས་བྱས་ཤིང་། ཕྱི་འབྲེལ་ལས་དོན་གྱི་རྣམ་པ་གསར་པ་བསྐྲུན་པ་དང་། ཏང་འཛུགས་ཀྱི་རླབས་ཆེན་བཟོ་སྐྲུན་ལ་སྐུལ་འདེད་བཏང་བ་དང་། སྤྱི་ཚོགས་རིང་ལུགས་ཀྱི་དངོས་པོའི་དཔལ་ཡོན་དང་ཆབ་སྲིད་དཔལ་ཡོན། བསམ་པའི་དཔལ་ཡོན་བཅས་འཛུགས་སྐྲུན་ལ་འཛམ་གླིང་སྐྱེ་བོ་ཀུན་གྱིས་དོ་སྣང་བྱེད་པའི་འཕེལ་རྒྱས་གསར་པ་ཡོང་བར་བྱས་ཏེ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དུས་རབས་ཉེར་གཅིག་པར་སླེབས་པར་བྱས། བློ་མཐུན་ཅང་ཙེ་རྨིན་གྱི་སྲོག་ཤིང་ཡིན་པའི་ཏང་ཀྲུང་དབྱང་གི་མགོ་ཁྲིད་ཐུན་མོང་གི་མི་རབས་གསུམ་པའི་དབུ་ཁྲིད་འོག་ཏུ། ང་ཚོས་རང་རྒྱལ་གྱི་བདག་དབང་དང་བདེ་འཇགས་དང་འབྲེལ་བའི་རྒྱལ་སྤྱིའི་ཐོལ་བྱུང་དོན་རྐྱེན་རབ་དང་རིམ་པར་འཚབ་འཚུབ་མེད་པའི་སྒོ་ནས་ཁ་གཏད་འཇལ་བ་དང་། ཆབ་སྲིད་དང་དཔལ་འབྱོར་གྱི་ཁྱབ་ཁོངས་དང་། རང་བྱུང་ཁམས་བཅས་སུ་བྱུང་བའི་དཀའ་ངལ་དང་ཉེན་ཁ་ཅི་རིགས་ལས་རྣམ་པར་རྒྱལ་བར་བྱས་ཏེ། བཅོས་བསྒྱུར་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱེད་པའི་གྲུ་གཟིངས་ཐོག་མཐའ་བར་གསུམ་དུ་ཡང་དག་པའི་ཁ་ཕྱོགས་དེད་ནས་རླབས་གཤགས་མདུན་སྐྱོད་བྱེད་པར་འགན་ལེན་བྱས། ཏང་གི་སྐབས་བཅུ་གསུམ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་བསྡུས་པའི་ཚུན་གྱི་ལོ་ངོ་བཅུ་གསུམ་རིང་རང་རེའི་ཏང་དང་རྒྱལ་ཁབ་ཀྱིས་བླངས་པའི་གྲུབ་འབྲས་ཆེན་པོ་དེ་ནི། བློ་མཐུན་ཅང་ཙེ་རྨིན་མཆོག་མར་ཁེ་སི་རིང་ལུགས་ཀྱི་ཆབ་སྲིད་པ་ཞིག་ཡིན་པའི་ཆ་ནས་མཁས་མཛངས་ལྡན་པའི་དབུ་ཁྲིད་གནང་བ་དང་གནད་འགག་གི་ནུས་པ་བཏོན་པ། ཆབ་སྲིད་མགོ་ཁྲིད་ཀྱི་ཁྱད་འཕགས་སྒྱུ་རྩལ་མངའ་བ་བཅས་དང་ཁ་འབྲལ་ཐབས་གཏན་ནས་མེད།
