སྤྱིར་ལོ་སར་ཞེས་པ་ནི་ལོ་སྔ་མ་རྫོགས་ནས་ལོ་རྗེས་མའི་འགོ་ཚུགས་པ་ལ་རང་རང་གི་ཡུལ་སྲོལ་གོམས་གཤིས་ལྟར་བཟའ་མི་ལྷན་འཛོམས་བྱུང་ནས་ཟས་ཞིམ་ལ་རོལ་ཞིང་གོས་ལེགས་པོར་གྱོན་ཏེ་དགའ་སྐྱིད་ཀྱིས་ཁེངས་པའི་དུས་ཆེན་ཞིག་ཡིན། རྩིས་གཞུང་སོ་སོ་དང་མཁས་པ་རེ་རེའི་བཞེད་དགོངས་མི་འདྲ་བའི་དབང་གིས་ཡུལ་ལུང་སོ་སོས་རང་རང་གི་ཡུལ་སྲོལ་གོམས་གཤིས་ལྟར་དབྱར་དགུན་སྟོན་དཔྱིད་སོགས་ལོ་རེའི་དུས་ཚིགས་བཞི་བོ་གང་རུང་ལ་ལོ་སར་བཏང་སྲོལ་ཡོད་པ་ཞིག་རེད།

ལོ་འགོ་འཛིན་ཚུལ་ཡང་གཅིག་མཚུངས་མིན་ཏེ། ལ་ལས་དཔྱིད་ཀར་བོད་ལྗོངས་ལྷོ་ཁའི་ཡར་ལྷ་ཤམ་པོའི་ཁམ་སྡོང་ལ་མེ་ཏོག་བཞད་དུས་སུ་ལོ་སར་གཏོང་བ་ཡིན་ཞིང་། ལ་ལས་དགུན་ཁར་རོལ། ད་དུང་ཡུལ་གྲུ་ཁག་ཅིག་གིས་སྟོན་དུས་སུ་ལོ་སར་བཏང་ནས་ལོ་གཅིག་གི་ལོ་འགོ་ནི་ལོ་སར་གཏོང་བའི་ཉིན་དེ་ནས་བརྩི་བ་ཡིན་པས། དེང་སང་མདོ་དབུས་ཁམས་གསུམ་ཡོངས་སུ། ལོ་སར་ལ་ཧོར་ཟླ་དང་པོ་དང་། ཧོར་ཟླ་གཉིས་པ། ཧོར་ཟླ་གསུམ་པ། ཧོར་ཟླ་བརྒྱད་པ། ཧོར་ཟླ་དགུ་པ། ཧོར་ཟླ་བཅུ་པ། ཧོར་ཟླ་བཅུ་གཅིག་པ། ཧོར་ཟླ་བཅུ་གཉིས་པ་བཅས་འདོད་ཚུལ་མི་འདྲ་བ་དགུ་ཙམ་བྱུང་འདུག་ཀྱང་། འགའ་ཤས་སུ་ཧོར་ཟླ་དང་པོར་ལོ་འགོ་ཚུགས་ནས་ལོ་གསར་པའི་དཔེ་དར་ཡོད།

ལོ་གསར་པའི་ཟླ་བ་འདི་དག་གི་མིང་ལ་ཧོར་ཟླ་ཞེས་འབོད་དོན་ནི། ཡོན་རྒྱལ་རབས་ཀྱི་རྒྱལ་པོ་ཇིང་གུར་ཧན་གྱིས་མི་ཉག་ལ་དམག་དྲངས་ནས་མི་ཉག་རྒྱལ་པོ་བཀྲོངས་ཏེ་མི་ཉག་གི་ཡུལ་ཁམས་ཐམས་ཅད་མངའ་འོག་ཏུ་བསྡུས་ཤིང་། མི་ཉག་རྒྱལ་རབས་མཇུག་རྫོགས་པ་ནས་བཟུང་། ཧོར་ཡུལ་དུ་རྒྱལ་ཁ་བླངས་པའི་ཟླ་བ་དེའི་ནང་ལ་དགའ་སྟོན་རྟེན་འབྲེལ་ཞུས་ནས་ལོ་གསར་པའི་སྲོལ་བྱུང་། སྐབས་དེར་ལུགས་རྙིང་གི་ཟླ་བ་དང་པོ་དང་བོད་ལུགས་ཀྱི་ཟླ་དང་པོ་གཉིས་མཉམ་གཅིག་ཏུ་ཁེལ་ཡོད་པར་བཤད་པས་གཉིས་ཀ་ལ་ཧོར་ཟླ་དང་པོ་ཞེས་འབོད་ཆོག་ཟེར།

ས་སྐྱ་བས་བོད་ལ་དབང་སྒྱུར་སྐབས་ཧོར་ལུགས་ཀྱི་སྲོལ་ལྟར་ལོ་ཟླ་བརྩིས་ཏེ་ཟླ་བ་རེ་རེ་ལ་ཧོར་ཟླ་ཞེས་བརྗོད་པ་རེད། ད་ལྟའི་དུས་སུ་ལུགས་གཉིས་ཀྱི་ཟླ་བ་རྩི་ཚུལ་ལ་མགྱོགས་དལ་གྱི་ཁྱད་པར་ཅུང་ཟད་ཤོར་ཡོད་ཀྱང་། དབུས་གཙང་པས་བོད་ཟླ་ལ་ཧོར་ཟླ་ཞེས་སྔོན་ལུགས་རྒྱུན་འབྱམས་ཀྱིས་འབོད་ཀྱིན་འདུག་ལ། ཨ་མདོ་བས་ལུགས་རྙིང་གི་ཟླ་བ་སོ་སོར་ཧོར་ཟླ་ཞེས་འབོད་པ་རེད། ལྷ་ལྡན་གྲོང་གི་མི་རྣམས་ཀྱིས་རང་རང་གི་འཁོས་ཀ་ལ་གཞིགས་ཏེ་བོད་ཟླ་བཅུ་གཉིས་པ་ནས་བཟུང་ལོ་སར་གྱི་ཉེར་མཁོའི་ཅ་དངོས་སོགས་གྲ་སྒྲིག་བྱེད་འགོ་ཚུགས་ཏེ། ཤ་མར་འབྲུ་སྣུམ་སོགས་བཟའ་ཆས་ཀྱི་སྐོར་དང་རྒྱན་གོས་སྣ་ཚོགས་ཉོ་ཆ་རྒྱག་པ་དང་། ཆང་བཙག་པ། ཁང་པའི་ཕྱི་ནང་གི་དུད་པ་ཕྱགས་ཤིང་གད་སྙིགས་དང་ཐལ་བ་ཕོས་ནས་གཙང་སྦྲ་ལེགས་པོ་བྱེད་པ་རེད།།