དུ་བ་འཆུས་པོ་གནམ་མཐར་སྙེག་པར་བྲེལ།།
འབྱུང་མེ་ནད་པ་གདུང་བའི་སེམས་ཚེགས་འཕར།།
འདི་ལྟར་གྱེས་པར་སུ་ཡང་མི་རངས་ཀྱང་།།
ཟློག་པའི་བློ་ཇུས་གང་ལ་མི་སྲིད་ཨང་།།
ཐབ་གཞོགས་མི་ཚོགས་སྤྲོ་ཞིང་ཀྱལ་ཀ་སློང་།།
དུས་མཐའི་མགྲོན་པོ་གཏིང་ནས་མགྲིན་པ་བརྣངས།།
ལྗོན་ཤིང་རླུང་གིས་སྒུལ་བའི་ཤུར་གླུ་ཡང་།།
སེམས་འགུལ་ཐེབས་ཏེ་བདག་ལ་བླངས་པ་འདྲ།
མིག་ཆུ་ཟེགས་མས་རི་ལུང་ཐང་ཀུན་བྲན།།
བྱ་བྱེའུ་འགའ་ཞིག་ལྗོན་གསེབ་ཧད་པ་མཐོང་།།
བེམ་གཟུགས་རི་བོ་དག་ཀྱང་སྨྲེང་བ་སྟེ།།
ན་བུན་སྨུག་རིས་སྐྱོ་བའི་ཞལ་རླངས་སོ།།
ནམ་ཞིག་འདི་ནས་ཕ་རོལ་ལྡོག་པའི་དུས།།
བར་དོའི་སྒྲ་འོད་ཟེར་ལ་མི་ཞེད་ཀྱང་།།
དོ་ནུབ་མི་སྡུག་ཉམས་ཀྱི་ཕྱག་ཟུང་གིས།།
བདེ་མོར་འཇོག་ཡོང་བསམས་ན་གཏིང་ནས་འཇིགས།།
ཀྱེ་མ་བདག་ནི་མི་མེད་བྱེ་ཐང་གི།།
རྨི་ལམ་ནོགས་མོ་སྲིད་པའི་ཤེའུ་ཆུང་སྟེ།།
མ་ཟིན་ཡལ་བར་དོགས་པའི་དཀའ་སྡུག་ངང་།།
སྨིག་རྒྱུའི་གྲོང་དུ་གཙང་ཆུ་འཐུང་བར་བྲེལ།།
ད་ནི་ནད་མུག་མཚོན་གྱི་བསྐལ་པ་ལ།།
བསྒུགས་ནས་འདུག་རྒྱུ་མ་གཏོགས་ཐབས་ཟད་ཀྱང་།།
སྒྱུ་འཕྲུལ་བློ་ཡིས་གསང་བའི་ཡང་ཕུགས་ན།།
སྣང་བའི་མཁར་ཁང་བཞེངས་ནས་མངའ་གསོལ་བྱས།།
རྟག་ཏུ་འཛུམ་པའི་གསེར་གྱི་འཕགས་སྐུ་བཞིན།།
ཞི་བའི་སྤྱན་གྱིས་བདག་ཉིད་ཁོ་ནར་གཟིགས།།
མེ་ཆུ་རླུང་གིས་བསྐལ་བ་འཇིག་དུས་ཀྱང་།།
གཞོམ་ཐབས་བྲལ་བ་གཡུང་དྲུང་ལྕགས་ཀྱིས་ཤན།།
དེ་ལྟར་ལགས་ཀྱང་ལས་ཀྱི་དངོས་བྱུང་གིས།།
སྙིང་རྗེ་བ་སྤུ་ཙམ་ཡང་མི་གནང་བར།།
གྲུ་ཟམ་བྲལ་བའི་གཙང་བའི་ཕར་ཚུར་དུ།།
གཏན་སྡོད་དགོས་པའི་བཀའ་ཐམ་དམར་ལ་སྣུམ།།
ད་ནི་སྐྱོད་ཅིག་ལས་ཀྱི་གཞིས་དེངས་ཤིག།
གཏན་དུ་འཛོམས་ཆིངས་མེད་པའི་མི་ཚེའི་ནང་།།
བྱ་གཡང་གར་ལ་རྩེན་པའི་རི་ཟོམ་ནས།།
སྣང་སྲིད་སྒྱུ་མར་གཟིགས་ཤོག་གྲོགས་པོ་ཀྱེ།།
༼ གཞི་ཚང་ཟླ་བ་གྲགས་པ། ༽