བློ་མཐུན་ཅང་ཙེ་རྨིན་གྱིས་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞིའི་འགན་བཞེས་པའི་སྐབས་སུ། རྒྱལ་ཁབ་ཕྱི་ནང་གི་གནས་བབ་ཀྱི་འགྱུར་ལྡོག་གལ་ཆེན་དང་འཛམ་གླིང་གི་དམག་དོན་འཕོ་འགྱུར་གསར་པའི་འཕེལ་ཕྱོགས་གསལ་རྟོགས་དང་ཚོད་འཛིན་བྱས་ཏེ། རྒྱལ་སྲུང་དང་དམག་དཔུང་དེང་རབས་ཅན་དུ་འཕེལ་བའི་འཛུགས་སྐྲུན་བྱེད་ཤུགས་ཆེ་རུ་གཏོང་བའི་ཐད་ལ་ཆོད་གཏམ་གསར་པ་དང་བྱེད་ཐབས་གསར་པ་རབ་དང་རིམ་པ་བཏོན་པ་དང་། མའོ་ཙེ་ཏུང་གི་དམག་དོན་དགོངས་པ་དང་ཏིང་ཞའོ་ཕིང་གི་དུས་རབས་གསར་པའི་དམག་དཔུང་འཛུགས་སྐྲུན་དགོངས་པ་ཕུན་སུམ་ཇེ་ཚོགས་དང་འཕེལ་རྒྱས་སུ་བཏང་ལ། ཅང་ཙེ་རྨིན་གྱི་རྒྱལ་སྲུང་དང་དམག་དཔུང་འཛུགས་སྐྲུན་དགོངས་པ་གསར་དུ་བཏོན་ནས། རྒྱལ་སྲུང་དང་དམག་དཔུང་དེང་རབས་ཅན་འཛུགས་སྐྲུན་ལ་དབུ་ཁྲིད་གནང་བར་གྲུབ་འབྲས་ཧ་ཅང་ཆེན་པོ་ཐོབ། བློ་མཐུན་ཅང་ཙེ་རྨིན་མཆོག་གིས། རྒྱལ་སྲུང་འཛུགས་སྐྲུན་དང་དཔལ་འབྱོར་འཛུགས་སྐྲུན་མཐུན་སྦྱོར་ངང་གོང་དུ་སྤེལ་བའི་བྱེད་ཕྱོགས་རྒྱུན་འཁྱོངས་བྱས་ཏེ། མི་དམངས་དམག་དཔུང་གི་གསར་བརྗེ་ཅན་དང་དེང་རབས་ཅན། ཚད་ལྡན་ཅན་བཅས་སུ་འཛུགས་སྐྲུན་བྱེད་པར་ཤུགས་བསྣན་པ་དང་། ཆབ་སྲིད་ཚད་ལྡན་ཡིན་ཞིང་དམག་དོན་ལ་མཁས་པ། སྤྱོད་ཚུལ་བཟང་བ། སྒྲིག་ཁྲིམས་དམ་པ། འགན་སྲུང་ནུས་ལྡན་ཡིན་པ་བཅས་ཀྱི་སྤྱིའི་བླང་བྱ་ལྟར། རྒྱལ་ཁ་ལེན་ཐུབ་པ་དང་ངོ་བོ་མི་འགྱུར་བར་བྱེད་པའི་ལོ་རྒྱུས་རང་བཞིན་གྱི་དཔྱད་གཞི་གཉིས་ལ་དམ་དུ་དམིགས་ཏེ། མི་དམངས་དམག་དཔུང་གི་འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་བཏང་། ཏང་གིས་མི་དམངས་དམག་དཔུང་ལ་མགོ་ཁྲིད་མཐའ་གཅིག་ཏུ་བྱ་རྒྱུ་གཡོ་འགུལ་སྤུ་ཙམ་མེད་པའི་སྒོ་ནས་རྒྱུན་འཁྱོངས་བྱས་ནས། ཐོག་མཐའ་བར་གསུམ་དུ་བསམ་བློ་ཆབ་སྲིད་འཛུགས་སྐྲུན་དེ་རང་རེའི་དམག་གི་འཛུགས་སྐྲུན་ལས་རིམ་སོ་སོའི་གཙོ་བོར་བརྩིས་ཏེ། མི་དམངས་དམག་དཔུང་གི་ངོ་བོ་དང་རང་གཤིས། སྤྱོད་ཚུལ་བཅས་ནམ་ཡང་མི་ཉམས་པར་བྱ་དགོས། འགོག