བསིལ་རླུང་ལྷོ་ནས་གཡུག་པའི་གངས་རི་དེའི་འདབས་ན།།
ཆར་ཟིམ་མར་མར་བབས་པའི་གྲོང་སྡེ་དེའི་ཕུ་ན།།
བསམ་བློའི་རྒྱབ་ལྗོངས་གཙང་བའི་ཨ་མདོ་བའི་མི་ཕོ།།
གནམ་ས་འཐབ་པའི་ལོ་ཚིགས་དེབ་དཀར་གྱི་འཕྲོ་མ།།
བསྐྱུར་ཏེ་སྨྲེང་མའི་མགུར་དབྱངས་རྒྱང་རིང་དུ་འཐེན་ཞོར།།
རྐང་རྗེན་ལྕགས་ཐག་སྦྲེལ་མར་གང་ཞིག་ཏུ་ཕེབས་སོང་།།
དབང་ཐང་གསེར་བྲིས་སྐུད་པ་སྙན་ངག་གི་གཤོག་རྒྱ།།
ངག་ཚིག་གསེར་གྱི་ཐང་མ་སྙིང་དབུས་ཀྱི་ནོར་བུ།།
སྒེར་གཅོད་འདོད་སྡོམ་ལྕགས་སྒྲོག་རྙི་རྒྱ་དག་བཅད་དེ།།
ལྷ་ས་ལྷ་ཡི་ཞིང་ནས་གང་ཞིག་ལ་འཕུར་སོང་།།
རྒྱ་གར་ཤར་ནུབ་བསྐོར་བའི་དགེ་བཤེས་ཀྱི་མཚན་ཅན།།
རྒྱལ་ཁམས་རིག་པས་བསྐོར་བའི་ཨ་མདོ་བའི་དགེ་ཆོས།།
ཉེས་མེད་གསེར་ལས་ལྷག་པའི་རིན་ཆེན་གྱི་མི་ལུས།།
སྐེ་ཤིང་གཟེར་བུ་གྱོན་ཏེ་གང་ཞིག་ལ་ཕེབས་སོང་།།
༼ གངས་འོད། ༽