ཁ་བ་ལྷབ་ལྷུབ་བར་སྣང་དབྱིངས་ནས་སྤུར།།
རླུང་བུ་འཇམ་པོས་གཡེར་དྲིལ་སིལ་སིལ་སྒུལ།།
སྒེའུ་ཁུང་གམ་ནས་མདུན་རིའི་ངོས་ལ་ཅེར།།
དབེན་པའི་ལྷིང་འཇགས་ཡིད་ཀྱི་གདིང་ལ་ཐིམས།།
ངུར་སྨྲིག་འོག་ནས་སེམས་ཀྱི་བདེ་དྲོད་བཙལ།།
རྣམ་རྟོག་རྟ་ཕོ་དྲན་ཤེས་སྲབ་ཀྱིས་བཅུན།།
གཞོན་པའི་སྣང་བ་མི་རྟག་རླུང་ལ་སྐུར།།
བཙུན་ཆུང་ཚོ་ཞེས་རྒན་གྱི་གདམས་ངག་དྲན།།
གྲག་འགུལ་མེད་པའི་ཁང་མིག་ཆུང་ཆུང་ནང་།།
ཁེར་རྐྱང་འཚོ་བར་འདྲིས་ལོབ་བྱེད་བཞིན་དུ།།
ཁྲ་ཁྲ་ཟིང་ཟིང་འདུ་འཛིའི་འཁོར་བའི་གྲོང་།།
ཞེན་ཆགས་ཕྱིར་མིག་འཕེན་ལ་འགོག་ཐབས་བྱས།།
འཁོར་བའི་བདེ་སྡུག་རིང་མོ་རླུང་ལ་བསྐུར།།
དགྲ་གཉེན་ཁྱིམ་ཐབ་སྐྱོང་ཚུལ་རྒྱབ་ཏུ་བསྐྱུར།།
བུ་དང་བུ་མོ་འདུས་པའི་ལམ་དང་གྱེས།།
དབེན་པའི་ལྷིང་འཇགས་འདི་ལ་གྲོགས་སུ་བསྟེན།།
ཆུང་གྲོགས་ན་ཟླ་ཚོ་དང་སོ་སོར་གྱེས།།
ཡུལ་གྱི་རྩྭ་ཐང་ནོར་ལུག་རྒྱབ་ཏུ་བསྐྱུར།།
ཆོས་དཔེ་སྣ་རིང་མ་ཞིག་མདུན་དུ་བཤམས།།
ང་ཡི་འཇིག་རྟེན་ཆུང་ཆུང་སིམ་མེར་གནས།།
སྒྱུ་མའི་ཟློས་གར་མོད་པའི་འཚོ་བའི་ཁྲོད།།
ང་ཡི་བདེ་སྡུག་རི་མོ་སུ་ལ་གསལ།།
རང་སེམས་དབེན་པའི་རི་ལ་ཉེར་འཁོར་ནས།།
ཡུན་ཐུང་མི་ཚེ་ཞིག་གི་སྙིང་པོ་འཚོལ།།