་སྲུང་ཧུར་ཐག་བྱེད་པའི་དམག་དོན་གྱི་འཐབ་ཇུས་བྱེད་ཕྱོགས་ལག་ལེན་མཐར་ཕྱིན་བྱེད་པ། ཀྲུང་གོའི་ཁྱད་ཆོས་ཀྱི་དམག་དོན་འཕོ་འགྱུར་ལ་སྐུལ་འདེད་གཏོང་བ། བརྡ་འཕྲིན་ཅན་གྱི་དམག་དཔུང་འཛུགས་སྐྲུན་དང་བརྡ་འཕྲིན་ཅན་གྱི་དམག་འཁྲུག་ལས་རྣམ་པར་རྒྱལ་བའི་དམིགས་འབེན་ལྟར། བློ་བརྟན་འགྱུར་མེད་ཀྱིས་ཀྲུང་གོའི་ཁྱད་ཆོས་ཀྱི་ཧྲག་དམག་སྐྱོང་བའི་ལམ་དུ་ཞུགས་ཏེ། རང་རེའི་དམག་དེང་རབས་ཅན་དུ་ཐོད་བརྒལ་རང་བཞིན་ལྡན་པའི་སྒོ་ནས་འཕེལ་རྒྱས་ཡོང་བར་བྱས། ཚན་རྩལ་ལ་བརྟེན་ནས་དམག་དཔུང་སྟོབས་ལྡན་དུ་གཏོང་བའི་འཐབ་ཇུས་ལག་བསྟར་བྱེད་པ་དང་། དམག་དཔུང་བཅོས་སྐྱོང་ནན་མོ་བྱེད་པ། ཁྲིམས་ལྟར་དམག་དཔུང་སྐྱོང་བ། བརྩོན་སྲི་ཅན་གྱི་དམག་འཛུགས་བཅས་རྒྱུན་འཁྱོངས་བྱེད་པ། ལོ་རྒྱུས་ཀྱི་ཆ་རྐྱེན་གསར་པའི་འོག་གི་དམག་དཔུང་བཅོས་སྐྱོང་བྱེད་པའི་ཁྱད་ཆོས་དང་ཆོས་ཉིད་འཚོལ་ཞིབ་བྱས་ཏེ། དུས་བསྟུན་མདུན་སྐྱོད་ཀྱི་སྒོ་ནས་རང་རེའི་དམག་འཛུགས་སྐྲུན་གྱི་ལས་དོན་སོ་སོར་སྐུལ་འདེད་བཏང་། རྒྱལ་སྲུང་ཚན་རྩལ་བཟོ་ལས་ཀྱི་སྒྲིག་སྲོལ་བཅོས་བསྒྱུར་ཟབ་སྤེལ་དང་། རང་བརྟེན་གསར་གཏོད་བྱེད་ནུས་ཆེ་རུ་གཏོང་བ། རྒྱལ་སྲུང་ཚན་རྩལ་དང་གོ་མཚོན་སྒྲིག་ཆས་སྔར་ལས་མྱུར་མོར་འཕེལ་རྒྱས་གཏོང་བ་བཅས་བྱས་ཏེ། གཏོང་ཚད་ཅུང་ཉུང་ཞིང་ཕན་འབྲས་ཅུང་ཆེ་བའི་དམག་དཔུང་དེང་རབས་ཅན་འཛུགས་སྐྲུན་གྱི་བགྲོད་ལམ་སྟེང་བསྐྱོད་དགོས། ཞི་འཐབ་ཟུང་འབྲེལ་དང་དམག་དམངས་ཟུང་འབྲེལ། དམག་དོན་གྱིས་དམངས་དོན་ལ་ཕན་འདོགས་པའི་བྱེད་ཕྱོགས་ལྟར། རྒྱལ་སྲུང་སྐུལ་སློང་གི་ནུས་པ་ཆེ་རུ་གཏོང་བ་དང་། ལག་རྩལ་མཐོན་པོ་འཕེལ་རྒྱས་སུ་གཏོང་བའི་ཆ་རྐྱེན་འོག་ཏུ། མི་དམངས་དམག་འཁྲུག་གི་འཐབ་ཇུས་དང་འཐབ་རྩལ་འཕེལ་རྒྱས་སུ་བཏང་སྟེ། དམག་སྲིད་དང་དམག་དམངས་མཐུན་སྒྲིལ་སྲ་བརྟན་དུ་གཏང་དགོས་ཞེས་གསུངས་མྱོང་། འདི་དག་ནི་རྒྱལ་སྲུང་དང་དམག་དཔུང་དེང་རབས་ཅན་གྱི་འཛུགས་སྐྲུན་བྱེད་ཤུགས་ཆེ་རུ་གཏོང་བར་མཛུབ་སྟོན་གྱི་དོན་སྙིང་ཆེན་པོ་ལྡན།
