དགུང་སྔོན་སྐར་ཚོགས་མཛེས་པ་ཐག་རིང་མགྲོན་པོ།།

རླུང་བུ་དལ་གྱིས་གཡུགས་པ་མནར་གཅོད་རོལ་དབྱངས།།

ཟླ་བ་ཁེར་རྐྱང་ཡིན་པ་འགྲེལ་དགོས་མི་འདུག།

མིག་ཆུ་སེམས་ལ་ལྷུང་བ་རང་རྟོན་ཞིག་རེད།།

ཉེ་བར་གཅར་དུ་མེད་པའི་མི་སེམས་གཤོག་ཐོགས།།

ཐག་རིང་རྒྱང་དུ་སྤུར་བའི་སྨྲེ་ངག་མི་གདོན།།

ཁྱོད་ལ་མིག་ཆུའི་གཏམ་རྒྱུད་འབྲི་དོན་མི་འདུག།

རང་དབང་རང་གིས་སྤྱད་འདི་ཁེར་ཚུགས་ཤིག་རེད།།

གཟུགས་མེད་རྣམ་ཤེས་སྨྱོན་མ་ཁྱོད་ལ་འཁྲི་ནས།།

སེམས་ཚོར་འཁྱག་པའི་ངུ་ངག་དབྱངས་ལ་གྱེར་བའི།།

མི་ཟད་འདོད་རྔམས་མཆེད་པའི་ཚ་རླབས་བསྐྱུར་རྗེས།།

དྲན་ཤེས་ཆུ་རྐྱང་བཏུང་འདི་རང་གཅུན་ཞིག་རེད།།

རྒྱང་ནས་འཇའ་ཚོན་བཞད་པའི་ཚུལ་དུ་འཁྲུལ་ཞིང་།།

གམ་ནས་གསོབ་གཟུགས་སྣང་བའི་རྣམ་རྟོག་ཁྲེལ་མེད།།

ཨ་གསར་གདོན་གྱིས་བསླུས་པའི་གཡབ་མོ་བསྐྱུར་ནས།།

ཁེར་རྐྱང་ཕར་མཐའ་གཞལ་འདི་ཐར་ལམ་ཞིག་རེད།།

འཛུམ་ཀོང་ཕག་ཏུ་ཡིབས་པའི་ཁྲོ་གཉེར་རླབས་ཀྱིས།།

སེམས་ཀྱི་ཆུ་རིས་བཤིག་པའི་རྗེས་ཤུལ་དེ་ནས།།

དགའ་སྐྱོ་གཞན་ལག་སྤྲད་པའི་ཟློས་གར་བསྐྱུར་རྗེས།།

ན་ཟུག་ཉམས་སུ་མྱོང་བ་མཛེས་སྡུག་ཅིག་རེད།།

གདུང་སེམས་མེ་རུ་སྦར་བའི་ངོ་གདོང་སྐྱ་བོ།།

སྨྲེ་ངག་དབྱངས་ལ་གྱེར་པའི་ལམ་འགྲམ་མི་ཚོགས།།

ཆང་ཁང་འུར་གྱིས་བཀང་བའི་སྙིང་ཉེ་བསྐྱུར་ནས།།

རང་ལ་གློ་བ་ཉེ་འདི་སྙིང་སྟོབས་ཤིག་རེད།།

ཨ་མ་མི་མོ་མ་རེད་ལྷ་མོ་ཞིག་རེད།།

བརྩེ་བ་སྡུག་བསྔལ་མ་རེད་སྙིང་རྗེ་ཞིག་རེད།།

ཡོད་ཚད་རིགས་སྒྲེས་ཕུང་བའི་དག་སྣང་བསྐྱུར་ནས།།

སྒེར་སེམས་མགོ་བོ་ནོན་འདི་རང་རྟོགས་ཤིག་རེད།།

ནམ་ཟླ་སྐྱོ་བས་ཟད་པ་སུ་ཡིས་ཤེས་སམ།།

ང་ཡི་ལང་ཚོའི་སྐྱོ་གར་ཁྱོད་ཀྱི་ཡིན་ནམ།།

གཏམ་རྒྱུད་ཨ་ཙ་མ་དེ་ཤུལ་དུ་བསྐྱུར་ནས།།

རང་སེམས་རང་ལ་དབང་འདི་བདེ་སྐྱིད་ཅིག་རེད།།