ལོ་གསར་པའི་ནང་ལ།
ཞོགས་པའི་སྐྱ་རེངས་ཀྱིས་ཁ་གཡང་བསྒྲིགས་ཏེ་
ལོ་སར་ཚེས་གཅིག་གིས་རྟེན་འབྲེལ་མངོན་ནས་
བསང་དུད་སྔོན་པོ་ཞིག་དང་
ཀི་བསོ་དང་ལྷ་རྒྱལ་གྱི་རེ་སྨོན་ཞིག་གིས་
གནམ་ལོ་གསར་པ་བསུ། གཡང་ལོ་གསར་པ་བསུ།
ལོ་གསར་པའི་ནང་ལ།
ཤོག་སྦག་གད་སྒྲ་ཡིས་བསུ་མ་བྱེད་བཞིན།
གོས་ཡག་ལྭ་ཡག་གིས་རྟེན་འབྲེལ་བསྒྲིགས་ནས་
དུང་དཀར་ཀྱི་རྒྱང་འབོད་ཐོག་མ་དང་
འོ་ཇ་ཡི་མཆོད་མགོ་དང་པོས་
གནམ་ལོ་གསར་པ་བསུ། གཡང་ལོ་གསར་པ་བསུ།
ལོ་གསར་པའི་ནང་ལ།
ཕ་ཨ་ཁུས་ཆང་ཕོར་བཏེགས་ནས་
མ་སྲུ་མོས་གླུ་སྐད་བཀུགས་ནས་
ནང་ན་ཟླས་སྨོན་ཚིག་བཤད་ནས་
སྐྱིད་གཞིས་ཁྱིམ་ལྷན་འཛོམས་ཁྲོད་ནས་
གནམ་ལོ་གསར་པ་བསུ། གཡང་ལོ་གསར་པ་བསུ།
ལོ་གསར་པའི་ནང་ལ།
ཉི་མ་གསར་པ་ཞིག་གིས་
སྨོན་འདུན་གསར་པ་ཞིག་ཁུར་ནས་
ཚེ་རླུང་རྟ་དར་བའི་སྨོན་ལམ་འདེབས།
བློ་རིག་པ་རྒྱས་པའི་བཀྲ་ཤིས་ཤོག།
རྒྱུ་འབྱོར་བ་འཕེལ་བའི་རྟེན་འབྲེལ་འགྲིག།
རྟགས་རྟེན་འབྲེལ་ཡག་པའི་བཀྲ་ཤིས་ཤོག།
ནང་བཀྲ་ཤིས་བདེ་ལེགས་ཕུན་སུམ་ཚོགས།
༼ ཁ་བ་ན་རོ། ༽