བློ་མཐུན་ཅང་ཙེ་རྨིན་གྱིས་མར་ཁེ་སི་རིང་ལུགས་ཀྱི་བསམ་བློའི་ལམ་ཕྱོགས་རྒྱུན་འཁྱོངས་བྱས་པ་དང་། ལག་ལེན་ལ་བརྩི་མཐོང་དང་མང་ཚོགས་ལ་བརྩི་མཐོང་བྱས་ལ། དུས་རབས་ཀྱི་ཁྱད་ཆོས་ལ་རྒྱུས་ལོན་ཡང་དག་བྱས་ཤིང་། ཚན་རིག་དང་མཐུན་པའི་སྒོ་ནས་ང་ཚོའི་ཏང་གནས་སའི་ལོ་རྒྱུས་ཀྱི་ཕྱོགས་མཚམས་ལ་བརྡར་གཅོད་བྱས་པ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་འཛུགས་སྐྲུན་བྱེད་པའི་བརྗོད་སྙིང་ལ་དམིགས་ནས། བཅོས་བསྒྱུར་དང་འཕེལ་རྒྱས། བརྟན་འཇགས། ནང་སྲིད་དང་། ཕྱི་འབྲེལ། རྒྱལ་སྲུང་། ཏང་སྐྱོང་དང་རྒྱལ་སྐྱོང་། དམག་སྐྱོང་སོགས་ཕྱོགས་ནས་དགོངས་པ་གསར་པ་དང་ལྟ་ཚུལ་གསར་པ། ཆོད་གཏམ་གསར་པ་རབ་དང་རིམ་པ་བཏོན་ནས། ཏང་གི་གཞི་རྩའི་གཞུང་ལུགས་དང་གཞི་རྩའི་ལམ་ཕྱོགས། གཞི་རྩའི་རྩ་གནད། གཞི་རྩའི་ཉམས་མྱོང་རྒྱུན་འཁྱོངས་བྱེད་པ་དང་འཕེལ་རྒྱས་སུ་གཏོང་བའི་ཐད་བྱས་རྗེས་ཕུལ་དུ་བྱུང་བ་བཞག་ཡོད། ལྷག་པར་དུ་ཁོང་གིས་ཏང་ཡོངས་ཀྱི་རིག་སྟོབས་གཅིག་ཏུ་བསྡུས་ནས་མཚོན་བྱེད་གསུམ་གྱི་དགོངས་པ་གལ་ཆེན་གསར་གཏོད་མཛད་པ་དང་། ཏང་གིས་བསམ་བློར་མཛུབ་སྟོན་བྱེད་པའི་སྟེང་ཡང་བསྐྱར་བབ་བསྟུན་མདུན་སྐྱོད་ཐེངས་གཅིག་བྱེད་པ་མངོན་འགྱུར་བྱས་ལ། མར་ཁེ་སི་རིང་ལུགས་པ་དངོས་མ་ཞིག་གི་ཆབ་སྲིད་ཀྱི་སྙིང་སྟོབས་ཆེན་པོ་དང་རིགས་པའི་གཞུང་ལུགས་ཀྱི་སྙིང་སྟོབས་ཆེན་པོ་མཚོན་པར་བྱས། མཚོན་བྱེད་གསུམ་གྱི་དགོངས་པ་གལ་ཆེན་གྱིས་ང་ཚོའི་ཏང་གིས་ཐོག་མཐའ་བར་གསུམ་དུ་ཀྲུང་གོའི་སྔོན་ཐོན་ཐོན་སྐྱེད་ནུས་ཤུགས་ཀྱི་འཕེལ་རྒྱས་རེ་བ་མཚོན་པ་དང་། ཀྲུང་གོའི་སྔོན་ཐོན་རིག་གནས་ཀྱི་མདུན་སྐྱོད་ཁ་ཕྱོགས་མཚོན་ལ། ཀྲུང་གོའི་ཆེས་རྒྱ་ཆེ་བའི་མི་དམངས་ཀྱི་རྩ་བའི་ཁེ་ཕན་མཚོན་ཞིང་། འགྲོ་བ་མིའི་ལོ་རྒྱུས་འཕེལ་རྒྱས་ཡར་ཐོན་གྱི་སྤྱིར་བཏང་གི་ཆོས་ཉིད་གཞི་འཛིན་སར་བྱས་པ་དང་། དུས་རབས་གསར་པའི་འཕེལ་ཕྱོགས་དང་རང་རྒྱལ་གྱི་སྤྱི་ཚོགས་འཕེལ་རྒྱས་ཡར་ཐོན་གྱི་རེ་བ་དང་མཐུན་ལ། རྒྱལ་ཡོངས་མི་རིགས་སོ་སོའི་མི་དམངས་ཀྱི་ཁེ་ཕན་དང་རེ་འདུན་མཚོན་པ་དང་། གནས་བབ་གསར་པའི་འོག་ཏང་གི་སྲིད་འཛིན་ནུས་པ་མཐོར་འདེགས་གཏོང་བ་དང་ཏང་གི་སྲིད་འཛིན་གོ་གནས་སྲ་བརྟན་དུ་གཏོང་བ། ཏང་གི་སྲིད་འཛིན་འགན་འཁྲི་ཡོངས་འགྲུབ་བྱེད་པའི་གཞི་རྩ་བཅས་ནན་སྟོན་བྱས་ཡོད། མཚོན་བྱེད་གསུམ་གྱི་དགོངས་པ་གལ་ཆེན་གྱི་ཆེས་མངོན་གསལ་གྱི་ཁྱད་ཆོས་དང་ཆེས་འབུར་ཐོན་གྱི་བྱས་རྗེས་ནི། འབྲེལ་འདྲིས་དམ་ཞིང་ཕན་ཚུན་འབྲེལ་མཐུད་ཀྱི་བསམ་བློ་གསར་པ་དང་ལྟ་ཚུལ་གསར་པ། ཆོད་གཏམ་གསར་པ་རབ་དང་རིམ་པ་སྤྱད་དེ། ཅི་ཞིག་ནི་སྤྱི་ཚོགས་རིང་ལུགས་ཡིན་པ་དང་། སྤྱི་ཚོགས་རིང་ལུགས་ཇི་ལྟར་འཛུགས་སྐྱོང་བྱེད་པའི་གནད་དོན་ལ་ལན་བཏབ་པ་དང་། གསར་གཏོད་རང་བཞིན་གྱི་སྒོ་ནས་ཏང་ཅི་འདྲ་ཞིག་འཛུགས་སྐྱོང་བྱེད་པ་དང་ཏང་ཇི་ལྟར་འཛུགས་སྐྱོང་བྱེད་པའི་གནད་དོན་ལ་ལན་བཏབ་ཅིང་། མར་ཁེ་སི་རིང་ལུགས་དང་མའོ་ཙེ་ཏུང་དགོངས་པ། ཏེང་ཞའོ་ཕིང་གི་རིགས་པའི་གཞུང་ལུགས་བཅས་རྒྱུན་འཛིན་བྱས་པ་དང་འཕེལ་རྒྱས་སུ་བཏང་ལ། ང་ཚོས་དུས་རབས་གསར་པའི་ཆ་རྐྱེན་འོག་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལས་དོན་ལ་སྐུལ་འདེད་གཏོང་བ་དང་ཏང་གི་འཛགས་སྐྲུན་ལ་ཤུགས་སྣོན་པའི་ཆོས་ཉིད་ཐད་ཀྱི་ངོས་འཛིན་གཏིང་ཟབ་ཏུ་བཏང་།
བློ་མཐུན་ཅང་ཙེ་རྨིན་གྱིས་ཏང་དང་མི་དམངས་ཀྱི་ལས་དོན་དང་འབྲེལ་བའི་འཐབ་ཇུས་གནད་དོན་གལ་ཆེན་ལ་ཧ་ཅང་མཐོང་ཆེན་གནང་། ཏང་གི་ཚོགས་ཆེན་ཐེངས་བཅུ་དྲུག་པར་གྲ་སྒྲིག་བྱེད་པའི་སྐབས་སུ། བློ་མཐུན་ཅང་ཙེ་རྨིན་གྱིས་ཏང་དང་རྒྱལ་ཁབ་ཀྱི་ལས་དོན་ཡུན་རིང་འཕེལ་རྒྱས་གཏོང་བ་དང་། ཏང་དང་རྒྱལ་ཁབ་ཡུན་སྐྱོང་བདེ་འགོད་བྱེད་ཆེད། རང་འགུལ་གྱིས་ཀྲུང་དབྱང་མགོ་ཁྲིད་ཀྱི་འགན་བཞེས་མཚམས་འཇོག་རྒྱུར་མ་ཟད། ཀྲུང་དབྱང་ཨུ་ཡོན་ལྷན་ཁང་ནས་ཕྱིར་འབུད་རྒྱུའི་རེ་བ་ཞུས་ཏེ། ཏང་དང་རྒྱལ་ཁབ་ཀྱི་མཐོ་རིམ་མགོ་ཁྲིད་གསར་རྙིང་བརྗེ་སྤོར་བདེ་བླག་ངང་སྤེལ་བར་སྐུལ་འདེད་བཏང་། ཏང་ཀྲུང་དབྱང་གིས་བློ་མཐུན་ཅང་ཙེ་རྨིན་གྱི་རེ་ཞུ་ལ་འཐད་པ་བྱུང་། སྐབས་དེའི་རྒྱལ་སྤྱིའི་གནས་བབ་ལ་རྙོག་འཛིང་དང་འགྱུར་ལྡོག་ཆེ་བ་དང་། རྒྱལ་སྲུང་དང་དམག་དཔུང་འཛུགས་སྐྲུན་གྱི་ལས་འགན་ཧ་ཅང་ལྕི་བར་བསམ་གཞིགས་བཏང་ནས། ཏང་གི་སྐབས་བཅུ་དྲུག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་སྟེང་བློ་མཐུན་ཅང་ཙེ་རྨིན་གྱིས་ཀྲུང་གུང་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞིའི་འགན་མུ་མཐུད་དུ་ཁུར་རྒྱུའི་ཐག་བཅད། ཏང་གི་སྐབས་བཅུ་དྲུག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་རྗེས་སུ། བློ་མཐུན་ཅང་ཙེ་རྨིན་གྱིས་སྟོབས་ཤུགས་ཡོད་རྒུས་བློ་མཐུན་ཧུའུ་ཅིན་ཐའོ་སྤྱི་ཁྱབ་ཧྲུའུ་ཅི་ཡིན་པའི་སྐབས་གསར་པའི་ཀྲུང་དབྱང་མགོ་ཁྲིད་ཐུན་མོང་གི་བྱ་བར་རྒྱབ་སྐྱོར་མཛད་པ་དང་། སེམས་ཤུགས་ཡོད་ཚད་བཏོན་ནས་ཏང་ཀྲུང་དབྱང་གིས་ཁོང་ལ་སྤྲད་པའི་འགན་འཁྲི་ལག་བསྟར་བྱས། ཉིས་སྟོང་བཞི་ལོར། བློ་མཐུན་ཅང་ཙེ་རྨིན་གྱིས་ཏང་དང་རྒྱལ་ཁབ་ལས་དོན་ཡུན་རིང་འཕེལ་རྒྱས་སུ་གཏོང་བའི་དོན་ཆེན་ལ་བསམ་གཞིག་མཛད་ནས། རང་འགུལ་གྱིས་ཏང་དང་རྒྱལ་ཁབ་ཀྱི་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞིའི་འགན་ཁུར་མཚམས་འཇོག་རྒྱུའི་རེ་འདུན་ཞུས་པ་དེས་ཁོང་གིས་ཏང་དང་རྒྱལ་ཁབ་ཀྱི་ལས་དོན་འཕེལ་རྒྱས་གཏོང་བའི་ཐད་ཐུགས་དགོངས་ཟབ་མོ་བཞེས་ཡོད་པ་མཚོན།
（ པར་ངོས་གསུམ་པར་གཟིགས།）